ភ្នំពេញ៖ អតីតម្ចាស់ជយលាភីបវរកញ្ញា Miss Grand Cambodia ឆ្នាំ ២០១៦ កញ្ញា ហេង ចន្ថា ក្រោយពីមានវត្តមានសម្តែងនៅក្នុងភាពយន្ត «បន្តោងឆ្នាំងដី» កាលពីឆ្នាំ ២០១៨ មក ម្ចាស់មកុដរាជិនីសម្រស់ បានបាត់មុខពីការសម្តែងកុន ដោយមានវត្តមានត្រឹមជាភ្ញៀវចូលរួមកម្មវិធីសិល្បៈ និងការសម្ពោធភាពយន្ត។
កញ្ញាឯកនៅកម្ពុជាក្នុងឆ្នាំ ២០១៦ ដែលមានសម្រស់ផូរផង់ស័កិ្តសមជាម្ចាស់ជយលាភីរូបនេះ ទោះបីជាមិនសូវបង្ហាញមុខនៅលើទីផ្សារសម្តែងក៏ដោយ ប៉ុន្តែនាងនៅតែទទួលបានការគាំទ្រពីមហាជនតាមរយៈការសម្តែង MV ឲ្យហង្សមាសជាបន្តបន្ទាប់ ដោយសារភាពស្រស់ស្អាតរបស់តារាស្រីរូបនេះផងដែរ។
ស្រីស្អាតញញឹមស្រស់កញ្ញា ហេង ចន្ថា បានប្រាប់មក ភ្នំពេញ ប៉ុស្តិ៍ ថា៖ «ខ្ញុំទើបតែសម្រាកពីការសម្តែងមួយរយៈនេះទេ ដោយសារចង់សម្រាកមករៀបចំការរកស៊ីផ្ទាល់ខ្លួនតែប៉ុណ្ណោះ ទម្រាំតែដល់ពាក់កណ្តាលឆ្នាំ ២០២០ ទើបខ្ញុំទទួលសម្តែងជាធម្មតាវិញ»។
គួរបញ្ជាក់ដែរថា មុនពេលផ្អាកពីការសម្តែងមកសម្ងំធ្វើអាជីវកម្មតារាសម្តែងស្រីរូបនេះក៏បានបញ្ចប់នូវខ្សែភាពយន្តភាគរបស់ផលិតកម្មរស្មីហង្សមាស ដែលសម្តែងជាតួឯកស្រី គ្រោងនឹងចាក់បញ្ចាំងក្នុងឆ្នាំ ២០២០ ខាងមុខនេះផងដែរ។
ស្រីស្រស់ ហេង ចន្ថា ក៏បង្ហើបពីអាជីវកម្មដែលគ្រោងបើកនៅក្នុងឆ្នាំ ២០២០ ខាងមុខនេះដែរថា៖ «តាមពិតទៅនេះជារបររកស៊ីរបស់ខ្ញុំយូរហើយ ប៉ុន្តែពីមុនខ្ញុំបើកលក់នៅផ្សារធម្មតា មិនមែនជាហាងអ្វីធំដុំទេ ប៉ុន្តែនៅដើមឆ្នាំ ២០២០ នេះ ខ្ញុំក៏មានគម្រោងបើកជាហាងត្រឹមត្រូវ គឺលក់សម្លៀកបំពាក់ ដែលពេលនេះក៏មិនទាន់ដាក់ឈ្មោះហាងជាផ្លូវការដូចគ្នា។ ក្រៅពីការបើកហាងលក់សម្លៀកបំពាក់ខ្ញុំក៏មានលក់ជាប្រភេទខូស្មេទិចបន្តិចបន្តួចផងដែរ»។
ដោយសារតែសម្រស់ដ៏ស្រស់សោភា តារាស្រីរូបនេះក៏ល្បីថា មានកន្លង់តាមសុំស្នេហ៍ជាហូរហែដែរ ទាំងក្នុងរង្វង់សិល្បៈ និងក្រៅសិល្បៈ ដោយកញ្ញា ហេង ចន្ថា បានបង្ហើបថា មានអ្នកតាមស្រឡាញ់ច្រើនដូចគ្នា ប៉ុន្តែនាងកំពុងទាក់ទងជាមួយកូនប្រុសអ្នកជំនួញធំម្នាក់នៅក្នុងភ្នំពេញម្នាក់។
ទន្ទឹមនឹងនេះ កញ្ញា ហេង ចន្ថា ក៏បានបង្ហើបប្រាប់ពីទំនាក់ទំនងមើលចិត្តគ្នាជាមួយបុរសជាកូនអ្នកជំនួញដូច្នេះដែរថា៖ «ដោយសារគេបានស្រឡាញ់ហើយ អ៊ីចឹងក៏សាកមើលចិត្តគ្នាសិនទៅ ប៉ុន្តែក៏មិនទាន់ក្លាយជាគូស្នេហ៍នឹងគ្នាដែរ។ ហើយសម្រាប់គាត់អាចថា ជាអ្នកសិល្បៈក៏បាន មិនមែនក៏បានដោយសារតែគាត់ធ្លាប់ចូលរួមក្នុងការប្រឡងកម្មវិធីមួយដែរ ប៉ុន្តែគាត់មិនទទួលការសម្តែងអីនោះទេ ដោយសារតែគ្រួសារគាត់ជាអ្នកជំនួញធំដែរ អ៊ីចឹងហើយទើបគាត់ធ្វើជំនួញមិនចូលសម្តែងទេ»៕