.jpg)
តារាសម្តែងប្រុសរូបសង្ហាលោក ខាត់ វៃហាំង ក៏ត្រូវបានវិចិត្រកររៀនគ្មានសាលា កែវ វិចិត្រ គូរផងដែរ។ សហការី
ភ្នំពេញ៖ មហាជនមានការចាប់អារម្មណ៍ និងលាន់មាត់សរសើរខ្លាំង ខណៈឃើញរូបក្រុមតារាចម្រៀង និងតារាសម្តែងប្រុសស្រីល្បីៗជាច្រើនមកពីផលិតកម្មផ្សេងៗគ្នា ត្រូវវិចិត្រករ មានទេពកោសល្យតាំងពីកំណើត មិនធ្លាប់ចូលរៀនសាលាសិល្បៈសោះ បានប្រើទេពកោសល្យផ្ទាល់ខ្លួនជាចំណូលចិត្តដែលជះឥទ្ធិពលតពីប៉ារបស់លោកហើយដកពិសោធន៍ដោយខ្លួនឯងលោក កែវ វិចិត្រ គូររូបយ៉ាងស្រស់ស្អាត និងមានលក្ខណៈសឹងតែដូចទាំងស្រុង ដោយគ្រាន់តែប្រើបច្ចេកវិទ្យាទំនើបគូររូបតាមកុំព្យូទ័រ។
ក្រុមតារាដែលគេឃើញគូរនោះរួមមាន អ្នកនាង មាស សុខសោភា អ្នកនាង ឱក សុគន្ធកញ្ញា អ្នកនាង ពេជ្រ សោភា កញ្ញា រ៉េត ស៊ូហ្សាណា កញ្ញា ប៉ាច គឹមមួយ លោក Step លោក ឆន សុវណ្ណារាជ លោក ងួន ចាន់ដេវីត កញ្ញា ទេព បូព្រឹក្ស លោក ដួង វីរៈសិទ្ធ កញ្ញា សុខ ពិសី លោក ម៉ា ច័ន្ទបញ្ញា កញ្ញា អ៊ីងអ៊ីង កញ្ញា ស៊ិន យូប៊ីន លោក ខាត់ វៃហាំង លោក ឆឹម សក្កដា និងតារាប្រុសស្រីល្បីៗផ្សេងទៀតផងដែរ។
រូបតារាចម្រៀងស្រី ពេជ្រ សោភា ដែលត្រូវបានវិចិត្រករ កែវ វិចិត្រ គូរ ។សហការី
ក្រោយពីបានសម្រេចចិត្តឈប់ធ្វើការងារឲ្យគេយកប្រាក់ខែជាង ១០ ឆ្នាំ ដោយមានអារម្មណ៍ចង់ធ្វើការងារផ្ទាល់ខ្លួននោះ វិចិត្រករគំនូរឌីជីថលកំលោះវ័យ ៣០ ឆ្នាំ លោក កែវ វិចិត្រ ប្រើពេលរៀនតាមវីដេអូយូធូប សិក្សាស្វែងយល់ដោយខ្លួនឯងរយៈពេល ៣ ឆ្នាំ ចន្លោះ ឆ្នាំ ២០១៥-២០១៧ និងចាប់ផ្តើមការងារជាអ្នកគូររូបគំនូរឌីជីថលតាំងពីឆ្នាំ ២០១៧ រហូតបច្ចុប្បន្ន ដោយលោកបានគូររូបក្រុមតារាចម្រៀង តារាសម្តែង ទាំងក្នុងប្រទេសខ្មែរ និងតារាក្រៅស្រុក។
លោក វិចិត្រ ក៏បង្ហើបឲ្យដឹងហេតុផលគូររូបក្រុមតារាល្បីៗនោះថា៖ «ដោយពួកគាត់ គឺជាអ្នកល្បីក្នុងសង្គមសិល្បៈ ហើយខ្ញុំយល់ថា កាលណាយើងគូររូបពួកគាត់ទៅ ស្នាដៃរបស់ខ្ញុំនឹងឆាប់មានគេស្គាល់ច្រើនតាមរយៈរូបពួកគាត់ដែរ។ ក្រុមតារាចម្រៀង និងតារាសម្តែងទាំងអស់នោះ ខ្ញុំបានគូររូប Free ជូនដល់ពួកគាត់ ខណៈមួយចំនួនខ្ញុំបានជូនផ្ទាល់ និងមួយចំនួនមិនបានជូនផ្ទាល់ដោយសារតែខ្ញុំគ្មានពេលទំនេរអាចនាំយកទៅជូនពួកគាត់ ក៏ព្រោះជាប់រវល់គូររូប»។
ជាទូទៅ ស្នាដៃគំនូរឌីជីថលរបស់លោក កែវ វិចិត្រ មានច្រើនសណ្ឋាន អាចកុម្ម៉ង់តាមចំណូលចិត្តម្ចាស់រូបបាន ខណៈមានចំនួន ២០ ខ្នាត ដែលតម្លៃចន្លោះពី ៥ ដុល្លារ រហូតដល់តម្លៃ ៣០ ដុល្លារ ចំពោះគំនូរឌីជីថល តែប្រើពេលវេលាគូរវិញតិចបំផុត ១ ថ្ងៃ និងច្រើនបំផុត ៣ ថ្ងៃ សម្រាប់ស្នាដៃគំនូរ ១ ផ្ទាំង។
លោក វិចិត្រ បញ្ជាក់ថា៖ «សម្រាប់គំនូរឌីជីថលខ្ញុំ គឺគិតជារូបមនុស្ស ដែលកំណត់យកថ្លៃសេវាកម្ម គឺគិតចំនួនមនុស្សតែម្តង ដែលមានតម្លៃចន្លោះពី ៥ ដុល្លារ សម្រាប់គំនូរធម្មតាមានពណ៌សខ្មៅ ដោយត្រូវចំណាយពេលតែ ១ ថ្ងៃ និងតម្លៃ ៣០ ដុល្លារ ជាគំនូរមានពណ៌ធម្មជាតិចម្រុះ ដោយចំណាយពេលគូរ ២-៣ ថ្ងៃ ។ សម្រាប់ ១ ខែ ខ្ញុំអាចគូររូបបានចន្លោះពីចំនួន ១០ ផ្ទាំង ទៅ ២០ ផ្ទាំង គឺអាស្រ័យតាមប្រភេទគំនូរ»៕
