ភ្នំពេញ៖ តារាចម្រៀងស្រីសំឡេងស្រាលស្រទន់ អតីតជាម្ចាស់ជយលាភី Rock Star នៅទូរទស្សន៍ CTN ឆ្នាំ ២០០៥ និងអតីតជាតារាចម្រៀងទ្រនំចាស់ហង្សមាស កញ្ញា ឈិត សុវណ្ណបញ្ញា ទោះបីជាដូរមកទ្រនំថ្មីថោន មានរយៈពេល ៣ ឆ្នាំ ក្តី ក៏សង្កេតឃើញថា ទីផ្សារដើរលើវិថីសិល្បៈចម្រៀងរបស់នាងហាក់នៅតែទ្រឹង ឬស្ងាត់ជ្រងំដដែល។
មើលទៅក្តីរំពឹងថា នឹងលេចធ្លោពេលដូរមកកាន់ទ្រនំថ្មីរបស់តារាចម្រៀងស្រីសាច់សខ្ចីកញ្ញា ឈិត សុវណ្ណបញ្ញា នៅទ្រឹងតែម្តង ដែលធ្វើឲ្យនាងមិនអាចប្រជែងជាមួយកញ្ញា មាស សុខសោភា ទើបតែបានប្រកាសដើរចេញពីថោនថ្មីៗ ក្រោយជ្រកកោនជាង ៩ ឆ្នាំ និងកញ្ញា រ៉ាប៊ី ដែលជាតារាចម្រៀងរលកក្រោយកំពុងតែមានរាសីស្ទុះឡើងខ្លាំងពីសំណាក់អ្នកគាំទ្របែបយុវវ័យនោះ។
មហាជនដែលធ្លាប់តែគាំទ្រកញ្ញា ឈិត សុវណ្ណបញ្ញា នាអំឡុងពេលនៅជ្រកទ្រនំចាស់ហង្សមាសនោះ ក៏ចាប់ផ្តើមជជែកគ្នាជុំវិញរឿងទីផ្សារសិល្បៈរបស់ Idol ខ្លួន ដែរថា កាលនៅផលិតកម្មហង្សមាស ទោះបីមិនអាចប្រជែងតំណែងពីកំពូលតារាចម្រៀង ឱក សុគន្ធ កញ្ញា និង ពេជ្រ សោភា បានមែនក្តី ប៉ុន្តែសង្កេតឃើញថាបទចម្រៀងរបស់នាងមួយចំនួន គឺនៅតែល្បីហើយបទទាំងនោះ ក៏ត្រូវបានគេយកទៅច្រៀងតាមឆាកតន្ត្រី និងបៀរហ្គាដិន ជារឿយៗដូចជាបទ «ចំណែកលើស» ជាដើម។
តែតាំងពីមកជ្រកកោននៅទ្រនំថ្មីថោនមក Idol ឈិត សុវណ្ណបញ្ញា ហាក់ចុះខ្សោយជាងកាលនៅឯទ្រនំចាស់ហង្សមាសបើទោះមានសមត្ថភាពយ៉ាងណាក្តី នៅតែមិនអាចប្រជែងរកទីផ្សារចម្រៀងជាមួយនឹងកញ្ញា មាស សុខសោភា និងសិស្សប្អូនកញ្ញា រ៉ាប៊ី បាននោះឡើយ។ យ៉ាងណាតារាចម្រៀងស្រីកញ្ញា ឈិត សុវណ្ណបញ្ញា ក៏មិនអាចសុំការបកស្រាយចម្ងល់ប្រាប់ភ្នំពេញប៉ុស្តិ៍ ឲ្យដឹងពីដើមទងនៃការធ្លាក់ចុះ ឬភាពនៅទ្រឹងលើវិថីនៃសិល្បៈចម្រៀងរបស់នាងនៅទ្រនំថោន ដូចជាមហាជនលើកឡើងនោះទេ ដោយសារប្រព័ន្ធទូរស័ព្ទមិនអាចទាក់ទងបាន។
ក្រោយដើរចេញពីទ្រនំហង្សមាសបានជាង ២ ឆ្នាំ ទោះបីទីផ្សារសិល្បៈចម្រៀងតារាស្រីសំឡេងស្រាលស្រទន់ មានមុខមាត់កូនកាត់ចិន កញ្ញា ឈិត សុវណ្ណបញ្ញា ហាក់មិនសូវជាកាក់កបមែនក្តី តែគេក៏ឃើញនាងស្រវាបើកហាងអាហារដ្ឋានមួយឈ្មោះ «បឹងហ្គាឡូ» នៅផ្លូវ ៣១០ ផ្អើលមហាជនផងដែរ៕