.jpg)
គំនូរ 3D ជាសត្វនានា ស្នាដៃរបស់វិចិត្រករ ណាក់ ណាង តាមហាងស៊ុបចង្កាក់។ សហការី
ភ្នំពេញៈ ប្រសិនបើក្រឡេកទៅក្រោយប្រមាណ ១០ ឆ្នាំមុននេះ ទៅមើលពីអ្វីជាទីផ្សាររបស់ក្រុមវិចិត្រករ ដែលចាប់រៀនចំណេះជំនាញវិចិត្រកម្មនោះ ឃើញថាមានភាពយ៉ាប់យ៉ឺនខ្លាំង សឹងតែលែងមានមនុស្សជំនាន់ក្រោយមកក្រេបជញ្ជក់រៀនទៀតក៏ព្រោះកង្វះការលើកទឹកចិត្ត និងឲ្យតម្លៃ។
ដោយសារតែក្តីស្រឡាញ់នឹងជំនាញវិចិត្រកម្មប្រកបដោយការតស៊ូ និងក្តីអំណត់ខ្លាំងពីសំណាក់វិចិត្រករវ័យ ៣៥ ឆ្នាំ ណាក់ ណាង មិនអង្រួនចិត្តឲ្យចុះញ៉មដាក់ជក់ចោលពីពិភពគំនូរនោះឡើយ ទើបរយៈពេល ៣-៤ ឆ្នាំចុងក្រោយនេះបណ្តុំស្នាដៃគំនូរ 3D ដូចជារូបគំនូរបន្លែ ផ្លែឈើ សត្វក្ងោក សត្វត្រី ក្រុមកងយោធា មនុស្សអវកាស ជាដើមនោះ បាននិងកំពុងទាក់ទាញចំណាប់អារម្មណ៍ពីម្ចាស់ហាងទាំងតូចទាំងធំក្នុងគោលបំណងរកវិធីសាស្ត្រតុបតែងលម្អហាងខ្លួនឲ្យស្រស់ស្អាតដោយស្នាដៃគំនូរ។
វិចិត្រករបានបញ្ចប់ការសិក្សាវិចិត្រកម្មពីសាកលវិទ្យាល័យភូមិន្ទវិចិត្រសិល្បៈតាំងពីឆ្នាំ ២០០៨ មានស្រុកកំណើតមកឃុំផ្អាវ ស្រុកបាធាយ ខេត្តកំពង់ចាម ជាបងប្រុសទី ២ របស់តារាសម្តែង និងពិធីការិនីរូបស្រស់សោភា រាងស្រលូន ប្រចាំនៅឯប៉ុស្តិ៍ទូរទស្សន៍អាស៊ីអាគ្នេយ៍កញ្ញា ណាក់ ស្រីណា នោះក៏បានបង្ហើបឲ្យដឹងពីភាពកាក់កបលើទីផ្សារនៃគំនូរ 3D របស់លោកនៅតាមហាងនានាក្នុងទីក្រុងភ្នំពេញផងដែរ។
លោកថ្លែងថា៖ «សម្រាប់រូបខ្ញុំ ចំពោះការបង្កើតស្នាដៃគំនូរមិនប្រកាន់នោះទេ ឲ្យតែអតិថិជនគាត់ពេញចិត្ត ប្រភេទគំនូរអ្វី ក៏ទទួលគួរជូនបានទាំងអស់។ តែប៉ុន្មានឆ្នាំចុងក្រោយនេះ ប្រភេទគំនូរ 3D ហាក់មានការចាប់អារម្មណ៍យ៉ាងខ្លាំងពីសំណាក់ម្ចាស់អាហារដ្ឋាននានានៅក្រុងភ្នំពេញយើង។ គំនូរ 3D ទាំងនេះពេញនិយមនៅតាមហាងស៊ុបចង្កាក់ ហាងមីហឹរ និងហាងកាហ្វេជាដើម ខណៈរូបខ្ញុំទទួលផ្តាច់មុខខាងគំនូរ 3D នៅហាងស៊ុបចង្កាក់ ដោយបានគូរឲ្យជាង ៤០ ហាងរួចមកហើយ។ ឯហាងមីហឹរវិញ ក៏បានគូរជាង ១០ ហាង ហើយ ដូចជាតាមហាងកាហ្វេដែរ»។
គំនូរ 3D ក្រុមកុម្ម៉ង់ដូយោធា តាមហាងស៊ុបចង្កាក់។ សហការី
វិចិត្រករវ័យ ៣៥ ឆ្នាំរូបនេះ ក៏ប្រៀបធៀបពីការផ្លាស់ប្តូរនូវផ្នត់គំនិតរបស់អ្នកគាំទ្រលើស្នាដៃគំនូរវិចិត្រករដែរថា៖ «នាប៉ុន្មានប្រហែលជា ៣-៤ ឆ្នាំចុងក្រោយនេះ ក្រុមវិចិត្រករយើងហាក់មានទីផ្សារល្អគ្រាន់បើជាងកាលពី ១០ ឆ្នាំមុន ដោយសារស្នាដៃយើងត្រូវបានបងប្អូនខ្មែរគាំទ្រ និងឲ្យតម្លៃច្រើន ព្រោះតែមានការយល់ដឹងពីតម្លៃនៃសិល្បៈគំនូរមួយនេះ ខណៈកាលពីមុនដោយសារពួកគាត់នៅពុំទាន់យល់ពីតម្លៃរបស់វា។ កាលណាមានគេឲ្យតម្លៃច្រើន រាល់ស្នាដៃ ដែលវិចិត្រករខិតខំគូរនោះ ក៏មានតម្លៃទៅតាមទឹកដៃរៀងៗខ្លួន និងអាចរកប្រាក់ចំណូលបានគួរសម ហើយថែមទាំងជំរុញឲ្យក្រុមវិចិត្រករនាំគ្នារិះរកវិធីសាស្ត្រយ៉ាងណាកែច្នៃបានជាគំនិតថ្មីក្នុងវិស័យមួយនេះផងដែរ។ ចំពោះតម្លៃគំនូរ 3D នៅឯតាមហាងនានា នឹងមានតម្លៃអាស្រ័យតាមទំហំតូច ឬធំ និងប្រភេទបណ្តុំទេសភាព ដែលម្ចាស់ហាងគាត់ចង់បាន។ ចំណែកពេលវេលាគូរវិញ សម្រាប់ខ្ញុំប្រសិនបើគំនូរ ត្រូវបានខ្ញុំដឹងស្ថានភាពនៃការចង់បានពីម្ចាស់ហាងជាមុនហើយនោះ លឿនបំផុតអាចចំណាយពេលគូរត្រឹមតែ ៣ ឬ ៤ ថ្ងៃ ខណៈពេលយូរបំផុតប្រើពេល ១ សប្តាហ៍»។
ក្រៅពីមានភាពមមាញឹកទៅនឹងការងារប្រកបរបរចិញ្ចឹមជីវិតក្នុងអាជីពជាវិចិត្រករនោះលោកក៏ឆ្លៀតផ្ទេរចំណេះដឹងផ្នែកវិចិត្រកម្មនេះទៅឲ្យក្រុមកុមារកំព្រាឥតគិតថ្លៃ នៅឯស្រុកកំណើតរបស់លោកក្នុងខេត្តកំពង់ចាមផងដែរ។
លោក ណាក់ ណាង បន្ថែមថា៖ «រៀងរាល់ថ្ងៃសៅរ៍ និងថ្ងៃអាទិត្យ ខ្ញុំទៅបង្រៀនក្មេងៗដែលកំព្រានៅបណ្ណាល័យមួយក្នុងវត្តចន្ទមូលី នៅឃុំផ្អាវ មិនគិតថ្លៃទេ សម្រាប់អ្នកចូលចិត្តនិងស្រឡាញ់ជំនាញនេះ ដើម្បីជួយពួកគាត់មានច្រើនក្រុមគឺ មួយក្រុមមានគ្នាប្រហែលពី ២០ ទៅ ៣០ នាក់»៕
