ភ្នំពេញៈ ថ្មីៗនេះស្រាប់តែលេចវត្តមានតារាសម្តែងស្រីជើងចាស់អុ្នកនាង ស្វែង សុជាតា ថតរូបជាមួយនឹងតារាសម្តែងប្រុសជើងចាស់ និងជាផលិតករចិនហុងកុងដ៏ល្បីលោក អេរីក តាំង (Eric Tsang) នៅស្រុកខ្មែរ ហើយក៏លេចដំណឹងបន្ទរបែបឆ្ងល់ថា តារាស្រីរូបនេះកាក់កបតែថតឲ្យផលិតកម្មអន្តរជាតិ ខណៈផលិតកម្មក្នុងស្រុកដូចជាស្ងាត់ឈឹង និងមិនមានឃើញក្នុងកុនខ្មែរថ្មីសោះ។
តែការងឿងឆ្ងល់យ៉ាងខ្លាំងក្នុងពេលថ្មីៗនេះក៏ស្រាប់តែតារាសម្តែងស្រីដែលសម្បូរទេពកោសល្យអ្នកនាង ស្វែង សុជាតា បង្ហើបឲ្យដឹងពីដំណឹងភ្លាមៗថា៖ «អត់ទេ!តាមពិតទៅរឿងថតកុននោះ នាងខ្ញុំថតឲ្យទាំងផលិតកម្មក្នុង និងក្រៅស្រុក មិនបានប្រកាន់ថា ទាល់តែផលិតកម្មអន្តរជាតិ ទើបទទួលថតនោះទេ។ ផលិតកម្មក្នុងស្រុក នាងខ្ញុំបានថតឲ្យផលិតកម្មទូរទស្សន៍នានាដូចជាប៉ុស្តិ៍លេខ ៥ ប៉ុស្តិ៍ PNN និងប៉ុស្តិ៍ CTN ជាដើមគឺសឹងតែគ្មានពេលទំនេរឡើយ»។
ខណៈពេលបច្ចុប្បន្ននេះគេតែងតែឃើញស្វាមី និងអ្នកនាង ស្វែង សុជាតា បាន Lives វីដេអូ តាមហ្វេសប៊ុកប្រកាសផ្សាយពីដំណឹងបន្តលក់ថ្នាំឱសថបុរាណដូចកាលពីមុន គ្រាន់តែជាការប្រកបរបរកំប៉ិកកំប៉ុកបែបលក្ខណៈគ្រួសារតែប៉ុណ្ណោះ ហើយតារាស្រីរូបនេះក៏មិនទាន់បានប្រកាសថាបោះបង់ចោលការងារសិល្បៈថតកុនដែរនោះបានបន្តថា៖ «ចំពោះកុនដុំ ដែលនាងខ្ញុំ នឹងសម្តែងឲ្យផលិតកម្មអន្តរជាតិមួយគឺជាការសហការគ្នារវាងផលិតកម្មរបស់តារាសម្តែងប្រុសជើងចាស់ និងផលិតករចិនលោក Eric Tsang និងផលិតករលោក Jimmy Henderson»។
ចំពោះកុនដុំដែលមានចំណងជើងថា «ទេវតាការពារ» នោះ បើតាមការប្រកាសឲ្យដឹងពីផលិតកម្មដូចជាត្រូវចំណាយប្រាក់អស់ ១ លានដុល្លារ។ សម្រាប់នាងខ្ញុំនៅក្នុងរឿងនេះគ្រាន់តែបានសម្តែងជាតួបន្ទាប់បន្សំតែប៉ុណ្ណោះ»។
តាមធម្មតានាពេលកន្លងមកគឺថាតារាសម្តែងស្រីសម្បូរទេពកោសល្យរូបនេះ មិនសូវជាមានការរអ៊ូរទាំពីរឿងមានការលំបាកនៅក្នុងការថតសម្តែងកុនឡើយទាំងផលិតកម្មក្នុងស្រុក និងក្រៅស្រុក ជាពិសេសនោះសូម្បីតែការថតឲ្យតារាស្រី និងអ្នកដឹកនាំរឿងល្បីរបស់ហូលីវូដ អ្នកស្រី អេនជេលីណា ជោលី ជាដើម។ តែលើកនេះអ្នកនាង ស្វែង សុជាតា ក៏ស្រាប់តែនិយាយថា៖ « ប្រសិនបើកុនជាភាសាអង់គ្លេសនោះគឺនាងខ្ញុំអត់មានបញ្ហាឡើយ តែកុននេះមានប៉ារ៉ូលជាអក្សរភាសាចិន ដូចជាមានការលំបាកខ្លះដែរសម្រាប់នាងខ្ញុំក្នុងការបន្លឺសូរសំឡេងឲ្យត្រូវ បើទោះបីត្រូវកត់សូរជាភាសាខ្មែរយកមកមើលក៏ដោយ»៕