.jpg)
លោកស្រី យឹម ឆៃលីន ស្ត្រីខ្មែរចូលរួមក្នុងមហោស្រពភាពយន្តទីក្រុងកាន។ រូបថត អ៊ីនស្តាក្រាម
ភ្នំពេញ: ឈុតសម្លៀកបំពាក់ប្រណីតៗលើកម្រាលព្រំក្រហមដែលគ្រងដោយតារាហូលីវូដ ផលិតករល្បីៗ និងភ្ញៀវកិត្តិយសដ៏មានឥទ្ធិពលមកពីជុំវិញពិភពលោកនៅកម្មវិធីមហោស្រពខ្សែភាពយន្តទីក្រុងកានត្រូវបានទស្សនាវដ្តីហ្វេសសិនដ៏ល្បី Vogue អូស្ត្រាលីជ្រើសរើសយកមកបង្ហាញដោយផ្ដោតលើភាពប្រណីត និងឡូយអស្ចារ្យជាងគេបំផុតប្រចាំឆ្នាំ ២០១៩។
អត្ថបទភ្ជាប់ដោយរូបភាពដែលចុះផ្សាយដោយ Vogue អូស្ត្រាលីកាលពីថ្ងៃទី ២១ ខែឧសភាទស្សនាវដ្តីនេះបានរំលេចសំណេរភ្ជាប់នូវរូបភាពតារាល្បីៗ និងភ្ញៀវកិត្តិយស ដោយសម្រាំងយកតែអ្នកតែងខ្លួនប្រណីតស្អាតជាងគេលើកម្រាលព្រំក្រហម (One of the most glamorous red carpets of the year)។
ក្នុងចំណោមរូបថតស្ត្រីស្លៀកពាក់លេចធ្លោជាងគេទាំងនោះក៏មានវត្តមានស្ត្រីខ្មែរដំបូងដែលមានវត្តមាននៅមហោស្រពភាពយន្តទីក្រុងកានគឺលោកស្រី យឹម ឆៃលីន ភរិយារបស់លោក ហ៊ុន ម៉ានី។
ស្ទីលតែងកាយដែល Vogue អូស្ត្រាលីបានចុះផ្សាយក្នុងគេហទំព័រ។
ឈរលើកម្រាលព្រំក្រហមដែលហ៊ុមព័ទ្ធដោយកាមេរ៉ាគ្រប់មុំ អ្នកម្ដាយកូន ៣ រូបនេះបានរំលេចនូវឈុតរ៉ូបប៉ាក់ឌិន គ្របដោយអាវរោមសក្បុសយ៉ាងប្រណីតពី Atelier Versace Couture Collection អមដោយអលង្ការក្រវិលរំយោលម៉ូដទឹកធ្លាក់ និងម៉ូដសក់វែកចំហៀងបែបហ្វេសសិនលំដាប់ខ្ពស់ដែលធ្វើឲ្យទស្សនាវដ្ដី Vogue អូស្ត្រាលីរំលេចក្នុងបញ្ជីនារីតែងកាយប្រណីតស្អាតបំផុតក្នុងមហោស្រពក្រុងកានប្រចាំឆ្នាំ ២០១៩។
ចំណោមអ្នកតែងកាយស្រស់ស្អាតជាងគេនោះដែរក៏មានតារាហូលីវូដ នាង សេលេណា ហ្គោមេស ក្នុងឈុតអាវ និងសំពត់ពណ៌សម៉ាក Louis Vuitton តារាសម្ដែង ជូលីយ៉ាណា ម័រ ស្លៀករ៉ូបបៃតង Christian Dior តារាភាពយន្តអេស្ប៉ាញ ភេណាឡូផេ គ្រើសហ្ស៍ ក្នុងម៉ូដរ៉ូបពណ៌ស-ខ្មៅពី Chanel តារាភាពយន្តកូនកាត់អង់គ្លេស-ថៃ ឆុំភូ អារ៉ាយ៉ា តារាចិន ហ្គុង លី ជាដើម។
វត្តមានរបស់លោកស្រី យឹម ឆៃលីន ជាស្ត្រីខ្មែរចូលរួមមហោស្រពភាពយន្តទីក្រុងកានលើកទី ៧២ ដែលប្រព្រឹត្តទៅចំនួន ២ សប្ដាហ៍ចាប់ពីថ្ងៃទី ១៤ ខែឧសភាបានក្លាយជាព័ត៌មានដ៏គួរឲ្យចាប់អារម្មណ៍ក្នុងបណ្ដាញសង្គមហ្វេសប៊ុក និងអ៊ីនស្តាក្រាមដោយលោកស្រីមានអ្នក follow រហូតដល់ 65.9K។
លោកស្រី ម៉ម សុម៉ាលី ស្ថាបនិកអង្គការ អាហ្វីស៊ីប ដែលមានលោកស្រី យឹម ឆៃលីន ជាអគ្គរាជទូតសុឆន្ទៈអស់ជាង ១ ទសវត្សរ៍នោះបានឲ្យដឹងតាមរយៈសំណេរក្នុងហ្វេសប៊ុកថា៖ «ការងារមនុស្សធម៌របស់លោកជំទាវត្រូវបានល្បីទូទាំងពិភពលោក។ គាត់គឺជាអគ្គរាជទូតសុឆន្ទៈរបស់ Together1heart និងអង្គការ Afesip Cambodia ជាង ១០ ឆ្នាំមកនេះលោកបានចំណាយពេលវេលា និងថវិកាផ្ទាល់ខ្លួន ដើម្បីជនរងគ្រោះ ហើយលោកក៏ត្រូវបានអញ្ជើញជាកិត្តិយសក្នុងមហាពិធីពិភពលោកនេះ»។
ស្ថាបនិកអង្គការមើលថែទាំក្មេងកំព្រា និងរងគ្រោះពីអំពើរំលោភសេពសន្ថវៈរូបនេះបានលើកឡើងទៀតថា៖ «មិនធម្មតាទេ ថ្ងៃនេះលោកជំទាវ យឹម ឆៃលីន ហ៊ុន ម៉ានី បានបង្ហាញភាពស្រស់ស្អាតជាមួយឈុតក្រហមធ្វើដំណើរលើកម្រាលព្រំយ៉ាងស្រស់ស្អាតប្រកបដោយភាពជឿជាក់នៅទីក្រុងកានធ្វើឲ្យមនុស្សទាំងពួងសរសើរពីសម្រស់ និងភាពមនុស្សធម៌របស់គាត់មិនដាច់ពីមាត់។ ក្នុងនាមជាស្ត្រីខ្មែរ នាងខ្ញុំពិតជារំភើបណាស់។ គាត់បានធ្វើឲ្យប្រជាជន ពិសេសសម្រស់នារីខ្មែរល្បីពេញពិភពលោក។ អ្នកណាថាស្ត្រីខ្មែរអន់? ស្អាត ឆ្លាត ចិត្តធម៌ ទន់ភ្លន់ ប៉ុន្តែម៉ឺងម៉ាត់»៕
