.jpg)
តារាស្រី រចនា រ៉ាវ៉ាឌី បង្ហោះសារបែបនឹកអាល័យម្ចាស់ចិត្តទំនងបែកឆ្ងាយគ្នា។ រូបថត អុីនស្តាក្រាម
ភ្នំពេញ៖ ថ្មីៗនេះ តារាសម្តែងស្រីរាងខ្ពស់កំពុងទទួលបានផ្លែផ្កាល្អក្នុងអាជីពសម្ដែងកុន ដែលបានផ្តើមអាជីពពីតារាម៉ូដែល និងពិធីការិនីទូរទស្សន៍កញ្ញា រចនា រ៉ាវ៉ាឌី ស្រាប់តែបង្ហើរសារបង្ហើបរឿងក្នុងចិត្តបែបខកបំណងព្រោះឃ្លាតឆ្ងាយពីម្ចាស់បេះដូង ទំនងជានៅឯនាយសមុទ្រ បង្កើតភាពងឿងឆ្ងល់ពីមហាជន។
កាលពីថ្ងៃធ្វើខួបកំណើតវ័យ ២០ ឆ្នាំ នាពេលកន្លងមក ដែលរំលេចកាដូនំខេក និងចិញ្ចៀនពេជ្រ ១ វង់ ហើយស្រីស្រស់តារាម៉ូដែល និងសម្តែងកញ្ញា រចនា រ៉ាវ៉ាឌី ក៏ត្រូវមហាជនកើតក្តីមន្ទិលសង្ស័យថា គឺជាចិញ្ចៀនមានគេជូនជាកាដូបញ្ចាំចិត្តស្នេហ៍សោះនោះ ឥឡូវនេះក៏មកបង្ហើបរឿងបញ្ហាបេះដូង ចេញមកក្រៅឲ្យគេដឹងដោយខ្លួនឯងថា៖ «ខ្ញុំប្រហែលមិនអាចក្បែរអ្នកបានរាល់ថ្ងៃ តែបេះដូងមានអ្នកគ្រប់វិនាទី»។
រំពេចនោះ ក៏មានអ្នកលាន់មាត់ថា៖ «អុញនោះ! មានគេលួចបេះដូងខ្ញុំបាត់!» និងអ្នកខ្លះបាននិយាយថា៖ «អ៊ីយ៉ា! ទើបតែបានប្រកែកញ៉ាញថា អត់មានអ្នកស្រឡាញ់សោះ តែឥឡូវនេះ ស្រាប់តែមកទម្លាយរឿងក្នុងចិត្តអីណា! គ្រាន់តែមើលសារនេះក៏ដឹងដែរ»។
តារាសម្តែងស្រីដែលបានអភិវឌ្ឍខ្លួនពីតារាបង្ហាញម៉ូដ នៅចន្លោះឆ្នាំ ២០១៥-២០១៦ និងបានប្រឡូកការសម្តែងកុនដំបូងជាតួរងស្រីក្នុងរឿង «ភ្លើងស្នេហ៍ភ្លើងឫស្យា» នៅឯផលិតកម្មនៃទូរទស្សន៍ប៉ុស្តិ៍លេខ ៥ ខណៈនាពេលនេះ កញ្ញា រចនា រ៉ាវ៉ាឌី ក៏កំពុងតែរវល់ខ្លាំងនឹងការថតកុនភាគនៅប៉ុស្តិ៍បាយ័ន ក៏ដូចជាការងារប្រកបរបររកស៊ីក្រៅសិល្បៈ គឺលក់ផលិតផលរក្សាសម្រស់នាំយកមកពីប្រទេសជប៉ុន នោះ។ កញ្ញា រចនា រ៉ាវ៉ាឌី បញ្ជាក់បែបលាក់លៀម និងលាយសំណើចថា៖ «ប្រហែលជាត្រឹមដូចគេថា មែនទេដឹងបង? ចំពោះរឿងថា មានគូគាប់នោះ ដូចជាត្រូវដែរ តែថានៅនាយសមុទ្រនោះ សុំចិត្តមិនទាន់បង្ហើបប្រាប់ទេ លាក់ទុកខ្លះសិនហើយ»។
កញ្ញា រចនា រ៉ាវ៉ាឌី ដែលជាកូនពៅក្នុងគ្រួសារដោយមានបងប្អូនបង្កើត ២ នាក់ ដែលនាងទើបតែមានវ័យ ២១ ឆ្នាំ ជាតារាស្រីរលកក្រោយ តែក្តោបបានឱកាសថតកុនភាគបានច្រើន គឺមាន ១០ រឿងមកហើយ នៅក្នុងរយៈពេលត្រឹមតែ ៣-៤ ឆ្នាំ ចុងក្រោយប៉ុណ្ណោះ ហើយមមាញឹកខ្លាំងនឹងការដើរម៉ូដ និងថតស្ប៉តពាណិជ្ជកម្ម ខណៈពេលថ្មីៗនេះ នាងក៏កំពុងតែមមាញឹកនឹងការរត់ការបើកអាជីវកម្មនាំផលិតផលរក្សាសម្រស់ផ្តាច់មុខពីប្រទេសកូរ៉េ ដែលនឹងដំណើរការឆាប់នេះផងដែរ។
កញ្ញា រចនា រ៉ាវ៉ាឌី តួឯកស្រីក្នុងរឿង «មិត្តឫស្យា» រូបនេះបង្ហើបថា៖ «ប្រហែលជានៅខែ ៧ ឬ ៨ ខាងមុខនេះហើយ នាងខ្ញុំនឹងបើកអាជីវកម្មផ្ទាល់ខ្លួន នាំយកផលិតផលរក្សាសម្រស់មកពីប្រទេសកូរ៉េ ខណៈការលក់ផលិតផលសម្រស់បច្ចុប្បន្ននេះ គ្រាន់តែជាការសហការបើករបរចូលភាគហ៊ុនជាមួយនឹងបងស្រីនាងខ្ញុំប៉ុណ្ណោះ»៕
