.jpg)
កញ្ញា យ៉ែម ស្រីពេជ្រ នាថ្ងៃក្រុងពាលីកុនថ្មីរឿង «គ្រោះជីវិតកូវីដ ១៩»។ អុីនស្តាក្រាម, តារាសម្តែង និងពិធីការិនីស្រីស្រស់ កញ្ញា យ៉ែម ស្រីពេជ្រ។ រូបថត ហ៊ាន រង្សី
ភ្នំពេញ៖ គ្រាន់តែចូលដើមឆ្នាំ ២០២១ ភ្លាម តារាស្រីម៉ូដែល និងតារាសម្តែងកំពុងឡើងកូដកញ្ញា យ៉ែម ស្រីពេជ្រ ក៏ចាប់បានលាភធំភ្លែតក្លាយជាតួឯកស្រីក្នុងរឿង «គ្រោះជីវិតកូវីដ ១៩» របស់ផលិតកម្មកថាជ័យភាពយន្តរបស់លោក ហ៊ុយ យ៉ាឡេង។
តារាសម្តែង និងពិធីការិនីទូរទស្សន៍ ស្រីស្រស់កញ្ញា យ៉ែម ស្រីពេជ្រ អតីតជា Freshie Girl ឆ្នាំ ២០១៥ ដែលកំពុងមានទីផ្សារសម្តែងកុនភាគ និងកុនដុំ តាំងពីគ្រងតំណែងតួឯកស្រីរឿង «កូនក្រមុំលោកមេឃុំ» ប្រចាំទូរទស្សន៍ប៉ុស្តិ៍លេខ ៥ ស្រាប់តែសម្តែងពីភាពភ្ញាក់ផ្អើលពីការទទួលបានកាដូដើមឆ្នាំ ២០២១ ក្នុងការថតកុនដុំរឿង «គ្រោះជីវិតកូវីដ ១៩»។
តារាស្រីដែលមានរូបសម្រស់កាន់តែស្រស់ស្អាត គួបផ្សំជាមួយនឹងទេពកោសល្យសម្តែងរូបនេះ បានបង្ហើរសារតាមបណ្តាញសង្គមអ៊ីនស្តាក្រាមថា៖ «ដើមឆ្នាំថ្មី មានការងារខ្នាតធំថ្មី ប្រឹងធ្វើការទាន់ខ្លួននៅក្មេង» អមនឹងរូបថតពេលធ្វើពិធីក្រុងពាលី កាលពីថ្ងៃទី ១៥ ខែ កុម្ភៈ ឆ្នាំ ២០២១ កន្លងមកនេះ។
ដើម្បីចង់ឱ្យជំងឺកូវីដ ១៩ ក្លាយជាមេរៀនចងចាំបែបលក្ខណៈប្រវត្តិសាស្ត្រសម្រាប់ពិភពលោក និងប្រទេសកម្ពុជា នាពេលនេះ លោក ហ៊ុយ យ៉ាឡេង បានប្រកាសថានឹងផលិតខ្សែភាពយន្តបែបអប់រំដែលមានចំណងជើងថា «គ្រោះជីវិតកូវីដ ១៩ » ស្តែងពីវិបត្តិធំៗដែលកើតឡើងនៅក្នុងប្រទេសកម្ពុជា។
លោក ហ៊ុយ យ៉ាឡេង ហៅ កថាជ័យ បង្ហើបឱ្យដឹងថា៖ «ស្នាដៃនេះ មានរសជាតិច្រើន ដែលលាយឡំគ្នា យំ កម្សត់ និងលាយសំណើច ហើយរឿង «គ្រោះជីវិតកូវីដ ១៩» នេះក៏មានគម្រោងអាចនឹងដាក់បញ្ចាំងមុនចូលឆ្នាំខ្មែរឆ្នាំនេះផងដែរ ឬអាចក្រោយចូលឆ្នាំខ្មែរឆ្នាំនេះ គឺតាមភាពជាក់ស្តែង»។
ខ្សែភាពយន្តរឿង «គ្រោះជីវិតកូវីដ ១៩» ដែលនិយាយពីវិបត្តិកូវីដ ១៩ ទាំងនៅក្នុងប្រទេសកម្ពុជា និងពិភពលោក គ្រោងចាយទុនចំនួន ៧ ម៉ឺនដុល្លារ។ ភាពយន្តនេះផលិតឡើង ដើម្បីចងក្រងទុកជាឯកសារប្រវត្តិសាស្ត្រនៃជំងឺឆ្លង ដែលធ្វើឱ្យប៉ះពាល់សេដ្ឋកិច្ចនៃពិភពលោកទាំងមូល។ នេះបើតាមលោក ហ៊ុយ យ៉ាឡេង ជាផលិតករភាពយន្តផ្ទាល់ និងស្នាដៃរឿង «ដើម្បីកូន» បានប្រាប់ឱ្យដឹងថា ៖«គោលបំណងសំខាន់នៃការផលិតរឿងនេះ គឺដើម្បីចងក្រងឯកសារប្រវត្តិសាស្ត្រស្ដីពីវិបត្តិកូវីដ ១៩ ដែលបានកើតមានក្នុងប្រទេសកម្ពុជា ក៏ដូចជាពិភពលោកទាំងមូល។ កុននេះប្រហែលគ្រោងថតពេល ១ ខែ និងចាយទុនថតប្រមាណ ៧ ម៉ឺនដុល្លារ នឹងក្លាយជាឯកសារដ៏សំខាន់មួយសម្រាប់ក្មេងជំនាន់ក្រោយ»៕
