ភ្នំពេញៈ ទើបតែអស់មន្ទិលរឿងល្បីថា មានទីផ្សារថតកុនស្ងាត់សោះ ស្រាប់តែតារាសម្តែងស្រីស្រស់កញ្ញា វណ្ណៈ បូរមី ក៏មកជំពប់រឿងដ៏អាថ៌កំបាំងមួយទៀតដោយវ័យក្មេងសោះក៏មានជាប់ជំពាក់បំណុលគេជុំទិសទៅហើយ បង្កើតការភ្ញាក់ផ្អើលសាជាថ្មីពីមហាជន។
កាលពីចុងឆ្នាំ ២០១៨ ឃើញថាតារាសម្តែងស្រីរាងតូចច្រឡឹងឆក់បានឱកាសថតកុនភាគ ៣ រឿងជាប់គ្នា និងមានការគាំទ្រច្រើនពីមហាជន ខណៈស្រីស្រស់រូបនេះក៏ធ្លាប់បង្ហាញក្តីប្រាថ្នាចង់បានកំណត់ត្រាផ្តាច់ខាងសម្តែងបែបវាយតប់ផងនោះ តែបែរមកលេចឮរឿងរ៉ាវជំពាក់បំណុលគេទាំងវ័យក្មេងទៅវិញ។
តារាស្រីដែលផុសភាពល្បីកាលថតកុនភាគដំបូងរឿង «បេសកកម្មមួយ» ដែលដើរតួជានារីក្លាហានផ្នែកស៊ើបអង្កេតនោះ កញ្ញា វណ្ណៈ បូរមី ក៏ទទួលចំណងដៃថ្មីថតកុនភាគទី ៣ រឿង «តួខ្ញុំគេសម្តែង» ដែលជាវណ្ណកម្មរបស់អ្នកស្រី ពាន់ ភួងបុប្ផា សម្រាប់ចាក់បញ្ចាំងនៅប៉ុស្តិ៍ទូរទស្សន៍ភីអិនអិន ក្រោយពីបានសម្តែងកុនភាគទី ២ រឿង «ផ្កាថ្ម» របស់ផលិតកម្ម និងទូរទស្សន៍ហង្សមាស កន្លងមករូបនេះបានបកស្រាយថា គ្រាន់តែជាការបង្ហោះសារលេងតាមបណ្តាញសង្គមតែប៉ុណ្ណោះ។
តារាសម្តែងស្រីវ័យឈានចូល ២១ ឆ្នាំប៉ឹមៗដែលអតីតជាបេក្ខនារីប្រកួតកម្មវិធី Freshie Girls & Boys កាលពីឆ្នាំ ២០១៦ ត្រឹមបេក្ខនារី ៦ រូបចុងក្រោយកញ្ញា វណ្ណៈ បូរមី បញ្ជាក់ខណៈពេលនាងកំពុងតែទៅថតកុនភាគថ្មីឲ្យទូរទស្សន៍ PNN នោះដែរថា៖ «ចាសបង!តាមពិតទៅរឿងសារនោះ គ្រាន់តែបានសរសេរ ហើយបង្ហោះលេងតែប៉ុណ្ណោះគឺនាងខ្ញុំក៏មិនបានជំពាក់បំណុលអ្វីគេនោះទេ»។
នាមួយរយៈពេលចុងក្រោយនេះដែរប្រិយមិត្តគាំទ្រតារាសម្តែងស្រីមានរាងតូចច្រឡឹង ដៃជើងស្រឡូនដែលទើបតែបានប្រឡូកវិស័យសិល្បៈសម្តែងត្រឹមជាង ២ ឆ្នាំស្រីស្រស់សោភាជាពន្លកសិល្បៈថ្មីកញ្ញា វណ្ណៈ បូរមី ក៏ត្រូវគេសង្កេតឃើញថានាងហាក់ស្ងាត់ទីផ្សារថតកុនគួរឲ្យមានការងឿងឆ្ងល់។
ក្រោយពីលេចភាពមន្ទិលនោះមកតារាស្រីសំឡេងស្រទន់ កញ្ញា វណ្ណៈ បូរមី ក៏ធ្លាប់បានឲ្យដឹងពីមូលហេតុដែលខ្លួនហាក់រាងរយាលក្នុងទីផ្សារថតកុនថា៖ «ក្រោយពីថតកុនភាគប៉ុន្មានចុងក្រោយចប់មកគឺនាងខ្ញុំមិនទាន់បានទទួលថតកុនអ្វីថ្មីនោះឡើយ ដោយសារនាងខ្ញុំមិនទាន់ផុតកុងត្រានៃគម្រោងចាស់ គឺនៅសល់ពេលប្រមាណ ៣-៤ ខែទៀតឯណោះទើបអាចហ៊ានទទួលគម្រោងថ្មីបាន។ តែទោះជាយ៉ាងណាក្តីក្រៅពីការងារសិល្បៈថតកុននោះក៏មានភាពមមាញឹកនឹងការងារថតស្ប៉តពាណិជ្ជកម្មនានាជាហូរហែបន្តផងដែរ»។
ប្រសិនបើយើងក្រឡេកមើលរូបសម្រស់វិញតារាស្រីរូបនេះអាចនិយាយបានថាគឺមានភាពស្រស់ស្អាតបែបធម្មជាតិពិតៗគ្មានការកែសម្ផស្សទេជាមួយទម្រង់មុខរាងពងក្រពើ និងច្រមុះខ្ពស់ស្រាប់តាំងពីក្មេងដែលផុសចេញពីអាជីពដំបូងជាតារាម៉ូដែលនោះ៕