.jpg)
ក្រុងតូរ៉ុនតូ: ស្ដ្រីកាណាដាម្នាក់បាននឹកឃើញវិធីដ៏ប៉ិនប្រសប់មួយដើម្បីឱបម្ដាយប្រកបដោយសុវត្ថិភាព ទោះស្ថិតក្នុងអំឡុងពេលរីករាលដាលនៃជំងឺរាតត្បាតសកល។ ភាពច្នៃប្រឌិតនោះ គឺ «ស្រោមដៃឱបគ្នា» ជាថង់ប្លាស្ទីកកាត់រាងដៃមនុស្សចំនួន ៤ ចងព្យួរតាមខ្សែហាលខោអាវ។
ស្ថិតនៅភាគខាងត្បូងទីក្រុងហ្គែល នៃខេត្ដអុនតារីយ៉ូ អ្នកស្រី ខារ៉ូលីន អេលីស និងស្វាមី អាទ្រូ បានច្នៃបង្កើតនូវអ្វីដែលបានហៅថា «ស្រោមដៃឱបគ្នា» នៅមុនទិវាអ្នកម្ដាយមួយថ្ងៃ ដែលឆ្នាំនេះត្រូវបានប្រារឰឡើងនៅថ្ងៃទី ១០ ខែឧសភា នៅអាមេរិកខាងជើង។
អ្នកស្រី ខារ៉ូលីន បានប្រាប់ AFP ថា៖ «វាកើតឡើងនៅពេលគាត់មិនអាចឱបយើងបាន ហើយយើងពិតជាត្រូវការភាពកក់ក្ដៅនេះ។ ខ្ញុំចង់ឲ្យផ្ដល់ឱកាសឱបនេះដល់គាត់សម្រាប់ទិវាម្ដាយ»។
ពួកគេបានយកដៃអាវប្លាស្ទីកទៅភ្ជាប់ជាមួយតង់ប្លាស្ទីក ដែលអាចឲ្យមនុស្ស ២ នាក់ឱបគ្នាដោយមិនចាំបាច់ប៉ះសាច់ផ្ទាល់។ អ្នកស្រី ខារ៉ូលីន បានបញ្ជាក់ថា៖ «យើងត្រូវការពេលច្រើន លើការស្វែងយល់ពីទំហំ និងកម្ពស់នៃប្រឡោះទាំងនោះ។ យើងធ្វើការងាររហូតដល់យប់ថ្ងៃសៅរ៍ រួចយើងរៀបចំអ្វីៗគ្រប់យ៉ាងសម្រាប់ទិវាអ្នកម្ដាយនៅថ្ងៃអាទិត្យ។ វាជាកាដូដ៏អស្ចារ្យ»។
វីដេអូឃ្លីបដែលពួកគេថតនាឱកាសឱបក្រសោបគ្នាត្រូវបានចែករំលែកតាមបណ្ដាញសង្គម និងមានការល្បីភ្លាមៗ។ ប៉ុន្ដែអ្នកស្រី អេលលីស បានឲ្យដឹងថា អ្នកស្រីមានការភ្ញាក់ផ្អើលថា វាល្បីលឿនយ៉ាងនេះ។
អ្នកស្រី លើកឡើងថា៖ «ខ្ញុំគ្រាន់តែឱបម៉ាក់។ យើងមានការភ្ញាក់ផ្អើលពេលឃើញព័ត៌មានត្រូវបានចែករំលែកច្រើន តែក៏ពេញចិត្ដដែរ នៅពេលឃើញថា អ្នកដទៃកំពុងទទួលប្រយោជន៍ការឱបរបស់យើង។ យើងពិតជាចូលចិត្ដ»។
ទោះការឱបដោយប្រើរបាំងប្លាស្ទីកមិនស្និទ្ធដូចឱបគ្នាផ្ទាល់ វានៅតែផ្ដល់ភាពកក់ក្ដៅ ក្រោយពីការបិទប្រទេសជាច្រើនសប្ដាហ៍ និងវិធានការរក្សាគម្លាតសុវត្ថិភាពសង្គម ដែលអាចផ្ដល់ឱកាសឲ្យម្ដាយមកឱបកូនបាន។
អ្នកស្រី អេលីស បានបន្ដថា៖ «នេះជាសញ្ញាវិលត្រឡប់ទៅកាន់ប្រក្រតីបណ្ដើរៗ។ វាពិតជាផ្ដល់សេចក្ដីសង្ឃឹមដែលមិនអាចបំភ្លេចបាន។ អារម្មណ៍នៃភាពកក់ក្ដៅកើតឡើងការឱបរវាងម្ដាយ និងកូន តើអ្នកដឹងទេ វាពិតជាល្អណាស់»៕ AFP/HR
