.jpg)
បំពង់ឫស្សីច្នៃជាវត្ថុុសិល្បៈសហសម័យ ដើម្បីផ្សព្វផ្សាយការកាត់បន្ថយប្លាស្ទិក និងការច្នៃប្រឌិត។ សហការី
ក្រុងបាត់ដំបង៖ ក្រោយពីបញ្ចប់ជំនាញសិល្បៈសូនរូបនៅសាលាហ្វារពន្លឺសិល្បៈមក ក៏ជំរុញទឹកចិត្តវិចិត្រករវ័យ ៣០ ឆ្នាំ លោក កែវ សុបិណ្ឌ និងលោក នៅ សុខបញ្ញា បានសហការគ្នាបង្កើតនូវគំនិតច្នៃប្រឌិតថ្មីមួយ ដែលរំលេចគំនូរក្បូរក្បាច់ចម្រុះ តាមរយៈស្នាដៃកែវទឹក និងគោមភ្លើង កែច្នៃពីបំពង់ឫស្សី។
លោក កែវ សុបិណ្ឌ មានស្រុកកំណើតស្រុកបាណន់ ខេត្តបាត់ដំបង បង្កើតស្នាដៃច្នៃប្រឌិតថ្មី គឺជាវិចិត្រកម្មសហសម័យ ដែលរចនាក្បាច់ក្បូរគំនូរចម្រុះលើបំពង់ឫស្សី ជាមួយនឹងមិត្តភក្តិម្នាក់ទៀត គឺលោក នៅ សុខបញ្ញា ក៏បានដាក់តាំងបង្ហាញនៅក្នុងកម្មវិធីពិព័រណ៍ស្នាដៃចម្រុះ មានការសម្តែងរបាំ សៀក បង្ហាញម៉ូដ និងស្នាដៃសិល្បៈនានា ដែលរៀបចំឡើងលើកដំបូង ដោយក្រុមអ្នកសិល្បៈចម្រុះជំនាញ ចំនួន ២ ថ្ងៃ នៅលើកំណាត់ផ្លូវ ២.៥ ក្រុងបាត់ដំបង ខេត្តបាត់ដំបងនោះ កាលពីថ្ងៃទី ២១-២២ ខែធ្នូ ឆ្នាំ ២០១៩ កន្លងមកនោះផងដែរ។
វិចិត្រករ កែវ សុបិណ្ឌ បានបង្ហើបពីការច្នៃបំពង់ឫស្សីជាវត្ថុសិល្បៈសហសម័យនេះ នៅក្នុងគោលបំណង ៣ យ៉ាងថា៖ «ទី១ គឺចង់ផ្សព្វផ្សាយពីការកាត់បន្ថយប្រើប្រាស់គ្រឿងប្លាស្ទិក ដូចជាការប្រើកែវទឹក ពីប្លាស្ទិកជាដើម ហើយនេះគឺជាការកាត់បន្ថយការប្រើប្រាស់ប្លាស្ទិកមករកការកែច្នៃនូវឧបករណ៍នានាពីធម្មជាតិ ដើម្បីឲ្យជីវិតរស់នៅជាមួយបរិស្ថានស្អាតទាំងអស់គ្នា។ ទី២ ចង់បង្ហាញពីគំនិតកែច្នៃរបស់ធម្មជាតិ ដែលអាចទាញយកមកប្រើប្រាស់បានឲ្យអស់លទ្ធភាព។ ខណៈនេះគឺជាការស្វែងយល់ពីចំណុចល្អនៃទំនាក់ទំនងជីវិតជាមួយនឹងធម្មជាតិ ដើម្បីធ្វើឲ្យបរិស្ថានពិភពលោកមានលំនឹងសម្រាប់យើងទាំងអស់គ្នា។ ចំណុចទី ៣ គឺចង់បញ្ចូលនូវស្នាដៃសិល្បៈ ដែលរំលេចជាក្បាច់ក្បូរនានាបែបសហសម័យចេញពីការច្របាច់បញ្ចូលគ្នារវាងសិល្បៈបុរាណ និងទំនើបនោះ»។
វិចិត្រករ កែវ សុបិណ្ឌ និងលោក បញ្ញា នឹកឃើញគំនិតច្នៃបំពង់ឫស្សីជាសិល្បៈសហសម័យ។ សហការី
ការបង្កើតស្នាដៃសិល្បៈសហសម័យថ្មី ដោយការច្នៃបំពង់ឫស្សីជាលើកដំបូងនេះ វិចិត្រករ លោក កែវ សុបិណ្ឌ និងលោក នៅ សុខបញ្ញា គ្រាន់តែបង្កើតឡើង ដើម្បីបង្ហាញពីស្នាដៃច្នៃប្រឌិតខ្លួនឲ្យមហាជនបានស្គាល់ ជាមួយនឹងគម្រោងស្នាដៃច្នៃ ២ ប្រភេទ គឺកែវទឹក និងបំពង់ភ្លើងគោម ច្នៃពីបំពង់ឫស្សី ដែលរំលេចជាក្បាច់ក្បូរសិល្បៈចម្រុះបែបសហសម័យតែប៉ុណ្ណោះ។
វិចិត្រករ កែវ សុបិណ្ឌ (Keo Sobinn) ក៏បានបញ្ជាក់ដែរថា៖ «ដំបូងនេះ ខ្ញុំ និងបញ្ញា គ្រាន់តែ ចង់បង្កើតស្នាដៃដើម្បីដាក់ផ្សព្វផ្សាយឲ្យមហាជនបានស្គាល់សិន ជាមួយនឹងការបង្កើតកែវទឹកពីឫស្សី និងគោមភ្លើងពីបំពង់ឫស្សី ដោយយើងសុទ្ធតែប្រើការរំលេចជាក្បាច់ក្បូរសិល្បៈចម្រុះបញ្ចូលគ្នារវាងសិល្បៈបុរាណ និងទំនើប ដែលបច្ចុប្បន្ន យើងនិយមហៅថាសិល្បៈបែបសហសម័យនោះឯង។
ក្រោយពីស្នាដៃយើងទទួលបានការគាំទ្រ និងស្គាល់ពីតម្លៃនៃសិល្បៈកែច្នៃមួយនេះ យើងក៏មានគម្រោងបង្កើតវាជាការលក់ស្នាដៃវិចិត្រកម្មផងដែរ ដើម្បីទ្រទ្រង់ជីវភាព និងខិតខំស្រាវជ្រាវលើទម្រង់សិល្បៈសហសម័យនៅលើបំពង់ឫស្សីនេះ ឲ្យមានលក្ខណៈសម្បូរបែបបន្ថែមទៀត»៕
