ភ្នំពេញ: ក្រោយផ្ទុះព័ត៌មានតារាសម្ដែង ហ្វីហ្វី ជានារីរងគ្រោះម្នាក់ ស្ថិតក្នុងចំណោមស្ត្រី ២ នាក់ ដែលត្រូវបុរសជនជាតិចិន ២ នាក់ជាថៅកែខារ៉ាអូខេ នៅម្ដុំផ្សារបឹងត្របែកផ្លាហ្សា បានប្រើហិង្សាវាយដំលើរាងកាយពួកនាង នាវេលាជិតកណ្ដាលអាធ្រាត្រ ថ្ងៃទី ២៣ ខែមេសា តារាស្រីរូបនេះ ម្សិលមិញបានធ្វើការបង្ហោះវីដេអូផ្សាយផ្ទាល់ រៀបរាប់នូវហេតុការណ៍អកុសលកើតឡើងលើរូបនាង។
ក្នុងវីដេអូផ្សាយផ្ទាល់ដែលមានរយៈពេលជាង ១ ម៉ោងនោះ តារាសម្ដែង ហ្វីហ្វី បានរៀបរាប់ដំណើររឿងយ៉ាងដូច្នេះថា៖ «ខ្ញុំមិនមែនជាអ្នកធ្វើការនៅកន្លែងហ្នឹងទេ ខ្ញុំគ្រាន់តែទៅលេងកម្សាន្តជាមួយមិត្តភក្ដិខ្ញុំ។ ខ្ញុំអត់ដែលទៅកន្លែងហ្នឹងទេ។ ហើយដោយឡែក កន្លែងហ្នឹង ប្អូនប្រុសខ្ញុំគាត់ធ្វើការផ្នែកដូចជាសេវាកម្ម ខាងផ្នែកដូចជាបកប្រែបកអ៊ីចឹងៗ ខ្ញុំអត់ដឹងទេ។ ចាស យប់មិញហ្នឹង គឺមិត្តភក្ដិខ្ញុំហៅខ្ញុំទៅលេង តាមពិតខ្ញុំអត់ត្រូវទៅហ្នឹងទេ ខ្ញុំត្រូវទៅចិន តែដោយសារភ្លាមៗយកវីសា អត់បាន គេតម្រូវការច្រើនពេក វាស៊យប៉ះចំមិត្តភក្ដិខ្ញុំហៅទៅលេង ផងក៏មានរឿងអ៊ីចឹងតែម្តងទៅ»។
ក្រៅពីបញ្ជាក់ដដែលៗថា នាងមិនមែនជានារីបម្រើការនៅខារ៉ាអូខេរបស់ថៅកែចិនទេនោះ តារាសម្ដែង ហ្វីហ្វី បានបន្តឲ្យដឹងពីហេតុការណ៍មុននាំឲ្យផ្ទុះហិង្សាថា៖ «ហើយដោយឡែក ខ្ញុំឡើងទៅដល់ភ្លាម ខ្ញុំអត់ដឹងថា គាត់ហ្នឹងនរណាគេទេ មាឌរាងធំខ្ពស់ គេប្រាប់ខ្ញុំថា គាត់ហ្នឹងជាថៅកែ គាត់មកហៅខ្ញុំឲ្យទៅអង្គុយលេងជាមួយភ្ញៀវរបស់គាត់នៅក្នុងបន្ទប់ខារ៉ាអូខេរបស់គាត់ តែខ្ញុំចាំថា កន្លែងហ្នឹងខ្ញុំបានមើលផ្លាកឃើញថាវីអាយភី ១ ខ្ញុំអើតមើលទៅឃើញវារញ៉េរញ៉ៃពេក ទើបខ្ញុំអត់ព្រមអង្គុយកន្លែងទទួលភ្ញៀវរបស់គាត់ហ្នឹង ខ្ញុំក៏ដើរគេចចេញមកក្រៅ»។
តារាសម្ដែងដែលកាលពីឆ្នាំ ២០១៥ ធ្លាប់ធ្វើឲ្យមហា-ជនស្លុតចិត្តនឹងដំណឹងគ្រោះថ្នាក់ចរាចរណ៍របស់នាងនោះ នាងក៏បានរៀបរាប់បន្តអំពីសកម្មភាពរបស់ជនជាតិចិនទាំងនោះឲ្យដឹងទៀតថា៖ «ពេលដើរគេចចេញមកក្រៅទៅ គាត់ដើរតាមខ្ញុំមកក្រៅ មករករឿងខ្ញុំនៅក្រៅទៀត ខ្ញុំអត់ព្រមអង្គុយ និយាយទៅ គឺខ្ញុំអត់ទទួលការងារដែលគាត់ឲ្យខ្ញុំធ្វើហ្នឹងទេ ព្រោះខ្ញុំអត់ចង់មានបញ្ហាច្រើន ព្រោះខ្ញុំអត់ចេះចិនផង។ គាត់ដើរមកក្រៅ ស្មានថាខ្ញុំជាបុគ្គលិកនារីបម្រើការនៅហ្នឹង គាត់ក៏ដើរមកចង្អុលមុខខ្ញុំឡែតៗ ហើយខ្ញុំស្ដាប់អត់បាន ហើយពួកម៉ាកគ្នាគាត់ហ្នឹងក៏បានច្រានខ្ញុំឲ្យដួល រួចក៏ធាក់ខ្ញុំមួយជើង ប៉ុន្តែវាលក្ខណៈហៅថា ខ្ញុំគេចទាន់ដែរ ម៉ាជើងគាត់ហ្នឹង ប្រសិនបើត្រូវខ្លាំង ខ្ញុំអាចសន្លប់បានដែរ»។
បទពិសោធរងអំពើហិង្សាពីជនជាតិចិននេះបានធ្វើឲ្យកញ្ញា ហ្វីហ្វី បានលាន់មាត់ទាំងហួសចិត្តថា៖ «គាត់ជាជនជាតិចិន គាត់មកបើករកស៊ីនៅស្រុកខ្មែរ ហើយគាត់ខ្លាំងណាស់ គាត់ហ៊ានធ្វើបាបបុគ្គលិកខ្មែរយើង ២-៣ ដងហើយ គេខ្លាចគាត់ គេអត់ហ៊ានតតាំងជាមួយគាត់ទេ។ ប៉ុន្តែគាត់ធ្វើប៉ះចំខ្ញុំ ខ្ញុំមិនមែនកូនអ្នកមានខ្នង ខ្ញុំគ្រាន់តែជាអ្នកធ្លាប់ចូលសិល្បៈតិចតួច អ៊ីចឹងខ្ញុំគិតថាអ្វីដែលខ្ញុំនិយាយអាចផ្សព្វផ្សាយដល់អ្នកសារព័ត៌មាន និងស្នើសុំដល់ថ្នាក់លើបានខ្លះៗដែរ»។
ដោយប្រកាន់ជំហរមិនទទួលសំណងជាទឹកប្រាក់ពីជនជាតិចិននោះ តារាសម្ដែង ហ្វីហ្វី បានលើកហេតុផលថា៖ «ចំណុចហ្នឹងហើយដែលខ្ញុំអត់ព្រមយកសំណងពីគាត់ បើខ្ញុំព្រមយកសំណងពីវា ៥០០ ដុល្លារយប់មិញ។ យប់មិញ ឆ្លៀតឲ្យគេមកតថ្លៃប្រុងឲ្យខ្ញុំ ១០០០ បញ្ចប់ទៀត មកដល់កន្លែងប្ដឹង សាលាខណ្ឌចំការមន នេះហ៊ានឲ្យគេមកសួរខ្ញុំថា បើសិនជាឲ្យ ១០០០ ព្រមបញ្ចប់រឿងទេ? ខ្ញុំថា ខ្ញុំអត់យកទេ ខ្ញុំចង់ឲ្យច្បាប់ចាត់ការទៅ»។
ក្នុងវីដេអូផ្សាយផ្ទាល់នោះ តារាសម្ដែង ហ្វីហ្វី ក៏បានបញ្ជាក់ថា នាងបានហៅថៅកែជនជាតិចិននោះមកធ្វើការដោះស្រាយនៅសាលាខណ្ឌម៉ោង ២ រសៀលថ្ងៃទី ២៤ ខែមេសាម្សិលមិញ។ កញ្ញា ហ្វីហ្វី ក៏បានអះអាងផងដែរថា នាងមានរូបភាពភ័ស្ដុតាង ហើយសកម្មភាពហិង្សានោះក៏អាចត្រូវបានថតជាប់ដោយវីដេអូពីកាមេរ៉ាសុវត្ថិភាពនៅខារ៉ាអូខេផងដែរ។
ក្នុងដំណើរស្វែងរកយុត្តិធម៌នេះ តារាសម្ដែងកញ្ញា ហ្វីហ្វី ក៏បានបញ្ជាក់ផងដែរថា៖ «បើសមត្ថកិច្ចអត់គិតគូរ ខ្ញុំមានតែស្នើដល់ថ្នាក់លើ ខ្ញុំសូមលើកម្រាមដៃដប់ស្នើដល់សម្ដេចតេជោតែម្ដង»៕