.jpg)
ក្រុងកូឡុំបូ : ក្រុមសង្គ្រោះ និងអ្នកស្ម័គ្រចិត្ដកំពុងតែញាប់ដៃញាប់ជើងកាលពីថ្ងៃចន្ទដើម្បីសង្គ្រោះបាឡែនពីឡុតប្រមាណ ១០០ ក្បាល ដែលជាប់ទើលើឆ្នេរភាគខាងលិចប្រទេសស្រីលង្ការ ដ៏ច្រើនសន្ធឹកសន្ធាប់បំផុតពុំធ្លាប់មាន។
បាឡែនពីឡុត ដែលមានព្រុយខ្លីៗចាប់ផ្ដើមមកប្រមូលផ្ដុំគ្នារយៈពេលខ្លីនៅក្រុងប៉ាណាដូរ៉ា ចម្ងាយប្រមាណ ២៥ គីឡូម៉ែត្រភាគខាងត្បូងក្រុងកូឡុំបូ មុនពេលព្រលប់ ហើយត្រឹមរយៈពេលមួយម៉ោង ហ្វូងបាឡែនបានកើនឡើងប្រមាណ ១០០ ក្បាល។ នេះបើយោងតាមស្នងការប៉ូលិស សាន់ចាយ៉ា អុីរ៉ាស៊ីញ៉េ បានប្រាប់ AFP ដូច្នេះ។
លោក អុីរ៉ាស៊ីញ៉េ បានបន្ដថា៖ «ដោយមានជំនួយពីពលរដ្ឋមូលដ្ឋាន យើងព្យាយាមទាញពួកវាចូលមហាសមុទ្រវិញ។ ប៉ុន្ដែពួកវានៅតែរមៀលឡើងគោក។ យើងបានទទួលជំនួយពីក្រុមទាហានជើងទឹកដើម្បីសង្គ្រោះបាឡែនទាំងនោះ»។
អាជ្ញាធរការពារបរិស្ថានសមុទ្រស្រីលង្ការ (MEPA) ដែលបញ្ជូនមន្ដ្រីរបស់ពួកគេជួយក្នុងប្រតិបត្ដិការសង្គ្រោះ បាននិយាយថា ហ្វូងបាឡែនមួយក្រុមដ៏ច្រើនបំផុតនេះបានមកទើលើប្រទេសនៅតំបន់អាស៊ីខាងត្បូងនេះ។
ដោយមិនច្បាស់អំពីមូលហេតុ ប្រធាន (MEPA) ដាសានី ឡីហានដាពូរ៉ា បានប្រាប់ AFP ថា៖ «វាពិតជាមិនធម្មតានោះទេសម្រាប់វត្ដមានហ្វូងបាឡែនដ៏ច្រើនបែបនេះ។ យើងគិតថា វាស្រដៀងនឹងការជួបជុំនៅប្រទេសតង់ហ្សានី កាលពីកញ្ញាកន្លងទៅ»។
ការឡើងគោកនៃបាឡែនពីឡុត ៤៧០ ក្បាល នៅកំពង់ផែដាច់ស្រយាលនៅដែនកោះនៃរដ្ឋតាស្មានី ភាគខាងត្បូងប្រទេសអូស្ដ្រាលី គឺជាការជួបជុំហ្វូងបាឡែនព្រុយខ្លីទាំងនេះច្រើនបំផុត។
បាឡែនប្រមាណ ១១០ ក្បាល ត្រូវបានសង្គ្រោះក្នុងប្រតិបត្ដិការរយៈពេលពេញមួយថ្ងៃ។ បាឡែនពីឡុត ដែលអាចធំដល់ ៦ ម៉ែត្រ និងទម្ងន់មួយតោន ពិតជារួសរាយបំផុត។
មូលហេតុបង្កឲ្យពួកវាមកទើលើឆ្នេរសមុទ្របែបនេះ នៅតែមិនដឹងច្បាស់ បើទោះបីជាក្រុមអ្នកវិទ្យាសាស្ដ្រកំពុងតែដុតដៃដុតជើងក្នុងការស្រាវជ្រាវយ៉ាងណាក៏ដោយ៕ AFP/HR
