.jpg)
សាឡនសម្រាប់អ្នកកែភេទដូចគ្នា ដើម្បីបញ្ចៀសអារម្មណ៍រើសអើង។ រូបថត AFP
ក្រុងការ៉ាជី៖ ហាងសម្អាងកាយរបស់ Bebo Haider រំលេចពណ៌ស្រស់ មានទំហំតូច និងតាំងរូបថតធំៗ ៣ សន្លឹក ម៉ូដែលកែភេទដែលជាអតិថិជនពិសេសរបស់ហាងសាឡនក្រុងការ៉ាជីនេះ គឺជាហាងដ៏កម្រមួយនៅទឹកដីប៉ាគីស្ថាន ដែលបំពេញតម្រូវការជូនពួកគេដោយគ្មានរើសអើង។
តារ៉ាវ៉ា (Tarawah) ស្ថិតក្នុងទីក្រុងកំពង់ផែភាគខាងត្បូង ជាហាងរបស់ Haider ជាបុគ្គលកែភេទម្នាក់ ដែលមកកាន់ក្រុងការ៉ាជីក្នុងឆ្នាំ ២០១៣ ពីទីប្រជុំជនតូចមួយក្នុងខេត្ដភាគខាងត្បូង Sindh ជាមួយក្ដីសុបិនចង់ក្លាយជាអ្នកសម្អាងកាយ។ តែវាមិនងាយស្រួលឡើយ។
សូម្បីតែម្ចាស់សាឡនម្នាក់នៅទីក្រុងការ៉ាជី ក៏មិនគិតថា នាងទទួលជោគជ័យ ភ្ញៀវក៏មិនមកបៀត ឬផ្ដល់ការគោរពចំពោះនាងឡើយ។
Haider បន្ដថា វាត្រូវការពេល ២ ឆ្នាំ មុនពេលហាងសាឡននេះដំណើរការប្រក្រតី យ៉ាងហោចណាស់ភ្ញៀវមកអើតឈ្ងោកហាងនាងខ្លះៗដែរ។
ដើមឡើយ ម្ចាស់សាឡនមិនរំពឹងថា មានអ្នកមកគាំទ្រជាភ្ញៀវឡើយ។ រូបថត AFP
ស្ដ្រីកែភេទ Haider បាននិយាយអំឡុងអង្គុយលើកៅអីសម្អាងកាយរបស់ខ្លួនថា៖ «ក្រោយពីវេលាដ៏តានតឹងមក ភ្ញៀវរបស់ខ្ញុំមិនអនុញ្ញាតឲ្យនរណាផ្សេងធ្វើសក់ និងផាត់មុខឲ្យពួកគេឡើយ។ ចរិតល្អ ឈ្នះការរើសអើងក្នុងពិភពលោក»។
Haider និងអតិថិជនបានប្រាប់ថា ស្ដ្រីកែភេទរមែងត្រូវបានវាយតម្លៃ បំពាន ដែលជាហេតុនាំឲ្យពួកគេមិនចង់ចូលហាងផ្សេងក្រៅពីគ្នាឯង។
ម៉ាហ៊ីដុល ជាអតិថិជន Tarawah បាននិយាយថា៖ «ពេលយើងអង្គុយក្បែរនារីៗនៅហាងសម្អាងកាយនេះ ពួកគេមានអារម្មណ៍ភ័យខ្លាច មិនចុះសម្រុង និងខ្លាចរអាចំពោះយើង។ ប៉ុន្ដែយើងក៏ជាមនុស្សដែរ»។
ភ្ញៀវសាឡន Haider បាននិយាយទៀតថា៖ «នេះជានិមិត្តរូបនៃតម្លៃអ្នកកែភេទ»៕ AFP/HR
