ក្រុងសៀមរាប៖ ដោយសារធ្លាប់ឆ្លងកាត់ជាក្មេងកំព្រាកាលពីវ័យ ១៣ ឆ្នាំ និងបានខិតខំរៀនសូត្រជំនាញសិល្បៈស្ទើរគ្រប់ទម្រង់ច្រើនឆ្នាំមកនោះ ក៏ជំរុញទឹកចិត្តលោក សួន សុភា ហៅលោក ណាំ ជាប្រធានសមាគម និងស្ថាបនិកសមាគមសិល្បៈវប្បធម៌ខ្មែរអង្គរ ដែលមានសមាជិកគាំទ្ររួមគ្នាមានចំនួនជាង ១០ នាក់ ចាប់ផ្តើមដំណើរការទទួលសិស្សជាកុមារក្រីក្រ និងកំព្រា ឲ្យបានចូលរៀនជំនាញសិល្បៈទៅតាមចំណូលចិត្តពួកគេ ដោយឥតគិតថ្លៃតែម្តង។
លោក ណាំ ដែលបច្ចុប្បន្នមានវ័យ ៣៩ ឆ្នាំ ធ្លាប់ជាកូនកំព្រាកាលមានវ័យ ១៣ ឆ្នាំ ខណៈខ្លួនជាអ្នកស្រុកសូទ្រនិគម ខេត្តសៀមរាប និងធ្លាប់ទទួលបន្ទុករកស៊ីចិញ្ចឹមប្អូន ៥ នាក់ តាំងកេ្មងដែរនោះ ឥឡូវបានដើរមកដល់ចំណុចចាប់ផ្តើមធ្វើកិច្ចការជួយសង្គមបើកសមាគមមួយបង្រៀនជំនាញសិល្បៈខ្មែរដល់កូនខ្មែរដែលចង់រៀនសិល្បៈ និងទទួលចិញ្ចឹមកុមារកំព្រាឲ្យស្នាក់នៅទីកន្លែងរៀនសិល្បៈទៀតផងដែរ និងចាប់ផ្តើមទទួលសិស្ស កាលពីថ្ងៃទី ៣ ខែ កុម្ភៈ ឆ្នាំ ២០២០ កន្លងមកនេះហើយផងដែរ។
សិល្បករ ៣៩ ឆ្នាំ ដែលចេះច្រើនទម្រង់នៃសិល្បៈប្រពៃណីខ្មែរមានល្ខោន សម្តែង សៀក និងរបាំ ហើយក៏ធ្លាប់ជាអ្នកគ្រប់គ្រងមហោស្រពអាណាចក្រអង្គរ លោក សួន សុភា ហៅលោក ណាំ បង្ហើបឲ្យដឹងពីការបើកបង្រៀននូវជំនាញសិល្បៈឥតគិតថ្លៃទៅដល់កុមារក្រីក្រ និងកំព្រារបស់ខ្មែរនៅខេត្តសៀមរាបថា៖ «ជំនាញសិល្បៈចម្រុះរួមមាន របាំបុរាណ របាំប្រពៃណីខ្មែរ ក្បាច់គុនល្បុក្កតោ ហាត់សៀក ជំនាញតន្រ្តីសម័យ សិល្បៈស្ទូឌីយោ និងមិចភ្លេង ធ្វើភេ្លង សរសេរអក្សរភ្លេង និងតន្ត្រីបុរាណ សិល្បៈគំនូរ និងសិល្បៈសូនរូប ការនិពន្ធ និងដឹកនាំរឿង ថតភាពយន្តខ្នាតតូច និងខ្នាតធំស្ប៉តពាណិជ្ជកម្ម ជំនាញថតរូប កាត់តវីដេអូ ចម្រៀង សម្តែងកុន និងបង្ហាញម៉ូដ ល្ខោនខោល ល្ខោនបាសាក់ ល្ខោនស្បែក និងយីកេ ចម្រៀងអាយ៉ៃ និងចាប៉ីដងវែង ច្នៃម៉ូដសម្លៀកបំពាក់។
ពេលចប់យើងខ្ញុំ នឹងផ្តល់ឱកាសការងារសិល្បៈ និងចេញសម្តែងក្រៅប្រទេស ថតកុននៅតាមស្ថានីយទូរទស្សន៍នានា និងថតស្ប៉តពាណិជ្ជកម្មដើម្បីបណ្តុះឲ្យកូនខ្មែរជំនាន់ក្រោយ យល់ដឹង និងស្រឡាញ់ថែរក្សាវប្បធម៌ពីដូនតា គ្រប់ទម្រង់។ ចំពោះទីតាំងស្ថិតនៅខាងជើងផ្សារបុរីប្រិមប្រិយក្នុងខេត្តសៀមរាបខាងជើងវត្តថ្មីប្រហែល ២០០ ម៉ែត្រ។
នេះគឺជាការផ្តល់នូវឱកាសពិសេស សម្រាប់ពុកម៉ែបងប្អូនគ្រប់វ័យដែលមានចិត្តចង់ហាត់រៀនសិល្បៈ និងចូលរួមលើកស្ទួយវប្បធម៌ខ្មែរ មិនថាបុត្រធីតាតូចៗ ក៏អាចមកហាត់រៀនបានដូចគ្នា សម្រាប់ជាថ្នាលបណ្តុះបណ្តាលក្មេងកំព្រាគ្មានទីពឹង អាចមកស្នាក់នៅបានផងដែរ ដែលអាចទាក់ទងតាមលេខ 092 87 97 28៕