ភ្នំពេញ៖ ដោយសារតែការចូលមើលខ្សែវីដេអូឃ្លីបខ្លីៗនៃប៉ុស្តិ៍យូធូបមានឈ្មោះថា Yong Ye Channel ពីសំណាក់កូនតូចរបស់ខ្លួន ហើយក៏ជះឥទ្ធិពលមិនល្អ តាមការចម្លងពាក្យសម្តីមិនសមរម្យនានាមកប្រតិបត្តិជាមួយបងខ្លួននោះ ទើបអ្នកនាង ស្វែង សុជាតា ទ្រាំលែងបានក៏ចេញសារបង្ហាញពីការមិនពេញចិត្តតែម្តង។
បើពិនិត្យតាមធម្មតានោះ តារាសម្តែងស្រីសម្បូរទេពកោសល្យ ស្វែង សុជាតា រូបនេះ មិនសូវជាមានការរអ៊ូនឹងអ្វីទាក់ទងនឹងបញ្ហាសង្គមនោះទេ តែលើកនេះ ហាក់ដូចជាសម្តែងការព្រួយបារម្ភពីឥទ្ធិពលនៃពាក្យសម្តីនេះខ្លាំងណាស់ ដែលកំពុងតែសាបព្រោះគ្រាប់ពូជយ៉ាងលឿនផងដែរ ជាពិសេសពីសំណាក់កុមារា-កុមារី ជាមួយខ្សែវីដេអូមួយចំនួន ដែលមានការសម្តែងដោយក្រុមកុមារាកុមារី និងមនុស្សធំដែរ ពីប៉ុស្តិ៍ Yong Ye Channel នោះ។
ជាការកត់សម្គាល់ ឃើញចំនួនចូលមើលច្រើនរហូតដល់ទៅរាប់សិបលាននាក់ (Viewers ) តួយ៉ាងដូចជា ខ្សែវីដេអូមួយ មានចំណងជើងថា «ជីធម្មជាតិ UPLML Nano» មានអ្នកមើល ៣៣ លាននាក់ ឬ 33 M Viwers។
ដូច្នេះហើយ ទើបបានជាតារាសម្តែងស្រីអ្នកនាង ស្វែង សុជាតា សរសេរបង្ហោះអមនឹងរូបភាពមានក្រុមខាងលើថា៖ «នាងខ្ញុំក៏មិនសប្បាយចិត្តទេ ពេលឮកូនតូចរបស់ខ្ញុំ និយាយតាមនូវពាក្យមិនគួរគប្បីមួយចំនួនរបស់ក្រុមក្មេងៗនេះ មានពាក្យខ្លះ សូម្បីតែបងប្រុសរបស់គេ មានអាយុ 17 ឆ្នាំ មិនដែលហ៊ាននិយាយ តែបែរជាគេអាយុ 4 ឆ្នាំ ហ៊ាននិយាយនូវពាក្យអសុរោះនេះ រហូតត្រូវ បងប្រុសរបស់គេកំពុងតែស្អប់បំផុត រាល់ពេលឮសំឡេងក្មេងៗអស់នេះ ចេញពីវីដេអូ ដែលប្អូនគេកំពុងមើល។ បើអាចបិទចោល ដូចជាគំនូរជីវចលជីងចាំងក៏ល្អដែរ ការពារទំពាំងត្រូវគេយកទៅធ្វើជ្រក់អស់!»។
ពាក់ព័ន្ធនឹងក្តីបារម្ភនៃឥទ្ធិពលពាក្យសម្តីមិនល្អនានាចេញពីប្រភពវីដេអូឃ្លីបខ្លីៗ ប៉ុស្តិ៍ Yong Ye Channel អ្នកនាង ស្វែង សុជាតា ក៏មិនបញ្ជាក់បន្ថែមដែរ ខណៈភ្នំពេញ ប៉ុស្តិ៍ បានទាក់ទងតាមលេខទូរស័ព្ទទាំង ២ ប្រព័ន្ធចូល តែគ្មានអ្នកលើក ដោយសារតែជាប់រវល់ថតកុន នេះបើតាមការបង្ហើបពីស្វាមីរបស់គាត់ តាមទូរស័ព្ទមួយខ្សែផ្សេងទៀត នាពេលរសៀលថ្ងៃម្សិលមិញដូចគ្នានោះ។
ក្រៅពីសារចូល Comments យល់ស្របមតិរបស់អ្នកនាង ស្វែង សុជាតា ចំពោះឥទ្ធិពលមិនល្អតាមរយៈពាក្យសម្តីនៃវីដេអូនោះ ក៏មានអ្នកជំទាស់ផងដែរ។
ដូចជាមានម្នាក់សរសេរថា៖ «ខ្ញុំគាំទ្រអ្នកមីង តាំងតែពីខ្ញុំនៅតូច តាំងតែពីខ្ញុំស្គាល់អ្វីហៅថា ការសម្តែង គ្រប់ការសម្តែងរបស់អ្នកមីងគឺធ្វើឲ្យខ្ញុំមានអារម្មណ៍ថា សិល្បៈខ្មែរអស្ចារ្យ។ តែខ្ញុំអន់ចិត្តនឹងអ្វីដែលអ្នកមីង និយាយទៅលើក្រុមក្មេងៗទាំងនេះ។ ធម្មតាពាក្យថា សិល្បៈនៃការសម្តែង គឺវាគ្មានព្រំដែនទេ ហេតុអីអ្នកមីងចិត្តចង្អៀត នឹងការសម្តែងពួកគាត់។ ទទួលស្គាល់ថា ពាក្យខ្លះមិនសមរម្យ តែក្នុង Video របស់ពួកគាត់ភាគច្រើន គឺអប់រំ...»៕