ភ្នំពេញ៖ ថ្មីៗនេះស្រាប់តែលេចវត្តមានអតីតតារាចម្រៀងស្រីប្រចាំផលិតកម្មភ្លេងរីខត កញ្ញា សុខ ចិន្តា ហៅ វ៉ាន់នីឡា មកបំពេអារម្មណ៍ប្រិយមិត្តនៅក្នុងបទចម្រៀងថ្មី មានចំណងជើងថា «បេះដូងវីរជនអាវស (Covid-19)» ដែលផលិតដោយសមាគមគ្រូពេទ្យស្ម័គ្រចិត្តយុវជនសម្តេចតេជោ (TYDA) ក្រោយពីចប់រដូវកាលពិធីបុណ្យចូលឆ្នាំប្រពៃណីខ្មែរភ្លាមនោះ។
ការចេញមកបំពេអារម្មណ៍មហាជនឡើងវិញពីសំណាក់តារាចម្រៀងស្រីសាច់សខ្ចី ដែលបានបាត់មុខពីសង្វៀនសិល្បៈយូរក្រែលដោយសារបញ្ហាផ្ទាល់ខ្លួន ខណៈបទចម្រៀងនោះគឺជាការដឹកនាំការផលិត និងនិពន្ធទំនុកច្រៀងដោយបងប្រុសនាងបង្កើតលោក សុខ ជំនោរ និងនិពន្ធបទភ្លេងដោយលោក រួន ហៅចចកសមុទ្រ។
ដោយឡែកបងប្រុសរបស់តារាចម្រៀងស្រី វ៉ាន់នីឡា គឺលោក សុខ ជំនោរ ដែលអតីតជាអ្នកនិពន្ធបទចម្រៀងល្បីឈ្មោះល្បីរាប់ឆ្នាំនៅផលិតកម្មហង្សមាស និងបច្ចុប្បន្នលោកមានផលិតកម្មផ្ទាល់ឈ្មោះ Films OutFox ក៏បានបង្ហោះរូបភាពជាច្រើនសន្លឹក និងសារខ្លះឲ្យដឹងថា កញ្ញា វ៉ាន់នីឡា ត្រៀមចេញបទចម្រៀងថ្មី ហើយត្រៀមនឹងចូលប្រឡូកសិល្បៈសាជាថ្មីម្ដងទៀតផងដែរ។ ខណៈលោក សុខ ជំនោរ បានសរសេរថា៖ «គាំទ្រទេ? ពួកយើងត្រឡប់មកវិញអាចនឹងមកទាំងក្រុមផងទេដឹង?»
ជាការកត់សម្គាល់នោះមួយរយៈចុងក្រោយនេះ គេឧស្សាហ៍ឃើញអតីតតារាចម្រៀងជ្រកនៅទ្រនំភ្លេងរីខត ដែលជំពប់នូវរឿងអាស្រូវស្នេហា ដោយសារអតីតមិត្តប្រុសបានទម្លាយរូបអាក្រាត កញ្ញា វ៉ាន់នីឡា បង្ហើរសារដែលជាតម្រុយប្រាប់ពីបំណងចង់វិលមករកឆ្នាំងបាយចាស់នៅលើវិថីចម្រៀងវិញជារឿយៗ។ ជាក់ស្តែងដូចជាមានការ Live វីដេអូ ច្រៀងបំពេអារម្មណ៍ប្រិយមិត្តតាមបណ្តាញហ្វេសប៊ុក ក៏ឃើញកញ្ញា វ៉ាន់នីឡា បានបង្ហោះសារថា៖ «ខ្ញុំចង់ឡើងច្រៀងលើឆាកវិញ ខ្ញុំចង់ចេញបទចម្រៀងថ្មី ខ្ញុំចង់ធ្វើអ្វីដែលខ្ញុំធ្លាប់ធ្វើពីមុន ខ្ញុំនឹកជីវិតជាតារាចម្រៀងខ្លាំងណាស់»។
កញ្ញា សុខ ចិន្តា ហៅ វ៉ាន់នីឡា ក៏ធ្លាប់បង្ហើបឲ្យភ្នំពេញប៉ុស្តិ៍ដឹងថា៖ «ចាសបង! ជាការពិត គឺនាងខ្ញុំមានបំណងចង់វិលទៅរកវិស័យសិល្បៈចម្រៀងវិញមែន! ហើយកន្លងមក ខ្ញុំក៏ពុំដែលប្រាប់ថា ខ្លួនឯងលាឈប់ពីវិស័យសិល្បៈនោះដែរ។ ដោយសារតែពេលថ្មីៗនេះ នាងខ្ញុំតែងមានអារម្មណ៍នឹកនាខ្លាំងនឹងសិល្បៈចម្រៀង ហើយពេលនាងខ្ញុំនិយាយរឿងពីអារម្មណ៍ ពិតជាចង់ចេញមកក្រៅឃើញបងប្អូនប្រិយមិត្តនៅតែមានការគាំទ្រច្រើនចាំគាំទ្រ ទើបសម្រេចចិត្តនឹងវិលចូលទៅប្រឡូកវិញពេលឆាប់ៗនេះហើយ»។
អតីតចម្រៀងស្រីនៅភ្លេងរីខតកញ្ញា វ៉ាន់នីឡា ក៏បានបន្តឲ្យដឹងដែរថា៖ «ពេលនេះខ្ញុំក៏មានក្រុមការងាររៀបចំការនិពន្ធ និងថតបទចម្រៀងនានាថ្មីៗ ហើយមានគោលដៅថ្មី គឺនាងខ្ញុំនឹងមិនវិលទៅរកផលិតកម្មចាស់ហង្សមាសនោះទេ ព្រោះថានាងខ្ញុំបានផុតកុងត្រាហើយ។ កន្លែងថ្មីនេះ សុំចិត្តបងប្អូនរង់ចាំបន្តិចសិន គឺនឹងជម្រាបប្រាប់ពេលក្រោយ»៕