The Phnom Penh Post Search

Search form




Logo of Phnom Penh Post newspaper Phnom Penh Post - ស្វែង សុជាតា ជួប​លាភ​ធំ​ចុងឆ្នាំ​បាន​ សម្ដែង​ក្នុង​ភាព​យន្ដ​របស់​ ជោលី




ស្វែង សុជាតា ជួប​លាភ​ធំ​ចុងឆ្នាំ​បាន​ សម្ដែង​ក្នុង​ភាព​យន្ដ​របស់​ ជោលី

Content image - Phnom Penh Post
រូបថត​គ្រួសារ​ ដែល​មាន​អ្នកនាង​ ស្វែង​ សុជាតា ដើរតួជា​ម្ដាយ។ Pax Jolie Pitt

ស្វែង សុជាតា ជួប​លាភ​ធំ​ចុងឆ្នាំ​បាន​ សម្ដែង​ក្នុង​ភាព​យន្ដ​របស់​ ជោលី

ភ្នំពេញ: តារា​សម្តែង​ស្រី​សម្បូរទេព​កោសល្យ​​ខាងតួ​ដើរ​កាច​ឆ្នាស់ ស្រគត់​ស្រគំ តួ​ជា​ម្តាយ​ដ៏​ប៉ិន​ប្រសប់ និងជា​ម្ចាស់​ពានរង្វាន់​អាណាចក្រ​​តារា​ពីរ​ឆ្នាំជាប់​គ្នា​ អ្នក​នាង ស្វែង សុជាតា​ ​ជួប​លាភធំ​នៅ​ឆ្នាំ ២០១៥ នេះ ដោយ​បាន​ក្លាយ​ជា​តួ​អង្គ​ស្រី​សម្តែង​ជា​ម្តាយ​នៃ​គ្រួសារ​មួយ​ក្នុង​ខ្សែ​ភាព​យន្ដ​ឆ្លុះ​បញ្ចាំង​ពី​សម័យ​ខ្មែរ​ក្រហម​រឿង «ដំបូង​ពួកគេ​សម្លាប់ឪពុក​របស់​ខ្ញុំ»​ ដែល​ដឹក​នាំ​សម្តែង​តារា​ហូលីវូដ​ល្បី​ អ្នកស្រី អេនជេលីណា ជោលី។

ខណៈឱកាស និង​​ប្រជា​ប្រិយ​ភាព​លើ​វិថី​សិល្បៈ​ភាពយន្ដ​របស់​តារា​សម្តែង​ស្រី ​​ធ្លាក់​ចុះ​នា​រយៈ​ប៉ុន្មានឆ្នាំដែល​អ្នក​នាង ស្វែង សុជាតា ​មាន​ជំងឺ​រ៉ាំរ៉ៃ​ និងធ្លាក់​ខ្លួន​រហូត​ដល់​នៅត្រឹម​បន្ទប់​ជួល​នោះ ស្រាប់​តែយី​អ៊ុននៅ​ចុង​ឆ្នាំ ២០១៥ របស់​តារា​ស្រី​រូប​នេះ​ មានទឹក​មាត់​លេប​ឡើង​វិញ​ស្រឺត​ៗ តែ​ម្ដង​ដោយឮល្ហៀងៗថា អ្នក​នាង​កំពុង​តែក្លាយ​ជា​តួ​សម្តែងម្នាក់​​ក្នុង​ការ​​ថត​ខ្សែ​ភាពយន្ដ​របស់​តារាស្រីហូលីវូដ​ និង​អ្នក​ដឹកនាំ​រឿង​អាមេរិក​​ អ្នកស្រី អេន​ជេលី​ណា​ ជោលី​។ ​

តារា​សម្ដែង ស្វែង សុជាតា។
តារា​សម្ដែង ស្វែង សុជាតា។ ផា លីណា

តាម​រូប​ថត​មួយ​សន្លឹក​មានសមាជិក​ក្រុម​គ្រួសារ​សរុប​ចំនួន ៩ នាក់ ឈរ​ថតរូប​នៅ​មុខ​ប្រាសាទ​អង្គរ​វត្ត​ ដែល​មាន​ទិដ្ឋ​ភាពស្រអាប់ៗ​ដូច​ជារូបថត​ដ៏​ចំណាស់​ដូច​​កាល​សម័យ​ទស​វត្សរ៍​ទី ៧០​ ដែល​ថត​រូប​ដោយ ផេក ជូលី ភីត (Pax Jolie Pitt) ជា​កូន​ចិញ្ចឹមទី ២ ជន​ជាតិ​វៀតណាម​របស់​អ្នក​ស្រី អេន​ជេលី​ណា​ ជោលី​នោះ សបញ្ជាក់​​ឲ្យ​ឃើញ តួស្រី​សម្តែង​ស្រី​ខ្មែរ​អ្នក​នាង​ ស្វែង​ សុជាតា បាន​ដើរ​តួ​អង្គ​ជា​ម្តាយ​។

អ្នក​នាង ស្វែង​ សុជាតា បាន​បញ្ជាក់​ប្រាប់​ភ្នំពេញ​ប៉ុស្តិ៍​កាល​ពី​ថ្ងៃទី ៨​ ខែ​ធ្នូ​បញ្ជាក់​នូវ​រូប​ថត​ខាង​លើ​នោះដែរ​ថា៖ «ចាស!ពិតណាស់​​នាង​ខ្ញុំ​ពិត​ជា​បាន​ក្លាយ​ជា​តួ​អង្គ​ស្រីសម្តែង​ម្នាក់​នៅ​ក្នុង​ការ​ថត​កុន​រឿង​ ​«ដំបូង​ពួកគេសម្លាប់​ឪពុក​របស់​ខ្ញុំ» ​ ដែល​ជា​វណ្ណកម្ម ​ដឹក​នាំរឿង​របស់​តារា​ស្រី​ហូលីវូដនោះ​មែន។​​ នាង​ខ្ញុំ​សម្តែងជា​តួអង្គ​​ម្តាយ​ ហើយ​ការ​ថត​ចាប់​ពី​ខែ​ឆ្នូនេះបន្ដ​រហូត​ដល់​ខែ​មករា ឬ​កុម្ភៈ​ឆ្នាំ ២០១៦ ឯ​ណោះ​»។ ​

ដោយ​ឡែក​បើ​តាម​ដំណឹង​ប្រកាស​ជ្រើស​ទី​តាំង​ដើម្បីថត​រឿង​កាល​ពី​ខែ​កញ្ញា​ឆ្នាំ ២០១៥ កន្លង​មក​ ឃើញ​ថា​មាន​ខេត្ត​ចំនួន​ពីរ​ត្រូវ​​បាន​ជ្រើស​រើស​យកមកថត​កុនក្នុង​​រឿង​ «ដំបូង​ពួកគេ​សម្លាប់​ឪពុក​របស់​ខ្ញុំ» គឺ​ទឹកដី​ខេត្ត​សៀមរាប និង​ខេត្ត​បាត់​ដំបង ខណៈ​តួ​អង្គ​​សម្តែង​ភាគ​ច្រើន​ត្រូវ​ផ្ដល់​ឱកាស​ដល់​ប្រជាជន​ខ្មែរ​ដែល​មាន​ទេព​កោសល្យ តែ​មក​ទល់​ពេលនេះ ​គេ​នៅ​ពុំ​ទាន់​ដឹង​ច្បាស់​ថា​​មាន​តារា​ភាព​យន្ដ​ប៉ុន្មាន​រូប​មាន​សំណាង​ដែល​​ត្រូវ​បាន​ជ្រើសជា​តួ​សម្តែង ក្នុង​ភាពយន្ដ​ឆ្លុះ​បញ្ចាំង​ពី​ខ្សែ​ជីវិត​ក្នុង​ប្រវត្តិសាស្រ្ដ​ដ៏ជូរចត់​ដែល​ដឹក​នាំ​ដោយ​ អេនជេលីណា ជោលី នៅឡើយទេ​។

តែ​បើ​តាម​ប្រភព​អ្នក​នាង ស្វែង សុជាតា បាន​បង្ហើប​ឲ្យ​ដឹង​ថា៖ «សម្រាប់​តួ​សម្តែង​ជា​សិល្បករ និង​សិល្បការិនី​ខ្មែរ​ប៉ុន្មាន​រូប​នោះ នាង​ខ្ញុំ​មិន​បាន​ដឹងច្បាស់​ទេ​»។

យ៉ាង​ណា​មិញ តារា​សម្ដែង​ស្រី​ល្បី​ដោយ​សារ​តំណែងតួ​កាច​ឆ្នាស់​ឆ្នើម​រូប​នេះ បង្ហើប​​ឲ្យដឹង​ថា៖ «តែ​សម្រាប់​តួ​ស្រីសម្តែង​ជា​ម្តាយ​​គឺ​មានរូប​នាងខ្ញុំ ហើយ​តួ​ប្រុស​សម្តែង​ជា​ឪពុក​គឺ​ជា​លោក ភឿង កុម្ភៈ​ ដែល​លោកជា​អ្នក​បក​ប្រែ​បម្រើ​ការ​ងារ​នៅ​សាលាក្តី​ខ្មែរក្រហម។ ចំណែក​តួ​ប្រុស​ដទៃ​ទៀត​រួម​មាន លោក ហម ឆរ៉ា លោក រស់ មុនី និងមាន​លោក នុត សុផល»។

បើ​យោង​តាម​ប្រភព​ព័ត៌មាន Bophana Productions បាន​ឲ្យ​ដឹង​ថា ប្រជាពល​រដ្ឋ​ខ្មែរ រួម​ទាំងសិល្បករ​ និង​សិល្ប​ការិនី​​នោះ​មាន​ចំនួន​ជាង ៥០០ នាក់​នឹង​ចូលរួម​ថត​ ហើយ​ភាពយន្ដ​នេះ​នឹងសម្ពោធ​តាម​ប្រព័ន្ធ​ចែកចាយ​​ឌីជីថល​នៅ​ចុង​ឆ្នាំ​ ២០១៦ ព្រម​ទាំងដាក់​ប្រកួត​ដណ្ដើម​យក​ពាន​រង្វាន់​ពីកម្មវិធី​មហោ​ស្រព​ភាពយន្ដ​ល្បីៗ​នៅ​បរទេសផង​ដែរ៕​​

អត្ថបទគួរចាប់អារម្មណ៍