The Phnom Penh Post Search

Search form




Logo of Phnom Penh Post newspaper Phnom Penh Post - ស្រណោះ​សាលា​តន្ត្រី ផ្ដល់​ឱកាស​រៀន​ឥត​គិតថ្លៃ​ដល់​អ្នកមាន​សំឡេង​ល្អ ៣០ នាក់




ស្រណោះ​សាលា​តន្ត្រី ផ្ដល់​ឱកាស​រៀន​ឥត​គិតថ្លៃ​ដល់​អ្នកមាន​សំឡេង​ល្អ ៣០ នាក់

Content image - Phnom Penh Post
គ្រូ​ព្យ៉ាណូ រ៉ុង សេរីវណ្ណ លោក សូ ស្រណោះ និង​អ្នកនាង គីម គ្រូ​បង្រៀន​ច្រៀង​។ ឈឹម ស្រីនាង

ស្រណោះ​សាលា​តន្ត្រី ផ្ដល់​ឱកាស​រៀន​ឥត​គិតថ្លៃ​ដល់​អ្នកមាន​សំឡេង​ល្អ ៣០ នាក់

ភ្នំពេញ: ស្រណោះ​សាលា​តន្ត្រី បាន​រៀបចំ​កម្មវិធី​ប្រកាស​ផ្តល់​អាហារូបករណ៍​ដល់​សិស្ស​ទាំងអស់​ដែល​ស្នេហា​តន្ត្រី​ចម្រៀង​ចំនួន ៣០ នាក់។សិស្សស្រី​ប្រុស​ដែល​មាន​សំឡេង​ច្រៀង​ស្មើ​ល្អ អាច​មាន​ឱកាស​ចូលរៀន​ដោយ​ឥត​គិតថ្លៃ​រយៈពេល ៦ ខែ​នៅ ស្រណោះ​សាលា​តន្ត្រី។

លោក សូ ស្រណោះ នាយក​ស្រណោះ​សាលា​តន្ត្រី និង​បណ្ឌិត​ផ្នែក​ព្យ៉ាណូ​បាន​លើក​ឡើង​ថា៖ «នេះជា​លើក​ទីមួយ​ហើយ​ដែល​ខាង​សាលា​របស់​ខ្ញុំ​ផ្តល់​អាហារូបករណ៍​សិក្សា​ផ្នែក​តន្ត្រី​ចម្រៀង​ដល់​សិស្សានុ-សិស្ស​ចំនួន ៣០ នាក់ ដោយសារ​តែ​មានការ​ស្នើសុំ​ច្រើន និង​មួយ​ទៀត​គឺ​ខាង​យើង​ចង់​ជួយ​កូន​ខ្មែរ​ដែល​គ្មាន​ឱកាស​រៀន​ឲ្យគាត់​ដាក់​ពាក្យ​ប្រឡង​ចូលរៀន​ឥត​គិតថ្លៃ​នៅ​សាលា​របស់​ខ្ញុំ​នេះ»។

យោងតាម​សម្ដី​លោក សូ ស្រណោះ ការផ្តល់​អាហា​រូបករណ៍​នេះ​គឺផ្តល់​ទៅ​លើ​សិស្ស​ស្រី ១៥ នាក់ និង​សិស្ស​ប្រុស ១៥ នាក់។ ម្នាក់ៗ​ត្រូវ​មាន​អាយុ​ពី ១៣ ទៅ ២៥ឆ្នាំ និង​មាន​សំឡេង​ល្អ។

លោក សូ ស្រណោះ បាន​រៀបរាប់​ថា៖ «សំឡេង​របស់​គាត់​ច្រៀង​ទៅ​ស្មើល្អ​ដោយ​មិន​ប្រកាន់​ឋានៈ​ពណ៌​សម្បុរ​នោះ​ទេ ហើយ​ត្រូវ​មក​ទិញ​ពាក្យ​ប្រឡង​ដើម្បី​មាន​ឱកាស​ទទួល​បាន​ការ​បណ្តុះបណ្តាល​ផ្នែក​តន្ត្រី​ចម្រៀង»។

លោក​បាន​បន្ត​ថា៖ «ចំពោះ​អាហារូបករណ៍ ៣០ នាក់​នេះ​បន្ទាប់​ពីរៀន​ចប់​រយៈពេល ៦ ខែ​ហើយ​គឺ​យើង​មានការ​ប្រកួត​ប្រឡង​ជារឿង​សំខាន់​ដែល​ខ្ញុំចង់​ផ្តល់ជូន​គឺ​នៅ​ក្នុង ១៥ នាក់​ដំបូង​គឺយើង​ប្រឡង​យក​សិស្សស្រី​ម្នាក់ និង ១៥ នាក់​ទៀត​ប្រឡង​យក​សិស្ស​ប្រុស​ម្នាក់ សរុប​ទៅ ២ នាក់​ដើម្បី​យក​ទៅ​ប្រកួត​នៅ​កម្មវិធី​ប្រកួត​ខ្នាត​អន្តរជាតិ​នៅ​ប្រទេស​សិង្ហបុរី ដោយការ​ចំណាយ​ទាំងអស់​ខាង​ស្រណោះ​សាលា​តន្ត្រី​ជាអ្នក​ចេញ»។

វគ្គ​សិក្សា​អាហារូបករណ៍​នេះ​គឺរៀន​មួយ​អាទិត្យ ២ ដង នៅ​ល្ងាច​ថ្ងៃ​អង្គារ និង​ពុធ ដោយ​រៀន​អំពី​អក្សរ​ភ្លេង និង​អំពី​បែបបទ​វិធីសាស្ត្រ​នៃការ​ច្រៀង។ លោក​បាន​បន្ថែម​ថា៖ «ការសិក្សា រយៈពេល ៦ ខែនេះ​ប្រសិន​ជា​យើង​គិត​ជា​សាច់ប្រាក់​វិញ​ប្រហែល​ជា ៥ ទៅ ៦ ពាន់​ដុល្លារ​ក្នុង​ម្នាក់»។

ពាក្យ​ប្រឡង​នឹង​ចាប់ផ្តើម​លក់​ចាប់​ពីថ្ងៃ​ទី ២៩ ខែ​សីហា រហូតដល់ ១១ ខែ​កញ្ញា នៅ​សាខា​ទាំង ២ បឹងកេងកង និង​ទួលគោក។ ការប្រឡង​នឹង​ធ្វើ​ឡើង​នៅ​ថ្ងៃទី ២៥, ២៦ និង ២៧ ខែ​កញ្ញា។ ព័ត៌មាន​បន្ថែម ទំនាក់​ទំនង​តាម​ទូរស័ព្ទ​លេខ ០៧៨ ៩០១ ៩០៨៕

Content image - Phnom Penh Post
សិស្សនឹងរៀនពីអក្សរភ្លេង និងបែបបទច្រៀង។ ឈឹម ស្រីនាង

អត្ថបទគួរចាប់អារម្មណ៍