ខេត្តសៀមរាប៖ ដោយសារមើលឃើញពីស្ថានភាពកុមារនៅតាមភូមិឋាននៃទីជនបទ មិនមានឱកាសអាចទទួលបានការសិក្សាតាមអនឡាញដូចជាកុមារនៅទីក្រុង នាពេលសាលាផ្អាកក្នុងគ្រាមានវិបត្តិកូវីដនេះ ស្រ្តីវ័យ ២០ ឆ្នាំប្លាយម្នាក់នឹកឃើញស្ម័គ្រចិត្តបង្កើតបណ្តាល័យភូមិ ដើម្បីជួយដល់កុមារា-កុមារី នៅក្នុងសហគមន៍អាចចូលអានសៀវភៅក្រេបចំណេះដឹង បំពេញពន្លឺវិជ្ជា។
ចំពោះបណ្ណាល័យភូមិនោះ ក៏បានបង្កើតភាពភ្ញាក់ផ្អើលពេញបណ្តាញសង្គម ខណៈគេឃើញលេចចេញគណនីហ្វេសប៊ុកឈ្មោះ Soth Bopha ឬម្ចាស់គណនីឈ្មោះកញ្ញា សុទ្ធ បុប្ផា ដែលជាអ្នកផ្តើមគំនិតបង្កើត «បណ្ណាល័យភូមិអារក្សស្វាយ» នោះ ខណៈពេលនេះមានសៀវភៅសរុបជាង ៣០០ ក្បាល ទៅដាក់ទុកឲ្យកុមារ និងបងប្អូនខ្មែរក្នុងសហគមន៍នៃភូមិអារក្សស្វាយ សង្កាត់នគរធំ ក្រុងសៀមរាប នៅតំបន់ព្រៃអង្គរ ក្បែរស្រះស្រង់បានចូលអានជាបណ្តើរៗមកហើយ។
កញ្ញា សុទ្ធ បុប្ផា ជាអ្នកផ្តួចផ្តើមបង្កើតបណ្ណាល័យភូមិអារក្សស្វាយ ដែលបានស្នើសុំផ្ទះអ្នកភូមិឈ្មោះ ដា ខណៈអ្នកទាំង ២ ស្គាល់គ្នា និងរាប់អានគ្នាជិត ៣ ឆ្នាំហើយ។ កញ្ញា បុប្ផា បានបញ្ជាក់ពីគោលបំណងដែរថា៖ «ព្រោះតែនាងខ្ញុំសង្កេតឃើញថា ក្រុមក្មេងៗក្នុងភូមិនេះ ក្រៅពីមិនបានទៅរៀនដោយសារតែសាលាបិទនាអំឡុងពេលមានវិបត្តិដោយជំងឺកូវីដ ១៩ ក៏អត់មានឱកាសរៀនសូត្រតាមទូរទស្សន៍ ឬអ៊ីនធឺណិត (រៀនអនឡាញ) ទៀតនោះ អាណិតពួកគាត់ ទើបនឹកគិតបង្កើតបណ្ណាល័យភូមិអារក្សស្វាយនេះឡើង ក្រែងអាចជួយឲ្យពួកគាត់បានរៀនសូត្រយកចំណេះវិជ្ជាខ្លះ ក្នុងគ្រាមានវិបត្តិនេះ។ ឥឡូវ ខ្ញុំទទួលបានសៀវភៅពីការបរិច្ចាគ និងទិញខ្លះចំនួនជាង ៣០០ ក្បាលហើយ។ ខណៈសៀវភៅមានលក្ខណៈចម្រុះ មិនមែនមានតែសៀវភៅកុមារនោះឡើយ គឺមានទាំងមនុស្សចាស់ដែរ អាចចូលអានបាន»។
កញ្ញា សុទ្ធ បុប្ផា បន្តថា៖ «នេះជាការសាកល្បងសម្រាប់គំនិតជាគម្រោងធំមួយរបស់នាងខ្ញុំដែរ ប្រសិនបើការបើកបណ្ណាល័យភូមិអារក្សនេះ អាចដំណើរការទៅបានល្អ ដោយមានកុមារទាំងឡាយក្នុងសហគមន៍ចូលអានសៀវភៅក្រេបចំណេះដឹងបានច្រើន ហើយមានអ្នកជួយឧបត្ថម្ភ បន្តបន្ទាប់នោះ គឺនាងខ្ញុំនឹងបន្តធ្វើកិច្ចការស្ម័គ្រចិត្តផងដែរ»។
ប្រសិនបើ បងប្អូនមានទឹកចិត្តសប្បុរសចង់ឧបត្ថម្ភសម្ភារសិក្សា ឬបរិច្ចាគថវិកា សម្រាប់ទិញសៀវភៅ សូមទំនាក់ទំនងកញ្ញា សុទ្ធ បុប្ផា តាមលេខទូរស័ព្ទ 077 64 64 19 ឬហ្វេសប៊ុក Soth Bopha៕