.jpg)
ក្រុងសេអ៊ូល : តារាចម្រៀងកូរ៉េខាងត្បូង ហារ៉ា បានលាតត្រដាងពីបញ្ហារំលោភបំពានរាងកាយ ដែលនាងបានអះអាងថា នាងរងនូវរបួសស្នាមក្រោមស្នាដៃសង្សាររបស់នាង។
នៅក្នុងរូបភាពជាច្រើនចុះផ្សាយក្នុងទំព័រ Dispatch អតីតសមាជិកក្រុមចម្រៀង kpop Kara ត្រូវបានមើលឃើញរងរបួសជាំពេញទាំងខ្លួន។ ហារ៉ា អាយុ ២៧ ឆ្នាំ ក៏បានចែករំលែករោគវិនិច្ឆ័យវេជ្ជសាស្ដ្រពីគ្រូពេទ្យសម្ភព និងអ្នកឯកទេសខាងជំងឺឆ្អឹង។
យោងតាមពេទ្យសម្ភព បានបង្ហាញថា នាងបានចេញឈាមតាមរន្ធនោម និងប្រដាប់ភេទ ក្រោយរងនូវអំពើរំលោភបំពានរាងកាយ ដែលត្រូវការពេលសម្រាកព្យាបាលរាប់សប្ដាហ៍។
ស្របពេលនេះ គ្រូពេទ្យផ្នែកឆ្អឹង បាននិយាយថា ហារ៉ា រងរបួសជាច្រើនកន្លែងលើរាងកាយ រួមទាំង បញ្ហាគ្រេចក ជាំមុខមាត់ ជាំកំភួនជើង ព្រមទាំង ជាំដើមដៃខាងស្ដាំផងដែរ។
សង្សាររបស់ ហារ៉ា ជាជាងម៉ូដសក់ បានអះអាងថា នាងបានវាយរូបលោកកាលពី ថ្ងៃទី ១៣ ខែកញ្ញា ពាក់កណ្ដាលអាធ្រាត្រ។ ក្នុងសេចក្ដីថ្លែងការណ៍ផ្ញើឲ្យប៉ូលិស លោកបានឲ្យដឹងថា ហារ៉ា ក្លាយជាមនុស្សកម្រោលចូលពេលលោកព្យាយាមចែកផ្លូវពីនាង។
Soompi បានដកស្រង់សម្ដីពីយុវជនអាយុ ២៧ ឆ្នាំនោះ ដោយបាននិយាយថា៖ «ខ្ញុំជាអ្នកដែលចង់ចែកផ្លូវគ្នា ដោយសារតែយើងមានបុគ្គលិកលក្ខណៈខុសគ្នា។ ការអះអាងរបស់គាត់ វាកាន់តែបំពានទ្វេដងថែមទៀត»។
ហារ៉ា ដែលបានចូលសម្រាកព្យាបាលនៅមន្ទីរពេទ្យកាលពីដើមខែចំពោះបញ្ហារំលាយអាហារ និងដំណេក នៅតែអះអាងថា ជម្លោះវាយតប់គ្នាបង្កឡើងទាំងសងខាង»។
មេធាវីភាគីទាំងពីរ បានជួបគ្នាកាលពីចុងសប្ដាហ៍ដើម្បីជជែកពីករណីនេះ។ ពួកគេនៅមិនទាន់បានដាក់ពាក្យឲ្យបើកការស៊ើបអង្កេតនៅឡើយទេ។ នេះបើយោងតាម Allkpop៕ HR
