.jpg)
កញ្ញា ថុល ស្រីល័ក្ខណ៍ ទើបតែចេញបទថ្មីនៅផលិតកម្ម Davitra Media។ រូបថត ហ្វេសប៊ុក, តារាចម្រៀងស្រីកំពុងឡើងកូដនៅផលិតកម្ម Davitra Media កញ្ញា ថុល ស្រីល័ក្ខណ៍។ រូបថត សហការី
ភ្នំពេញ៖ តារាចម្រៀងស្រីស្រស់កញ្ញា ថុល ស្រីល័ក្ខណ៍ ដែលធ្លាប់ចូលរួមប្រកួតកម្មវិធី Cambodian Idol រដូវកាលទី២ នាពេលនេះ កំពុងតែឡើងកូដខ្លាំងនៅលើទ្រនំផលិតកម្មថ្មី Davitra Media ខណៈដើមឆ្នាំ ២០២១ នេះ កញ្ញាសម្បូរបទចម្រៀងថ្មីៗជាច្រើនសម្រាប់បំពេអារម្មណ៍ប្រិយមិត្តអ្នកស្តាប់។
ទោះបីមិនទទួលបាននូវជោគជ័យ នាពេលប្រកួតប្រជែងកម្មវិធីចម្រៀងលំដាប់ពិភពលោក The Voice Cambodia និង Cambodian Idol ដើម្បីបំពេញក្តីសុបិននៅលើវិថីសិល្បៈចម្រៀងមែនក្តី តែខណៈពេលនេះកញ្ញា ថុល ស្រីល័ក្ខណ៍ កំពុងតែទាញបានប្រជាប្រិយភាពខ្លាំងពីមហាជន ក្រោយពីបានក្លាយជាតារាចម្រៀងប្រចាំផលិតកម្មថ្មីសន្លាង Davitra Media មក ជាពិសេសតាមរយៈបទមានចំណងជើងថា «ផ្ញើលុយចងដៃ ៨២ ០០០៛» និងដើមឆ្នាំ ២០២១ នេះ មានបទថ្មីដូចជាបទ «បំពេខ្លួនឯង» បទ «ស្រឡាញ់មួយកម្រិតទៀតបងស្លាប់អី?» បទ «ស្រឡាញ់បងអាវផ្កា» បទ «មិនអាចត្រឡប់ទៅអានសៀវភៅចាស់» បទ «តែងខ្លួនកាច់សង្សារចាស់» ដែលកំពុងតែទទួលបានការគាំទ្រខ្លាំង។
តារាចម្រៀងស្រី ទើបមានវ័យ ២២ ឆ្នាំ ដែលអតីតជាបេក្ខនារីធ្លាប់ចូលរួមប្រឡងប្រជែងកម្មវិធី The Voice Cambodia រដូវកាលទី២ ក្នុងឆ្នាំ ២០១៦ កញ្ញា ថុល ស្រីល័ក្ខណ៍ ក៏បង្ហើបពីការចាប់ផ្តើមអាជីពនៅផលិតកម្មថ្មី Davitra Media ដែលកើតនៅក្នុងឆ្នាំ ២០២០ ផងដែរថា៖ «នាងខ្ញុំបានចូលរួមផលិតកម្ម Davitra Media ថ្មីៗនេះ ប្រហែល ៤-៥ ខែ ដោយនាងខ្ញុំមានចម្រៀងចំនួនជាង ១០ បទ ហើយសុទ្ធតែជាបទប្រភេទ Original Song។ ចំពោះបទជាចំណង់ចំណូលចិត្តនាងខ្ញុំ គឺបែបសង់ទីម៉ង់ ដោយសារនាងខ្ញុំចូលចិត្តដាក់មនោសញ្ចេតនាទៅតាមទឹកដៃនិពន្ធរបស់បងៗ អ្នកតែងនិពន្ធបទចម្រៀង។ តែនេះមិនមែនមានន័យថា នាងខ្ញុំមិនចូលចិត្តច្រៀងបទញាក់កន្ត្រាក់អារម្មណ៍នោះទេបង ខ្ញុំក៏បានច្រៀងបទញាក់មួយចំនួនផងដែរ»។
កញ្ញា ថុល ស្រីល័ក្ខណ៍ ក៏បានបន្តឱ្យដឹងថា៖ «ខ្ញុំបានចូលប្រឡូកចូលវិស័យសិល្បៈជាច្រើនឆ្នាំមកហើយ ភាគច្រើនច្រៀងតាមកម្មវិធីអាហ្វ៊ែរផ្សេងៗ និងដាក់ YouTube នាងខ្ញុំក៏ធ្លាប់ប្រឡងចម្រៀងកម្មវិធី The Voice Cambodia 2 និង Cambodian Idol 2 និងកម្មវិធីថ្នាក់ជាតិមួយនៅឯ MYTV បានលេខ ២»៕
