.jpg)
កញ្ញា ហ៊ិន ច័ន្ទនិរ័ត្ន នាំយកប្រាក់សប្បុរសធម៌ទៅជួយដល់មន្ទីរពេទ្យគន្ធបុប្ផា។ រូបថត ហ្វេសប៊ុក, ពិធីការិនី និងតារាសម្តែងស្រីរូបស្រស់កញ្ញា ហ៊ិន ច័ន្ទនីរ័ត្ន។ រូបថត ហុង មិនា
ភ្នំពេញ៖ ថ្មីៗនេះស្រាប់តែឃើញតារាសម្តែង និងពិធីការិនីរូបស្រស់ប្រចាំទូរទស្សន៍បាយ័ន កញ្ញា ហ៊ិន ច័ន្ទនីរ័ត្ន ដែលមិនត្រឹមតែមានរូបសម្ផស្សស្រស់ស្អាត មិនចាញ់តារាស្រីជំនាន់ក្រោយៗ បង្ហាញវត្តមានក្នុងកិច្ចការសង្គមមួយដោយបាននាំយកប្រាក់សប្បុរសធម៌ចំនួនប្រមាណ ២ ០០០ ដុល្លារ ទៅជួយដល់មន្ទីរពេទ្យគន្ធបុប្ផា បើទោះបីជាសម្ទុះនៃទីផ្សារសិល្បៈរបស់ខ្លួនមិនសម្បូរនោះក្តី។
តារាសម្តែងស្រី និងពិធីការិនី មានសម្រស់កាន់តែស្រស់ស្អាតកញ្ញា ហ៊ិន ច័ន្ទនីរ័ត្ន ដែលមិនសូវមានវត្តមានសម្តែងកុនខ្នាតតូចធំមែនក្តីតែកញ្ញាកាក់កបនឹងការថតស្ប៉ត និងបើកអាជីវកម្មក្រៅសិល្បៈជាហូរហែប្រមាណជិត ២ ឆ្នាំចុងក្រោយនេះ ក៏បានបង្ហើបប្រាប់ពីដើមចមនៃការនាំយកប្រាក់សប្បុរសផ្ទាល់ខ្លួនជួយសង្គម តាមលទ្ធភាពនោះថា៖ «អូ! តាមពិតទៅ គឺនាងខ្ញុំមិនមានធនធានអ្វីច្រើនអាចជួយនោះទេ គ្រាន់តែថ្មីៗនេះ នាងខ្ញុំបានឃើញពីទុក្ខលំបាករបស់កុមារ ដែលបានមកសម្រាកព្យាបាលនៅមន្ទីរពេទ្យគន្ធបុប្ផា និងខាងមន្ទីរពេទ្យក៏ត្រូវការជំនួយផងដែរ ទើបក្រោយពីនាងខ្ញុំបានលក់សម្លៀកបំពាក់មួយទឹករបស់ខ្លួនឯងបានប្រាក់នោះ ហើយក៏សម្រេចនាំយកទៅជូនដល់មន្ទីរពេទ្យតែម្តង។
ដើមឡើយនោះ ក៏នាងខ្ញុំមិនមានក្តីរំពឹងគិតថា វាអាចនឹងបានប្រាក់ពីការលក់សម្លៀកបំពាក់មួយទឹកទាំងនោះទេ តែពេលបានទើបនាងខ្ញុំក៏សច្ចាក្នុងចិត្តថា នឹងនាំយកទៅជួយដល់មន្ទីរពេទ្យគន្ធបុប្ផាទាំងអស់តែម្តង»។
កញ្ញា ហ៊ិន ច័ន្ទនិរ័ត្ន ដែលជាតារាសម្តែងស្រីធ្លាប់ផ្ទុះការគាំទ្រខ្លាំងតាមរយៈកុនដុំរឿង «ធ្មប់» កាលពីឆ្នាំ ២០១៨ ក៏បានបន្តទៀតថា៖ «ដោយសារតែបញ្ហាជំងឺកូវីដ ១៩ ទើបបានការងារសម្តែងសិល្បៈវាមិនសូវសម្បូរ តែឥឡូវនេះ ហាក់ដូចជាគ្រាន់បើជាងកាលពីអំឡុងពេលខែ ២-៣ ដើមឆ្នាំ។ ក្នុងនាមជាអ្នកសិល្បៈ សម្រាប់កិច្ចការជួយសង្គមបែបនេះ ក៏នាងខ្ញុំចង់ឆ្លៀតតាមលទ្ធភាពផងដែរ។
ដោយឡែកនាងខ្ញុំក៏ចង់ជម្រាបដល់បងប្អូនខ្មែរទាំងអស់ ទាំងអ្នកសិល្បៈ និងបងប្អូនខ្មែរ ដែលអាចចូលរួមជួយទៅតាមលទ្ធភាពចំនួន ៥ ០០០ រៀល ក្នុង ១ ខែ ឬចំនួន ៦០ ០០០ រៀល ក្នុង ១ ឆ្នាំ សម្រាប់គាំទ្រជួយដល់មន្ទីរពេទ្យគន្ធបុប្ផានោះ សូមមេត្តាចូលរួមទាំងអស់គ្នា ដើម្បីរំលែកទុក្ខលំបាកកុមារកម្ពុជា ដែលបានមកព្យាបាលនៅមន្ទីរពេទ្យជារៀងរាល់ថ្ងៃ ក្នុងស្មារតី «ខ្មែរជួយខ្មែរ» ខណៈខាងមន្ទីរពេទ្យក៏មានមូលនិធិនេះផងដែរ»។
បើតាមការកត់សម្គាល់ នាមួយរយៈពេលចុងក្រោយនេះ តារាសម្តែង និងពិធីការិនីទូរទស្សន៍ សម្រស់មិនចាស់ទៅតាមវ័យកញ្ញា ហ៊ិន ច័ន្ទនីរ័ត្ន ហាក់បីដូចជាមានភាពរយាលនឹងការសម្តែងសិល្បៈបន្តិច ដោយសារគេសង្កេតឃើញថា នាងមានការមមាញឹកខ្លាំងទៅនឹងការបើកអាជីវកម្មលក់គ្រឿងសម្អាងកាយជាមួយនឹងម៉ាក U.Me និង ELMA ដែលជាផលិតផលកំពុងល្បីនៅកម្ពុជា និងបើកហាងលក់សម្លៀកបំពាក់ ដែលនេះ គឺជាដើមចមមួយនៃអាថ៌កំបាំងសម្រស់ស្រស់ស្អាត នៅតែក្មេងជានិច្ចរបស់កញ្ញាហើយមើលទៅ៕
