ក្រុងញូវយ៉ក៖ លោកអាចារ្យថ្លែង ខណៈគូស្នេហ៍ចំណាស់អាមេរិកដែលបានឃើញភ្លាម ស្រឡាញ់ភ្លែត និងប្រញាប់ចូលរោងការទាន់ហន់នៅថ្ងៃព្រហស្បតិ៍ថា៖ «អ្នកទាំង ២ អាចដោះម៉ាស់ និងថើបគ្នាបាន»។
អ្នកស្រី លីនដា ឌែក អាយុ ៧២ ឆ្នាំ បាននិយាយពេលដើរក្រៀកដៃស្វាមី អាឌែល ហូវេសលែន អាយុ ៧៨ ឆ្នាំ ថា៖ «ក្នុងកាលៈទេសៈធម្មតា យើងនៅតែស្រឡាញ់គ្នា»។
ប៉ុន្ដែកូរ៉ូណាបានបង្ខំពួកគេឲ្យពន្លឿនចំណងស្នេហា ខណៈទំនាក់ទំនងពួកគេនៅក្មេងខ្ចីនៅឡើយ។ អ្នកទាំង ២ ដែលបានបាត់បង់ដៃគូចាស់រៀងៗខ្លួនក្នុងឆ្នាំ ២០១៩ បានជួបគ្នាដំបូងកាលពីចុងខែកុម្ភៈ នៅព្រះវិហារ Peace Lutheran ក្បែរក្រុងវ៉ាស៊ីនតោន។
អ្នកស្រី ឌែក ថា៖ «យើងជួបគ្នាពេលទទួលទាននំនៅក្នុងព្រះវិហារ»។ ពួកគេយល់ព្រមរួមអាហារជាមួយគ្នា ហើយ ២ ថ្ងៃបន្ទាប់ពីអាជ្ញាធរមូលដ្ឋានបានអំពាវនាវឲ្យពលរដ្ឋកុំចេញក្រៅផ្ទះ ដើម្បីទប់ស្កាត់ការរីករាលដាលនៃជំងឺកូវីដ ១៩។
គូស្នេហ៍ថ្មី វ័យចាស់ទាំង ២ មិនគិតស្រមៃថា ខ្លួននឹងបំពានបទប្បញ្ញត្ដិសោះឡើយ។ លោក ហូវេសលែន ឲ្យដឹងថា៖ «យើងទាំង ២ ដឹងរៀងខ្លួនថា យើងត្រូវការគូជីវិត»។
ដោយមិនគិតវែងឆ្ងាយ អ្នកស្រីក៏រើមករួមរស់ជាមួយលោកភ្លាមៗ។ អ្នកស្រី ជាអតីតអ្នកវាយតម្លៃកម្មវិធីសិក្សានៃសាកលវិទ្យាល័យ Gallaudet បន្ដថា៖ «ពិភពលោកពិតជាមានពណ៌ផ្កាឈូកសម្រាប់ពួកយើង»។
លោក ហូវេសលែន បន្ថែមថា៖ «វាជាការសម្រេចប្រកបដោយគ្រោះថ្នាក់ តែពួកយើងមិនចង់រស់នៅឯកាឡើយ»។
គូស្នេហ៍ទាំង ២ ប្រតិបត្ដិតាមកម្មវិធីបែបប្រញាប់ប្រញាល់។
លោកបន្តថា៖ «ខ្ញុំនិយាយថា តើអូនស្នើបងឲ្យសុំអូនរៀបការជាមួយមែនទេ?»៕ AFP