.jpg)
លោក តាំង ប៊ុនថន ម្ចាស់ហាង មីស្ទ័រ ស្ទីម កំពុងធ្វើការសម្អាតរថយន្តយ៉ាងផ្ចិតផ្ចង់។ ផា លីណា
ភ្នំពេញ: ការស្ទីមចំហាយទឹកក្ដៅមានប្រសិទ្ធភាពជួយដល់សុខភាពស្បែក និងផ្លូវដង្ហើម។ អ្នកដែលចំណាយពេលក្នុងបន្ទប់ស្ទីម នឹងសម្គាល់ពីអត្ថប្រយោជន៍ចំពោះស្បែក។ សំណើមជួយស្បែកមានភាពស្រស់ថ្លា ហើយកម្ដៅសំណើមអាចជួយកាត់បន្ថយអាការផ្ដាសាយ និងតឹងច្រមុះ ព្រមទាំងឈឺសាច់ដុំ និងស្ដ្រេសទៀតផង។
ប៉ុន្ដែពេលនេះ មីស្ទ័រ ស្ទីម បង្កើតសេវាកម្មស្ទីមទាំងរថយន្ដកម្ចាត់ភាពកខ្វក់ផ្ទៃខាងក្នុង និងខាងក្រៅ លើកស្ទួយភាពស្រស់បំព្រងដូចទើបទិញរថយន្ដថ្មីមកជិះដំបូងៗអ៊ីចឹង។
លោក តាំង ប៊ុនថន អាយុ ៣៩ ឆ្នាំ ជាម្ចាស់ហាង មីស្ទ័រ ស្ទីម បាននិយាយថា៖ «ខ្ញុំប្រើប្រាស់ម៉ាស៊ីនទំនើប ដែលមានសមត្ថភាពខ្ពស់ក្នុងការជម្រះធូលី និងស្នឹម ហើយចំពោះ ការសម្អាតបរិក្ខារផ្ទៃក្នុង យើងសម្អាតដោយមិនចាំបាច់រុះរើកម្រាលអ្វីទាំងអស់»។
កំពុងមមាញឹកក្នុងការបាញ់ផ្សែងចំហាយក្នុងបរិវេណរថយន្ដលោក ប៊ុនថន បានបន្ដថា វាមានអត្ថប្រយោជន៍ ដែលកម្រាលកម្ញីប្រឡាក់សារធាតុមិនល្អនិងជាប់ក្លិនផ្ដុះផ្អួរដោយមិនធ្វើឲ្យបរិក្ខារសើមទឹក ដូចជាការបោកពូកជាមួយទឹក ដែលធ្វើឲ្យមានការបារម្ភពីការហាលមិនស្ងួតពេលដាក់ចូលវិញ មានក្លិនផ្អួរផ្អាប់។
ខុសពីការបោកពូកដែលចំណាយពេលរហូតដល់ ៣ ទៅ ៤ ថ្ងៃ ការស្ទីមដោយប្រើចំហាយទឹកត្រូវការពេលវេលាត្រឹមតែ ៣ ម៉ោងរួមទាំងការសម្អាតទាំងម៉ាស៊ីន និងផ្ទៃក្នុងទោះចំថ្ងៃភ្លៀងក៏ដោយ។
បច្ចេកទេសថ្មីអាចសម្អាតដោយមិនបាច់រុះរើរថយន្ត។ ផា លីណា
ក្រៅពីការស្ទីមសម្អាតធូលី និងស្នឹម លោកនៅមានការប្រើប្រាស់វិធីសាស្ដ្រអប់រថយន្ដ តាមរយៈម៉ាស៊ីនសម្លាប់បាក់តេរី និងមេរោគ រួចបន្សុទ្ធជាបរិស្ថានស្អាតឡើងវិញ។
ម្ចាស់មីស្ទ័រ ស្ទីម ដែលផ្ដល់សេវាកម្មស្ទីមរថយន្ដដំបូងបំផុតនៅកម្ពុជា បានឲ្យដឹងថា៖ «វាជាប្រភេទផ្សែងហុយដែលបាញ់ចូលគ្រប់រន្ធកន្លុកកន្លៀតទៅសម្លាប់បាក់តេរី និងមេរោគ ដែលតោងជាប់ផ្នែកខាងក្នុងរថយន្ដ»។
លោក ប៊ុនថន បានអះអាងថា ការស្ទីម និងអប់រថយន្ដ គឺជាជម្រើសសម្រាប់ប្រភេទរថយន្ដគ្រួសារ ដោយមិនប្រើសារធាតុមេ ដែលមិនបារម្ភពីការពុកច្រែះ។
គួរបញ្ជាក់ថា សេវាកម្មស្ទីម បូកប៉ូលា ៤ ប្រភេទ (ប៉ូលាកាត់ស្នាមឆ្កូត ប៉ូលាដំណាក់កាលទី ២ ប៉ូលាបង្កើតពន្លឺរលោង និងលាបប៉ូតាស្យូម) មានតម្លៃចាប់ពី ១១៩ ដុល្លារ ១៣៩ ដុល្លារ និង ១៤៩ ដុល្លារ ដោយអាស្រ័យទៅតាមប្រភេទរថយន្ដ។
លោកបានប្រាប់ថា ពេលរថយន្ដត្រូវបានសម្អាត និងកម្ចាត់បាក់តេរីពីបរិវេណខាងក្នុង អ្នកអង្គុយក្នុងរថយន្ដទទួលបានអារម្មណ៍ផាសុកភាព និងសុខភាពល្អ។
មីស្ទ័រ ស្ទីម មានទីតាំងជិតវត្តស្រះចកលើផ្លូវ ៦៥ ចម្ងាយ ១០០ ម៉ែត្រពីខ្លោងទ្វារវត្ត ឬទូរស័ព្ទ ០១២ ៨៥៥ ០៩៨ និង ០៩៣ ៨៥៥ ០៩៨៕
