ភ្នំពេញ៖ ក្រោយពីមករស់នៅ និងធ្វើការនៅទីក្រុងភ្នំពេញអស់ពេលប្រមាណ ៩ ឆ្នាំ មកតាមស្វាមីជាជនជាតិហូឡង់ ដែលបម្រើការងារក្នុងក្របខណ្ឌមន្រ្តីអង្គការសហប្រជាជាតិ គឺធ្វើការងារនៅសាលាក្តីខ្មែរក្រហមជិត ១០ ឆ្នាំមកនោះ ស្រ្តីជប៉ុនម្នាក់បានបង្កើតក្រុមតន្រ្តីក្លាស៊ីកឈ្មោះ Musica Felice Choir នៅឆ្នាំ ២០១៧ ហើយចាប់ផ្តើមដំណើរការប្រគំតន្រ្តីសប្បុរសធម៌លើកដំបូង ដើម្បីជួយសហគមន៍ក្រីក្រខ្មែរចាប់ពីពេលនោះមក។
ដោយក្តីអាណិតអាសូរ និងមានចំណូលចិត្តទៅលើវិស័យសិល្បៈក្លាស៊ីក ទើបជំរុញចិត្តឲ្យស្រ្តីជប៉ុនម្នាក់ គឺលោកស្រី មីវ៉ាកូ ហ៊្វូជិវ៉ារ៉ា (Miwako Fujiwara) បង្កើតការប្រគំតន្រ្តីបែបក្លាស៊ីកមួយឈ្មោះថា «Musica Felice Charity Concert» ដែលមានគោលបំណងចង់លើកស្ទួយវិស័យសិល្បៈតន្រ្តីក្លាស៊ីក ជាពិសេសគឺសម្រាប់ក្រុមសិល្បករ-ការិនីខ្មែរ ដែលមានជំនាញ ឬមានចំណូលចិត្តលើវិស័យសិល្បៈនេះ ដែលមិនសូវមានលទ្ធភាពផ្គត់ផ្គង់ជីវភាពគ្រួសារខ្លួនតាមជំនាញសិល្បៈនេះតែម្តង។
លោកស្រី មីវ៉ាកូ ហ៊្វូជិវ៉ារ៉ា បានឲ្យដឹងថា៖ «តាមពិតទៅ គម្រោងបង្កើតការប្រគំតន្រ្តីសប្បុរសធម៌នេះ យើងមានការផ្តួចផ្តើមតាំងពីឆ្នាំ ២០១៦ មក ខណៈការចាប់ផ្តើមប្រគំតន្រ្តីសប្បុរសធម៌លើកដំបូងរបស់យើង គឺបានចាប់ដំណើរការនៅខែ កញ្ញា ឆ្នាំ ២០១៧ ដែលធ្វើនៅក្នុងសណ្ឋាគារសូហ្វីតែលភូគីត្រា ខណៈកម្មវិធីនេះយើងបានប្រារព្ធចំនួន ២ ដង ក្នុង ១ ឆ្នាំ។
ក្រុមសិល្បករ-ការិនី របស់យើងមានទាំងអ្នកមានជំនាញ និងគ្មានជំនាញ មកពីបណ្តាប្រទេសនានានៅលើសកលលោក ហើយបើទោះបីពួកយើងមានជំនាញ និងប្រវត្តិរូបខុសគ្នាមែនក្តី តែពួកយើងមានចំណុចរួមមួយដូចគ្នា គឺចំណូលតន្រ្តីក្លាស៊ីកតែម្តង»។
លោកស្រី មីវ៉ាកូ ហ៊្វូជិវ៉ារ៉ា ជាតន្រ្តីករផ្នែកព្យ៉ាណូ និងជាអ្នកនិពន្ធចម្រៀងប្រពៃណីបែបសហសម័យ ជាពិសេសចាប់អារម្មណ៍សម្រាប់ឧបករណ៍តន្រ្តីប្រពៃណីខ្មែរតែម្តង។
ចំពោះប្រាក់ដែលបានពីការលក់សំបុត្រនៃការប្រគំតន្រ្តីសប្បុរសធម៌ទាំងអស់ ត្រូវបានយកទៅផ្គត់ផ្គង់ផ្នែកនានានៅក្នុងសហគមន៍ក្រីក្ររបស់ខ្មែរ ដោយក្នុងនោះ មានក្រុមអ្នកសិល្បៈបុរាណវ័យក្មេង និងតន្រ្តីករមានទេពកោសល្យ ដែលមានចិត្តស្រឡាញ់ជំនាញនេះ តែខ្វះលទ្ធភាពបង់ថ្លៃសិក្សា និងជួយផ្គត់ផ្គង់ដល់សាលា ឬអង្គការដែលបង្រៀនផ្នែកសិល្បៈដល់កុមារក្រីក្រ ដើម្បីជាទុនសម្រាប់ការបង្កើតមុខរបរចិញ្ចឹមជីវិត។
លោកស្រី មីវ៉ាកូ ហ៊្វូជិវ៉ារ៉ា គឺជាស្រ្តីជាតិជប៉ុន មានស្វាមីជនជាតិហូឡង់ និងមានកូន ២ នាក់ (ស្រី ១ និងប្រុស ១) ដែលបានមករស់នៅស្រុកខ្មែរ បានបន្តថា៖ «ចាប់តាំងពីបានបង្កើតកម្មវិធីប្រគំតន្រ្តីសប្បុរសធម៌ កាលពីឆ្នាំ ២០១៧ មកនោះ យើងបានរៀបចំចំនួន ៥ ដងរួចមកហើយ ខណៈនៅល្ងាចថ្ងៃសៅរ៍ទី ៣០ ខែ វិច្ឆិកា ឆ្នាំ ២០១៩ ខាងមុខនេះ គឺជាការប្រារព្ធធ្វើលើកទី ៦ របស់ក្រុមតន្រ្តីករ Musica Felice Choir។
យើងក៏មានក្តីរំពឹងថា នឹងមានអ្នកចូលរួមទស្សនាចំនួន ១ ០០០ នាក់ មកចូលរួមនៅឯសណ្ឋាគារសូហ្វីតែលភូគីត្រាក្នុងរាជធានីភ្នំពេញ។ ម្យ៉ាងវិញទៀត សម្រាប់ការប្រគំតន្រ្តីលើកទី ៦ នេះផងដែរ យើងក៏មានគោលដៅសម្រាប់នាំយកថវិកាបានពីការលក់សំបុត្រ ដើម្បីទៅជួយដល់សហគមន៍ខ្មែរ ២ កន្លែង គឺមជ្ឈមណ្ឌបណ្តុះបណ្តាលវិជ្ជាជីវៈចាន់ដារារីករាយ( HappyChandara Vocational Training Center) និងសាលាតន្រ្តីភូមិភ្លេង (Phum Pleng music school)»។
ចំពោះតម្លៃសំបុត្រចូលទស្សនាការប្រគំតន្រ្តីសប្បុរសធម៌របស់លោកស្រី មីវ៉ាកូ ហ៊្វូជិវ៉ារ៉ា តាមរយៈក្រុម Musica Felice Choir ក៏នឹងចាប់ផ្តើមលក់សំបុត្រនៅក្នុងខែ វិច្ឆិកា ចុងឆ្នាំ ២០១៩ ផងដែរ ដោយអាចរកជាវបាននៅសណ្ឋាគារសូហ្វីតែលភូគីត្រា និងហាងកាហ្វេ (Socials coffee) ដែលស្ថិតនៅលើដងមហាវិថីព្រះនរោត្តម។
សំបុត្រទស្សនា ១ តម្លៃ ១០ ដុល្លារ សម្រាប់មនុស្សពេញវ័យ ១ សន្លឹក សម្រាប់ក្មេងមានវ័យចន្លោះពី ៥ ឆ្នាំ ទៅដល់ ១៥ ឆ្នាំ ខណៈ ១ សន្លឹក តម្លៃ ៣ ដុល្លារ សម្រាប់និស្សិតខ្មែរ និងទស្សនាឥតគិតថ្លៃសម្រាប់ក្មេងដែលមានវ័យនៅក្រោម ៥ ឆ្នាំតែប៉ុណ្ណោះ៕