.jpg)
កញ្ញា រឿន ណាត និងតួប្រុស សម្តែងក្នុងកុនភាគថ្មីរឿង «ផ្កាព្រៃ» ដែលជិតចាក់បញ្ជាំង។ រូប ហ្វេសប៊ុក
ភ្នំពេញ៖ សូម្បីតែខ្លួនឯងផ្ទាល់ក៏មានការងឿងឆ្ងល់ផងដែរ ខណៈនៅចំពេលដែលអ្នកសិល្បៈភាគច្រើនរអ៊ូថា ខ្សត់ការងារសិល្បៈ ក្នុងពេលមានវិបិត្តដោយសារជំងឺកូវីដ ១៩ នោះ ស្រាប់តែស្រីស្អាត ញញឹមស្រស់កញ្ញា រឿន ណាត បែរជាមមាញឹកនឹងការសម្រុកថតកុន និងថតសម្អាងការរកពេលសម្រាកសឹងតែគ្មានទៅវិញ។
អតីតកញ្ញាឯកចក្កវាឡតំណាងកម្ពុជា ដែលស្រូបប្រជាប្រិយភាពយ៉ាងខ្លាំងពីមហាជនខ្មែរ នៅក្នុងពេលមានភារកិច្ចជាបវរកញ្ញាចក្កវាឡតំណាងឲ្យប្រទេសកម្ពុជា សម្រាប់ការចូលរួមប្រកួតបវរកញ្ញាចក្កវាឡពិភពលោកឆ្នាំ ២០១៨ កញ្ញា រឿន ណាត ក៏មកផុសផុលថតកុន និងថតសម្អាងការ បង្កការចាប់អារម្មណ៍សាជាថ្មី។
ថ្មីៗនេះស្រាប់តែឃើញមានរូបថតជាច្រើនសន្លឹក កញ្ញា រឿន ណាត បង្ហោះសារប្រាប់មហាជនពីខ្សែភាពយន្ត ដែលខ្លួនបានថតកុនភាគចប់សព្វគ្រប់ហើយ គ្រាន់តែរង់ចាំថ្ងៃចាក់បញ្ចាំងនៅកញ្ចក់ទូរទស្សន៍តែប៉ុណ្ណោះ ដោយរឿងមានចំណងជើងថា «ផ្កាព្រៃ»។
កញ្ញា រឿន ណាត បច្ចុប្បន្មមានវ័យ ២៤ ឆ្នាំ មានស្រុកកំណើតនៅខេត្តកំពង់ចាម បានគ្រងឈុតតំណាងជាតិមានឈ្មោះថា «កម្ពុជាព្រះរាជាណាចក្រអច្ឆរិយ» ជាមួយនឹងគ្រឿងអលង្ការផ្សេងៗ ដើរបង្ហាញលើឆាកអន្ដរជាតិ នៃកម្មវិធីប្រកួត Miss Universe 2018 នៅប្រទេសថៃ ដោយមាន ៩៥ ប្រទេសចូលរួម។ កញ្ញា រឿន ណាត ក៏បានបញ្ជាក់ប្រាប់ពីភាពមមាញឹកខ្លាំង នឹងការងារសិល្បៈនៅចំពេលដែលអ្នកសិល្បៈភាគច្រើន កំពុងតែរអ៊ូថា ចង់ដាច់បាយទៅហើយនោះថា៖ «មានគេបានចោទសួរនាងខ្ញុំច្រើនចំពោះបញ្ហានេះ ដោយសារពេលគេខ្សត់ការងារសិល្បៈ ចំពេលមានវិបត្តិកូវីដ ១៩ បែរជារូបនាងខ្ញុំ រវល់ខ្លាំងសឹងតែមិនមានពេលសម្រាកក្នុងការថតកុន និងសម្អាងការ។ និយាយឲ្យត្រង់ទៅ ដោយសារតែរវល់ការងារថតខ្លាំង ពេលនេះនាងខ្ញុំបានចេញមកជួលផ្ទះក្រៅរស់នៅផ្ទាល់ខ្លួនមួយរយៈសិន ដោយខ្លាចក្រែងមានបញ្ហាឆ្លងមេរោគដ៏សាហាវនេះ ខណៈពីមុននាងខ្ញុំរស់នៅជាមួយម្តាយមីងនោះ បើទោះបីជានាងខ្ញុំ និងក្រុមការងារថតសិល្បៈ គឺសុទ្ធតែប្រុងប្រយ័ត្នគ្រប់ពេលវេលាក្តី»។
កញ្ញា រឿន ណាត ក៏បង្ហើបប្រាប់ពីអារម្មណ៍ សម្រាប់ការថតកុនភាគរឿង «ផ្កាព្រៃ» ដែលមាន ៤០ ភាគនោះថា៖ «ថតកុនភាគនេះ នាងខ្ញុំក៏ទទួលបាននូវបទពិសោធថ្មីមួយទៀត ដោយសារគេឲ្យសម្តែងច្រើនរសជាតិ គឺថាមានតួស្លូត តួកាចឆ្នាស់ឆ្នើម និងតួវាយតប់គ្នាទៀតផង ខណៈការថតកុនមុនៗ ច្រើនតែសម្តែងជាតួស្លូតមួយមុខប៉ុណ្ណោះ។ ដូច្នេះសម្រាប់ការថតកុនលើកនេះ នាងខ្ញុំក៏មានអារម្មណ៍ ថាប្លែកផងដែរ តែក៏ទទួលនូវបទពិសោធជាច្រើនផងដែរ»៕
