ភ្នំពេញ៖ ពេលនេះច្បាស់ការហើយ តារាចម្រៀងស្រីស្រស់សម្រស់កាន់តែស្អាតផូរផង់ សាច់សខ្ចីអ្នកនាង ពេជ្រ សូលីកា បានវិលត្រឡប់មកជ្រកកោននៅផលិតកម្មហង្សមាសវិញហើយ លើវិថីសិល្បៈចម្រៀង ដោយសារថ្មីៗនេះ ឃើញផលិតកម្មបង្ហោះសារតាមគេហទំព័រឱ្យដឹងពីការចេញបទចម្រៀងដំបូង មានចំណងជើងថា «ម្នាក់នោះមិនមែនយើង»។
ចេញពីគេហទំព័ររបស់ផលិតកម្មហង្សមាសកាលពីថ្ងៃទី ១៤ ខែ តុលា ឆ្នាំ ២០២០ កន្លងមកចេញសារថា៖ « ព្រោះគេស្រឡាញ់តែម្នាក់នោះទេ ហើយម្នាក់នោះមិនមែនយើងទេ! យើងនេះខំប្រឹងល្អដាក់គេ ដល់ណាក៏គ្មានផ្លូវគេស្រឡាញ់ដែរ! បទ «ម្នាក់នោះមិនមែនយើង» លោកអ្នកអាចទស្សនាបាននៅតាមយូធូប ដែលច្រៀងដោយ ពេជ្រ សូលីកា និពន្ធទំនុកច្រៀងដោយ នី សុគន្ធា និពន្ធបទភ្លេង និងសម្រួលបទភ្លេងដោយ ចក់» ក្រោយពីតារាស្រីរូបនេះបានសម្រាលបុត្រដំបូង ជាមួយស្វាមីមិនទាន់បានរៀបការដោយសារតែបញ្ហាកូវីដ ១៩ នោះ។
កាលពីឆ្នាំ ២០១៩ កន្លងមកនេះ ដំណឹងវិលចូលទ្រនំកម្មវិធីហង្សមាសវិញ ហាក់ស្ថិតក្នុងភាពស្រពេចស្រពិលដដែល ដោយសារស្រីស្រស់ ពេជ្រ សូលីកា ឧស្សាហ៍បង្កើតភាពភា្ញក់ផ្អើល និងទាក់ទាញចំណាប់អារម្មណ៍មហាជនរូបនេះ រមែងលេចឮនូវដំណឹងដូច្នេះតាំងពីឆ្នាំ ២០១៧ មក។ តែនៅឆ្នាំ ២០២០ នេះ ស្រាប់តែខាងផលិតកម្មជាអ្នកទម្លាយរឿងវត្តមានតារាចម្រៀងស្រីរូបស្រស់សោភា ដែលធ្លាប់ចាកចេញពីទ្រនំម្តងហើយនោះ ជាមួយនឹងការខិតខំជួយលើកបទចម្រៀងថ្មីរបស់អ្នកនាង ពេជ្រ សូលីកា តែម្តង។
គ្រាន់តែលេចដំណឹងនេះភ្លាម ក៏មានក្រុមអ្នកគាំទ្រសម្តែងការភ្ញាក់ផ្អើលផង និងអបអរសាទរផង ដោយសារថា៖ «ស្រឡាញ់បងណាស់ចាំបងយូរហើយ ចង់ស្តាប់បងច្រៀង ចង់ឃើញបងសម្តែង ជូនពរបងជួបតែរឿងល្អៗ មានសុភមង្គលនៅក្នុងគ្រួសារ ជាពិសេសសូមឱ្យបងទទួលបានការគាំទ្រកាន់តែច្រើនឡើង និងជាអាយដលនៅក្នុងបេះដូងហ្វេនគ្រប់ៗគ្នា»។
ខណៈ ភ្នំពេញ ប៉ុស្តិ៍ ក៏មិនអាចសុំការបញ្ជាក់ពីនាងបានច្បាស់លាស់នោះទេ ពេលទាក់ទងតាមទូរស័ព្ទតារាចម្រៀងស្រី ដែលមហាជនធ្លាប់យល់ច្រឡំថា នាងក៏មានទំនាក់ទំនងជាមួយតារាចម្រៀងប្រុសសំឡេងផ្អែម លោក ណុប សម្បត្តិនីកូ ហៅ នីកូ កាលពីមិនទាន់មានម្ចាស់ស្នេហ៍៕