.jpg)
គំនូរអាយុកាលជិត ៤៤ ០០០ ឆ្នាំមុន ត្រូវបានរកឃើញនៅឥណ្ឌូនេស៊ី។ រូបថត AFP
ក្រុងហ្សាការតា៖ គំនូរល្អាងថ្មនៅឥណ្ឌូនេស៊ី ដែលរំលេចទិដ្ឋភាពប្រមាញ់សត្វកាលពីបុរេប្រវត្ដិ អាចជាស្នាដៃសិល្បៈចាស់បំផុតក្នុងលោកដែលបន្សល់ទុកតាំងពីជិត ៤៤ ០០០ ឆ្នាំមុន ដោយបានឆ្ពោះទៅកាន់វប្បធម៌សិល្បៈជឿនលឿន។ នេះបើយោងតាមការស្រាវជ្រាវថ្មី។
ការស្រាវជ្រាវដែលចុះផ្សាយក្នុងទស្សនាវដ្ដី Nature កាលពីថ្ងៃពុធ បានបង្ហាញពីការប្រទះឃើញកាលពី ២ ឆ្នាំមុន នៅប្រជុំកោះស៊ូឡាវេស៊ី នូវគំនូរទទឹង ៤,៥ ម៉ែត្រ ដែលរំលេចរូបសត្វព្រៃត្រូវបានព្រានពាក់កណ្ដាលមនុស្សប្រដេញដោយកាន់អាវុធដែលទំនងជាលំពែង និងខ្សែ។
ដោយប្រើប្រាស់បច្ចេកវិទ្យាកំណត់អាយុកាល ក្រុមការងារជំនាញមកពីសាកលវិទ្យាល័យ Griffith University ប្រទេស អូស្ដ្រាលី បានឲ្យដឹងថា ពួកគេបានអះអាងថា គំនូរល្អាងភ្នំថ្មកំបោរមានអាយុកាលយ៉ាងតិច ៤៣ ៩០០ ឆ្នាំ អំឡុងយុគសម័យថ្មរំលីងចុងក្រោយ ឬ Upper Paleolithic។
ក្រុមស្រាវជ្រាវបាននិយាយថា៖ «ចំពោះការសន្និដ្ឋានរបស់យើង ទិដ្ឋភាពប្រមាញ់សត្វនេះជាកំណត់ត្រាដំណើររឿងបែបរូបភាពចុងក្រោយបំផុត និងជាស្នាដៃសិល្បៈគំនូរមុនដំបូងគេបំផុតក្នុងលោក»។
ការរកឃើញនេះត្រូវបានធ្វើឡើងក្រោយពីគំនូរសត្វនៅក្នុងល្អាងលើប្រជុំកោះបូណេអូ ប្រទេស ឥណ្ឌូនេស៊ី ត្រូវបានកំណត់អាយុកាលយ៉ាងតិច ៤ ម៉ឺនឆ្នាំ ។
រយៈពេលជាច្រើនឆ្នាំ សិល្បៈគំនូរល្អាង ត្រូវបានគេជឿថា បានផ្សារភ្ជាប់ពីអឺរ៉ុប តែគំនូរជាច្រើននៅឥណ្ឌូនេស៊ីហាក់មានលក្ខណៈប្លែក។
យ៉ាងតិច ២៤២ ល្អាង ឬជម្រករំលេចនូវរូបភាពនានា គ្រាន់តែលើដែនកោះស៊ូឡាវេស៊ីតែមួយ ហើយកន្លែងថ្មីៗត្រូវបានរកឃើញរៀងរាល់ឆ្នាំ៕ AFP/HR
