.jpg)
ហ្វូងក្ដាន់ដែលខ្លាចរអាក្លិនលាមកសត្វតោនៅអឺរ៉ុប។ AFP
ក្រុងអាឡេ: ទីក្រុងឆ្នេរហូឡង់ ដែលត្រូវបានគ្រប់គ្រងដោយទ័ពក្ដាន់ កំពុងរៀបចំផែនការពង្រាយក្លិនលាមកតោ ដើម្បីបន្លាចពួកវាឲ្យលែងហ៊ានមកក្បែរ ដោយបញ្ឈប់ពួកវាមិនឲ្យមកលុកលុយដងវិថី និងសួនច្បារនានា។
ស្ថិតនៅលើខ្នងទំនប់សមុទ្រខាងជើងប៉ែកខាងលិចក្រុងអាំស្ទែរដាំ ក្រុង Zandvoort កាលពីប៉ុន្មានទសវត្សរ៍ចុងក្រោយត្រូវបានឈ្លានពានដោយហ្វូងក្ដាន់រាប់ពាន់ក្បាល រត់ប្រសាចតាមដងវិថី និងសួនផ្កា ផ្ទះសំបែងពលរដ្ឋ។
ថ្វីដ្បិតតែទ័ពក្ដាន់នៅបន្ដលុកលុយក្រុងដោយសារទំនប់ខ្សាច់ស្ថិតនៅក្បែរតំបន់អភិរក្សសត្វព្រៃ ពួកវាប៉ងមកស៊ីរុក្ខជាតិបៃតងស្រស់ក្នុងក្រុង ខណៈរបងផ្ទះខ្ពស់ហាក់គ្មានឥទ្ធិពលរារាំងសត្វទាំងនេះ។
ប៉ុន្ដែពេលនេះ ក្រុង Zandvoort ប្រើយុទ្ធសាស្ដ្រថ្មីតាមរយៈឧបករណ៍បំភាយក្លិន ស្រដៀងអាចម៍តោ ដើម្បីបំភ័យហ្វូងក្ដាន់កុំឲ្យមកក្បែរ។
លោក Patrick Stijger ដែលក្រុមហ៊ុនរបស់លោកផលិតក្លិនបណ្ដេញក្ដាន់នេះ បានប្រាប់ AFP ថា៖ «ពលរដ្ឋចង់ឲ្យហ្វូងក្ដាន់នៅតែក្នុងបរិវេណវាលខ្សាច់ ពួកគេមិនចង់ឲ្យវាមករញ៉េរញ៉ៃក្នុងក្រុងឡើយ»។
លោក Stijger បានប្រាប់កាសែតប្រចាំថ្ងៃ Het Parool ថា ជំនួសដោយការប្រើអាចម៍តោពិត ក្រុមហ៊ុនបានផលិតក្លិនលាមកពីប្រេងច្រើនមុខ រុក្ខជាតិ ១៧ ប្រភេទ និងសារធាតុផ្សំជាច្រើនទៀត។
លោកនិយាយអំពីធាតុផ្សំ ដែលត្រូវបានអភិវឌ្ឍដោយអ្នកវិទ្យាសាស្ដ្រអាល្លឺម៉ង់ដើម្បីដេញក្ដាន់ចេញពីព្រៃគ្រីសស្មាក់ថា៖ «វាធ្វើឲ្យក្ដាន់ជ្រួលច្របល់ខ្លះដែរ»៕
