ភ្នំពេញៈ ថ្មីៗនេះមានការភ្ញាក់ផ្អើលពីប្រិយមិត្តគាំទ្រ ខណៈស្ងាត់ៗស្រាប់តែ តារាសម្តែងស្រី និងពិធីការិនីប្រចាំទូរទស្សន៍បាយ័ន កញ្ញា ហ៊ិន ច័ន្ទនីរ័ត្ន ដែលមិនត្រឹមតែមានសម្រស់ស្រស់ស្អាតមិនចាញ់តារាជំនាន់ក្រោយនោះ បង្ហើរសារមួយហាក់ដូចមានកំហឹងខ្លាំង បើតាមមើលទៅពាក់ព័ន្ធរឿងលុយកាក់។
សារបែបដូចជាខឹងសម្បានឹងអ្នកណាម្នាក់ដោយឃើញ កញ្ញា ហ៊ិន ច័ន្ទនីរ័ត្ន បានបង្ហោះសារថា៖ «នឹងគេហៅថាថោកទាបហើយ ដើម្បីលុយនិយាយទៅមុខលុយ» តាមហ្វេសប៊ុកខ្លួនក៏ធ្វើឲ្យមហាជនជាអ្នកគាំទ្រ និងមិត្តភក្តិចូលទៅ Comment ដើម្បីសួរនាំយ៉ាងក្តៅគគុក គ្រាន់តែឃើញសារនោះភ្លាមក៏មានអ្នកចូលទៅសួរចង់ដឹងផង មានអ្នករុញទូកបណ្តោយទឹកផង និងមានអ្នកឃាត់កុំឲ្យមានអារម្មណ៍ខឹងបន្តផងដែរ។
អ្នកខ្លះសួរថា៖ «ខឹងណាគេហ្នឹង!ប្រាប់ខ្ញុំមក ខ្ញុំទៅហែកម្នាក់នោះដល់កន្លែងហ្មង!» និងអ្នកខ្លះបង្ហើរសារបែបឃាត់កុំឲ្យខឹងបន្តថា៖ «កុំខឹងអីអាយដល ប្រយ័ត្នខូចសម្រស់។ ទប់អារម្មណ៍ចែ» ខណៈមតិខ្លះទៀតថា៖ «មនុស្សមួយចំនួនបែបហ្នឹង។ មនុស្សប្រភេទហ្នឹងតិចទៀតបាត់បង់មិត្តភាពអស់ហើយ កុំទៅខ្វល់ជាមួយមនុស្សប្រភេទហ្នឹងអីបង! មនុស្សខ្លះក៏បែបហ្នឹងហើយបងស្រី មិនគិតពីអ្វីទេ សំខាន់បានលុយ»។
ទោះបីការជជែកដ៏ក្តៅគគុកយ៉ាងណាក្តី គេនៅតែមិនអាចដឹងច្បាស់ថា ដើមចមដែលនាំឲ្យតារាស្រីរូបស្រស់ កញ្ញា ហ៊ិន ច័ន្ទនីរ័ត្ន ដែលធ្លាប់ល្បីពីមជ្ឈដ្ឋានផលិតកម្មថតកុនបានព្រលយរឿងថា កំណត់តម្លៃខ្លួនថតកុនមួយរឿងតម្លៃ ៥ ពាន់ដុល្លារ បើមិនបានពុំព្រមថត មកនោះដដែល ខណៈភ្នំពេញប៉ុស្តិ៍ក៏មិនអាចសុំការបកស្រាយលម្អិតអំពីកញ្ញាដែរ។
តារាសម្តែងស្រី និងពិធីការិនីកាន់តែមានសម្រស់ស្រស់ស្អាតកញ្ញា ហ៊ិន ច័ន្ទនីរ័ត្ន បានលើកទូរស័ព្ទ ហើយនិយាយបែបដាក់កំហិតហាមចុះផ្សាយរឿងនេះដោយសារសំអាងលេសថា គឺជារឿងផ្ទាល់របស់នាង តែនាងបានបង្ហោះតាមបណ្តាញហ្វេសប៊ុកនោះ។
កញ្ញា ហ៊ិន ច័ន្ទនីរ័ត្ន បានឆ្លើយយ៉ាងខ្លីថា៖ «នេះគ្រាន់តែជា រឿងផ្ទាល់របស់ខ្ញុំទេ!តិចយកទៅចុះផ្សាយអេណាអេណីចុះ? មិនបាច់ចុះទេ!» ហើយក៏បានបិទទូរស័ព្ទទៅ។
កាលមុននេះបន្តិចដោយសារតារាសម្តែងស្រី និងពិធីការិនីមានសម្រស់ស្រស់ស្អាតកញ្ញា ហ៊ិន ច័ន្ទនីរ័ត្ន ដែលមិនសូវមានវត្តមានសម្តែងកុនទាំងខ្នាតតូចធំនោះក៏មានការលើកឡើងពីមហាជនថា គូស្នេហ៍មិនឲ្យសម្តែង ព្រោះខ្លាចមានការប៉ះពាល់នឹងរាងកាយស្រីស្រស់ ប៉ុន្តែថ្មីៗនេះនាងបានបង្ហាញវីដេអូឃ្លីបខ្លីប្រាប់ថា បានសម្តែងរឿងថ្មីឲ្យទូរទស្សន៍បាយ័នគឺរឿង «ទាសករបេះដូង» ដែលធ្វើឲ្យមានការភ្ញាក់ផ្អើលដែរ៕