.jpg)
តារាសម្ដែង អ្នកនាង ស្វែង សុជាតា កាច់រាងបង្ហាញម៉ូដ រំលេចពីការថែសម្រស់។ ហ្វេសប៊ុក
ភ្នំពេញ: អ្នកនាង ស្វែង សុជាតា ងារជាកំពូលតារាពូកែសម្តែងចរិតកាចឆ្នាស ដែលពេលនេះកំពុងសំងំសោយសុខលើបង្គងជីវិតគូស្នេហ៍ក្រៅខាន់ស្លានឹងស្វាមីវ័យក្មេងខ្ចីជាងខ្លួនដែលជាអតីតសង្ឃសុំសីលនៅភ្នំគូលែននោះ តារាស្រីរូបនេះក៏ប្រឹងយ៉ាងខ្លាំងលើការងារសិល្បៈ ហើយក៏ប្រកាសពីជំហរកាច់រាងឲ្យទាក់ទាញលើវិថីអាជីពនេះផងដែរ។
ថ្មីៗនេះតារាសម្តែងកាចឆ្នាសឆ្នើមអ្នកនាង ស្វែង សុជាតា ត្រូវបានគេប្រទះឃើញរូបថតជាច្រើនសន្លឹក ដែលនាងបង្ហោះក្នុងគណនីហ្វេសប៊ុក ដែលហ៊ុមព័ទ្ធដោយស្លៀកសម្លៀកបំពាក់បែបស៊ីវិល័យសម័យថ្មីធ្វើឲ្យអ្នកគាំទ្រកោតសរសើរពីសម្រស់របស់នាង។
ភ្ជាប់នឹងរូបភាពដែលគ្របដណ្តប់ដោយរ៉ូបវែង ក្នុងពណ៌ចម្រុះប្រៀបនឹងរោមខ្លានោះ អ្នកនាងក៏បង្ហាញថា៖ «រូបថតទាំងអស់នេះ គឺថតទុកជាអនុស្សាវរីយ៍ និងចង់ប្រៀបធៀបរូបសម្រស់ពេល ១០ ឆ្នាំក្រោយប្រែជាយ៉ាងណា?»។
ដោយសារតែកន្លងមក គេច្រើនតែឃើញតារាក្មេងៗដែលជាសិល្បៈពន្លកថ្មី នាំគ្នាបង្អួតសម្រស់ជាមួយស្ទីលថត រូប កាច់រាងប្លែកៗ តាម បែបផែនរៀងៗខ្លួនបង្អួតគ្នាពេញហ្វេសប៊ុក ប៉ុន្ដែលើកនេះ ស្រាប់តែតារាស្រីជើងចាស់ ស្វែង សុជាតា បញ្ចេញភាពសិចស៊ីជាមួយស្ទីលគួរ ឲ្យទាក់ទាញមិនចាញ់ សិល្បករពន្លកក្រោយវិញម្ដង ជាមួយការទាក់ទាញចំណាប់អារម្មណ៍ផ្ទឹម រូបសម្ផស្សកាលពីដប់ឆ្នាំមុន។
ឆ្លើយតបនឹងការប្រៀបធៀបរូបសម្រស់នាបច្ចុប្បន្នទៅនឹងអតីតកាលកន្លង ១ ទសវត្សរ៍នេះដែរ តារាស្រីរូបនេះបានប្រាប់ភ្នំពេញប៉ុស្តិ៍តាមបណ្តាញសង្គមថា៖ «មិននិយាយលេងទេ ទោះយ៉ាងណា យើងជាស្ត្រី ហើយក៏ជាតារាទៀត អារឿងថែរក្សាសម្រស់នេះ ចាំបាច់ត្រូវគិតគូរឲ្យខ្លាំង»។
បន្ថែមពីហេតុផលខ្លាចប្រឈមការថយចុះទីផ្សារសិល្បៈ ដោយសារការធ្វេសប្រហែសរឿងរូបសម្រស់នេះដែរ អ្នកនាងថា៖ «មិនបានទេ ការលេងកុន បើយើងមានតែសមត្ថភាពសម្តែង តែបើរូបសម្រស់យើងចេះតែធ្លាក់ចុះតាមវ័យនោះ ទីផ្សារសម្តែងខ្លាំងយ៉ាងណា ក៏ទប់មិនជាប់ដែរ អ៊ីចឹងហើយចាំបាច់ត្រូវគិតពីរឿងនេះដែរ»។
ក្រោយពីជោគជ័យសម្តែងភាពយន្តកម្រិតហូលីវូដ ឲ្យកំពូលតារាហូលីវូដ អេនជេលីណា ជោលី រឿង «មុនដំបូងខ្មែរក្រហមសម្លាប់ប៉ាខ្ញុំ» ឃើញថា ជីវិតអ្នកនាង ស្វែង សុជាតា ក៏មានភាពស្រស់ថ្លាជាងមុនទាំងជីវភាពក៏ធូរធារដែរ។
តារាស្រី កំណើតពីខេត្តព្រៃវែង រូបនេះនិយាយថា៖ «ទីផ្សារសម្តែងសិល្បៈដ្បិតមុននេះ យើងមានឈ្មោះហើយ តែក្រោយពីសម្តែងរឿងកម្រិតហូលីវូដ ទីផ្សារកេរ្តិ៍ឈ្មោះកាន់តែទទួលការចាប់អារម្មណ៍ មានរឿងសម្តែងច្រើន រីឯរបរលក់ថ្នាំខ្មែរផ្សំពីគ្រូក្មេងនោះក៏មានការចាប់អារម្មណ៍ច្រើនដែរ។ តែយ៉ាងណា ខ្ញុំក៏ប្រឹងពង្រឹងការងារសិល្បៈដែរ ព្រោះនេះជាឆ្នាំងបាយធំ ហើយក៏ជាការងារដែលយើងស្រឡាញ់ អ៊ីចឹងហើយការថែសម្រស់ក៏ប្រឹងតាមហ្នឹងដែរ»៕
