The Phnom Penh Post Search

Search form

Logo of Phnom Penh Post newspaper Phnom Penh Post - ស្ថានភាព​តាវី​តាមីន​សេ ល្បី​ថា​កូន​លក់​ផ្ទះ​សំបែង​យក​ប្រាក់​មើល​ជំងឺ

ស្ថានភាព​តាវី​តាមីន​សេ ល្បី​ថា​កូន​លក់​ផ្ទះ​សំបែង​យក​ប្រាក់​មើល​ជំងឺ

Content image - Phnom Penh Post
លោកតា វីតាមីនសេ ពេល​សម្រាក​ព្យាបាល​នៅមន្ទីរ​ពេទ្យ​រុស្ស៊ី។ ហ្វេសប៊ុក​

ស្ថានភាព​តាវី​តាមីន​សេ ល្បី​ថា​កូន​លក់​ផ្ទះ​សំបែង​យក​ប្រាក់​មើល​ជំងឺ

ភ្នំពេញៈ ថ្មីៗ​នេះ មាន​ការ​ភ្ញាក់ផ្អើល​ខ្លាំង​ពី​សំណាក់​មហាជន ក៏​ដូចជា​សង្គម​អ្នក​សិល្បៈ​ខណៈ​ឮ​ដំណឹង​តារា​កំប្លែង​មិន​រីង​ស្ងួត នាយ​វីតាមីន​សេ កំពុង​ត្រូវ​បាន​កូនៗ ខ្នះខ្នែង​លក់​ផ្ទះ​សំបែង ដើម្បី​យក​ប្រាក់​ដោះស្រាយ​បញ្ហា និង​នាំ​យក​ទៅ​ព្យាបាល​ជំងឺ​បន្ទាន់​នៅ​ប្រទេស​ជិតខាង ក្រោយ​ចេញ​ពី​ពេទ្យ​រុស្ស៊ី និង​ទទួល​បាន​អនុសាសន៍​ពី​ក្រុម​គ្រូពេទ្យ​ថា គួរតែ​ទៅ​រកការ​ការ​ព្យាបាល​ឯ​ក្រៅ​ស្រុក​មក​នោះ។

អ្នកនាង មឿ​ និមល ហៅ​អ្នកនាង ប៉េងប៉ោង វ័យ ៣៩ ឆ្នាំ ដែល​ត្រូវ​ជា​កូនស្រី​លោក​តា វីតាមីន​សេ ប្រាប់​ភ្នំពេញ​ប៉ុស្តិ៍ ពី​គម្រោង​ការ​នាំ​យក​ទៅ​ព្យាបាល​ក្រៅ​ស្រុក​ពី​ថ្ងៃ​ម្សិលមិញ​ថា៖ «ខ្ញុំ​ពិត​ជា​មិន​អាច​នៅ​ទ្រាំ​ចាំមើល​សភាព​កាន់​តែ​លំបាក​ពីមួយ​ថ្ងៃ​ទៅ​មួយ​ថ្ងៃ​របស់​ប៉ា បាន​ឡើយ ចាប់តាំង​ពី​ក្រោយ​ថ្ងៃ​ភ្ជុំ​មួយ​ថ្ងៃ​មក​នោះ។ សព្វថ្ងៃ​សភាព​ពិបាក​គាត់​គឺ​មិន​អាច​សម្រាន្ត​បាន ហើយ​មាន​ពេល​ខ្លះ​គាត់​មិន​អាច​សម្រាក​ពីរបី​យប់​ជាប់​គ្នា​ក៏មាន​ដែរ។ ក្រោយ​ចេញ​ពី​មន្ទីរ​ពេទ្យ​រុស្ស៊ី និង​បាន​ដំណឹង​ច្បាស់​ពី​ក្រុម​គ្រូពេទ្យ​ថា ប៉ា​គាត់ ត្រូវ​វះកាត់​ដុំ​សាច់​ពីរ​ក្នុង​ថ្លើម និង​ដំបៅ​ក្នុង​ក្រពះ​គាត់ ដែល​ចាំបាច់​ត្រូវ​ទៅ​ព្យាបាល​នៅ​ប្រទេស​ជិតខាង​ណាមួយ»។

ការ​ចេញ​ទៅ​ពិនិត្យ​ព្យាបាល​ជំងឺ របស់ នាយ វីតាមីន​សេ ទាំង​ជួបការ​ខ្វះខាត​លុយ​កាក់​ខ្លាំង​រហូត​បែក​ធ្លាយ​ដំណឹង​ថា កូនចៅ​ប្រកាស​លក់​ផ្ទះ​សំបែង​ទៀត​ផង ខណៈ​លោក​មាន​កូន​ចំនួន ៥ នាក់ (ស្រី ៣)។

Content image - Phnom Penh Post
តារា​កំប្លែង​ជើង​ចាស់ នាយ វីតាមីនសេ ក្នុង​ពិធី​រៀបការ​កូន​ស្រី​អ្នកនាង ប៉េងប៉ោង (កណ្តាល) និង​កូន​ប្រសា​។ វុទ្ធី

អ្នកនាង ប៉េងប៉ោង បញ្ជាក់​ប្រាប់​ថា៖ «រឿង​ជួបការ​លំបាក​នោះ គឺ​ពិត​មែន​ហើយ បើ​ទោះបី​ជា​មានការ​ជួយ​ជ្រោម​ជ្រែង​ពី​បងប្អូន​អ្នកសិល្បៈ ឬ​សប្បុរសជន​នានា​មួយរយៈ​កន្លង​មក​ក្តី តែ​សភាព​ជំងឺ​របស់​ប៉ា គាត់​ត្រូវការ​ការព្យាបាល​រហូត​មក​ហើយ។ ពេល​នេះ ខ្ញុំ​នៅ​មិន​ទាន់​ដាក់​ផ្ទះ​លក់​នៅ​ឡើយ​ទេ គ្រាន់​តែ​យក​ទៅ​បញ្ចាំ ដើម្បី​យក​ប្រាក់​មក​ដោះស្រាយ​បញ្ហា​ជំហាន​ដំបូង​មួយ​សិន​គឺ​ពេល​ជូន​ប៉ា​ទៅ​ពិនិត្យ​ព្យាបាល។ ចំពោះ​ថា នឹង​ត្រូវ​ទៅ​ប្រទេស​ណា ដូចជា​នៅ​មាន​ការ​ស្ទាក់ស្ទើរ​បន្តិច​ដែរ​សម្រាប់​នាង​ខ្ញុំ​ដោយ​ក្នុង​នោះ មាន​ជម្រើស​ប្រទេស​ពីរ​គឺ​ថៃ និង​សិង្ហបុរី។ តែ​ក៏មាន​ការ​សម្រេច​ចិត្ត​ទុក​ជាមុន​ទៅ​ហើយ​ដែរ ប្រសិន​ដំណឹង​មាន​ការ​ជួយ​សម្រួល​ពី​ក្រុម​សប្បុរសជន នៅ​សិង្ហបុរី​ឲ្យដឹង​ទាន់​ពេល​នាង​ខ្ញុំ ទទួល​បាន​លិខិត​ឆ្លងដែន​របស់​ប៉ា​នោះ នឹង​ទៅ​ប្រទេស​សិង្ហបុរី ប៉ុន្តែ​បើ​មិន​ទាន់​ទេ​គឺ​នាង​ខ្ញុំ​សម្រេច​នាំ​ប៉ា​ទៅ​សម្រាក​ព្យាបាល​នៅ​ទីក្រុង​បាងកក​ប្រទេស​ថៃ»។

គួររំឭក​ថា កាល​ពី​ដើម​ខែ​កញ្ញា កន្លង​មក តារា​កំប្លែង​ជើង​ចាស់​វ័យ ៦៧ ឆ្នាំ ដែល​ឈ្មោះ​ពិត​ថា​លោក ម៉ៅ សាមឿន ហៅ​នាយ​វីតាមីនសេ បាន​ចាប់​យក​អាជីព​ជា​តារា​កំប្លែង​ធ្វើជា​របរ​ចិញ្ចឹម​ជីវិត អស់​រយៈពេល​ប្រមាណ​ជាង ២ ទសវត្សរ៍​មក​ហើយ​ក៏ត្រូវ​ធ្លាក់​ខ្លួន​ឈឺ​ធ្ងន់​រហូត​បញ្ជូន​ទៅ​ពេទ្យ​កាល់ម៉ែត មុន​នឹង​ចូល​ទៅ​ពេទ្យ​រុស្ស៊ី កាល​ពី​មុន​ពេល​ថ្ងៃ​ភ្ជុំបិណ្ឌ៕

អត្ថបទគួរចាប់អារម្មណ៍