ភ្នំពេញ៖ កាលដើមឆ្នាំ ២០១៩ អតីតស្រីស្អាតឆ្នាំ ២០១០ ស្រីស្រស់ឈ្មោះពិត ថៃ នារីសុជាតា ហៅ ហ្វីយ៉ាតា បង្ហើរសារ និងរូបភាពរំឭកកាលគ្រាផ្តើមស្នេហ៍ជាមួយកំណាន់ចិត្តថ្មីរាងសង្ហា មើលទៅមានត្រេមុខដូចជាកូនកាត់ បង្កើតការចាប់អារម្មណ៍ពីមហាជនសាជាថ្មី។
ជាមួយរូបឈរកៀកកិត ទឹកមុខស្រស់ស្រាយក្បែរម្ចាស់ចិត្តនោះ ហ្វីយ៉ាតា ក៏បង្ហើរសារវែងអន្លាយមួយជាភាសាអង់គ្លេស ដែលប្រែសម្រួលថា៖ «តោះ! មកមើលបណ្តុំរូបភាពនៅទីកន្លែងផ្តើមស្នេហ៍ដំបូងរបស់ពួកយើង! ពួកយើងបានវិលមកទីនេះ ដើម្បីធ្វើខួបអនុស្សាវរីយ៍នៃការបង្កើតភាពផ្អែមល្ហែមដំបូង នៅកន្លែងដដែល។ សូមរង់ចាំមើលវីដេអូខួប ១ ឆ្នាំ នៃការផ្តើមស្នេហ៍ពួកយើងផង នឹងចេញឆាប់ៗ ហើយជួយជាវតាមប៉ុស្តិ៍យូធូបផ្ទាល់ខ្លួនឈ្មោះ «Yata Fi» ផង! កុំភ្លេចណា!»។
មិនតែប៉ុណ្ណោះ អតីតជាស្រីស្អាតឆ្នាំ ២០១០ កញ្ញា ថៃ នារីសុជាតា ហៅ ហ្វីយ៉ាតា ដែលមហាជនផ្ទុះការចាប់អារម្មណ៍នឹងវត្តមាននាងពេលឈានជើងចូលដល់ផ្សារទំនើបអ៊ីអនម៉ល ក៏លេចវត្តមាននាងនៅក្នុងកញ្ចក់ទូរទស្សន៍ផ្សព្វផ្សាយផលិតផលស្ទើរតែនៅគ្រប់ច្រកល្ហកនាពេលកន្លងមកនោះ បន្តសារទៀតថា៖ «បន្ទាប់ពីយើងមានទំនាក់ទំនងគ្នា ១ ឆ្នាំមក រូបរាងអូននៅតែស្អាត ចំណែកឯបងវិញហាក់ឡើងគីឡូជាងមុន ហើយសក់វែងជាងមុនផងដែរ!»។
ជាងនេះទៅទៀត គេក៏ឃើញសារដ៏ផ្អែមល្ហែមរបស់កញ្ញា ហ្វីយ៉ាតា នាឱកាសបុណ្យចូលឆ្នាំកន្លងមកថា៖ «អូនស្រឡាញ់បង! គ្រប់ពេលដែលពួកយើងបានឆ្លងជាមួយគ្នា ខ្ញុំជឿថា ចំណងស្នេហ៍កាន់តែរឹងមាំ! យើងមិនដែលបញ្ឈប់ ហើយតែងតែរកវិធីណាដែលមានភាពល្អប្រសើរ សម្រាប់ឱកាសពួកយើងមានវត្តមានជាមួយគ្នា។ អូន ស្រឡាញ់រាល់អ្វី ដែលបងមានជារបស់ខ្លួនឯង!»។
ចំណែកឯមហាជនក៏ធ្លាប់លាន់មាត់បែបភ្ញាក់ផ្អើលផងដែរចំពោះវត្តមានរបស់កញ្ញា ថៃ នារីសុជាតា កាលពីថ្មីៗក្នុងការថតស្ប៉តនានាថា៖ «ស្រីស្អាត កូនស្រីអតីតរដ្ឋលេខាធិការក្រសួងវប្បធម៌ និងវិចិត្រសិល្បៈរូបនេះ ដូចជាបានបាត់វត្តមានពីឆាកសិល្បៈច្រើនឆ្នាំមកហើយនោះ ឥឡូវនេះ ស្រាប់តែលេចមុខវិញ!» ។
តារាស្រីស្រស់កញ្ញា ថៃ នារីសុជាតា ក៏បានប្រាប់អារម្មណ៍សប្បាយចិត្តថា៖ «ការងារនាងខ្ញុំទទួលមិនអស់ទេ ពេលនេះច្រើនណាស់។ ឆ្លងឆ្នាំ ២០១៩ ភ្លាមនាងខ្ញុំតាំងចិត្តថា នឹងក្តាប់ការងារសិល្បៈភ្លាមៗនេះក៏មានគេហៅថត ទាំងភាពយន្ត ថត MV ថត Show ផ្សេងៗច្រើនមែនទែន។ តែការងារថតភាពយន្តខ្ញុំក៏កំពុងតែស្ថិតនៅក្នុងដំណាក់កាលពិចារណា ព្រោះការថតកុនប្រើពេលយូរខ្ញុំមិនមានពេលថតឲ្យខ្លាចប៉ះពាល់ពេលវេលាឲ្យផលិតករ»៕