ភ្នំពេញ៖ ក្រោយពីប្រឡងជាប់បាក់ឌុបនៅឆ្នាំ ២០១៩ នេះមក យុវតីស្រស់សោភា តារាសម្តែងរលកក្រោយ ធ្មេញច្រពើសស្អាត កញ្ញា នូណា បានសម្រេចចិត្តបន្តការសិក្សាថ្នាក់មហាវិទ្យាល័យតាមសេចក្តីប្រាថ្នាកាលពីមុនពេលប្រឡង ដោយសុខចិត្តបន្ថយការងារសិល្បៈខ្លះទៅបន្ថែមម៉ោងក្រេបចំណេះវិជ្ជាវិញ។
បង្កើតនូវភាពភ្ញាក់ផ្អើល ខណៈស្រាប់តែតារាសម្តែងស្រីស្អាតវ័យ ១៧ ឆ្នាំ ដែលទើបប្រឡូកចូលវិស័យសិល្បៈជាង ១ ឆ្នាំមែន និងបានសាងកេរ្តិ៍ឈ្មោះល្បីដោយសន្សឹមៗ និងផ្ទុះការគាំទ្រមិនចាញ់តារាសម្តែងស្រីរលកមុនៗទេ កញ្ញា នូណា បានបង្ហោះរូបនាថ្ងៃចូលរៀននៅសាកលវិទ្យាល័យដំបូង គឺនៅសាកលវិទ្យាល័យជាតិគ្រប់គ្រង។
តារាសម្តែងស្រីរលកថ្មី ដែលបានបោះជំហានថតស្ប៉តពាណិជ្ជកម្ម ថត MV បទចម្រៀងជាម៉ូយប្រចាំផលិតកម្មហង្សមាស និងបានកសាងឈ្មោះដំបូង តាមរយៈការថតកុនភាគរឿង «សិសិររដូវក្នុងបេះដូង» របស់ហង្សមាស ដែលមានឈ្មោះពិតថា ហួរ លីហេង ហៅ នូណា មានវ័យ ១៧ ឆ្នាំ ទើបប្រឡងជាប់មធ្យមសិក្សាទុតិយភូមិឆ្នាំ ២០១៩ នេះ ខណៈកាលថ្នាក់ទី ១២ រៀននៅវិទ្យាល័យព្រះស៊ីសុវត្ថិ។
យុវតីមានអំណោយផលស្អាតពីកំណើត មានទឹកមុខមាត់ញញឹមស្រស់កញ្ញា នូណា ដែលទទួលបាននូវការចាប់អារម្មណ៍គួរឲ្យកត់សម្គាល់ ពីមហាជន អ្នកគាំទ្រ បន្ទាប់ពីនាងបានសម្ដែងកុនជាតួអង្គឆ្នាសឆ្នើម កញ្ជនាតូចក្នុងរឿង «សិសិររដូវក្នុងបេះដូង» បញ្ជាក់ប្រាប់ផងដែរថា៖ «នាងខ្ញុំបានមកចូលរៀនសាកលវិទ្យាល័យ ដែលចង់រៀនហើយ បើគិតត្រឹមថ្ងៃនេះ គឺបាន ២ ថ្ងៃហើយដែរ ក្រោយពីនាងខ្ញុំបានប្រឡងថ្នាក់ទី ១២ ជាប់នៅឆ្នាំ ២០១៩ នេះមក។ ដូច្នេះ នាងខ្ញុំត្រូវបន្ថយការទទួលការងារសិល្បៈមួយចំនួនដែរ គឺដើម្បីយកពេលមកបន្ថែមលើការសិក្សា។ នាពេលមួយរយៈនេះក៏មានក្រុមហ៊ុនច្រើន ហៅឲ្យថតស្ប៉តច្រើនដែរ ហើយផលិតកម្មហង្សមាសក៏ចង់ឲ្យថតរឿងថ្មីក្រោយទៀតដែរ តែនាងខ្ញុំអត់ទាន់អាចទទួលបានទេ ព្រោះតែមិនចង់ឲ្យសិល្បៈនេះ ជះឥទ្ធិពលទៅដល់ការសិក្សានោះឡើយ»។
ចំពោះក្តីប្រាថ្នា នាពេលអនាគតលើការសិក្សាយកជំនាញក្រៅពីអាជីពអ្នកសិល្បៈ ក្រោយពីនាងប្រឡងបាក់ឌុបនោះ តារាសម្តែងស្រីរលកថ្មីរូបនេះ ក៏បានបង្ហើបឲ្យដឹងផងដែរថា៖ «សម្រាប់ចិត្តស្រឡាញ់ និងក្តីប្រាថ្នាក្រោយពីប្រឡងជាប់ថ្នាក់ទី ១២ នោះគឺនាងខ្ញុំចង់សិក្សាជំនាញ ២ នៅមហាវិទ្យាល័យ។ សម្រាប់ជំនាញទី ១ នាងខ្ញុំចង់រៀនមហាវិទ្យាល័យ Business និងជំនាញទី ២ វិញគឺខ្ញុំចង់រៀនផ្នែកភាសាអង់គ្លេស។ ហើយកាចង់រៀនលើពាណិជ្ជកម្មនេះក៏ព្រោះចង់់ទៅប្រកបរបររកស៊ីផងដែរ ព្រោះថាប៉ាម៉ាក់មានរបរនេះស្រាប់»៕