.jpg)
ឡជីវឧស្ម័នអាចផ្គត់ផ្គង់តម្រូវការដាំស្លបានប្រមាណ ៣ ម៉ោងក្នុងមួយថ្ងៃ។ រូបថត សហការី
ភ្នំពេញៈ ក្រោយពីបានអភិវឌ្ឍខ្លួនពីអ្នកបង្កើតគម្រោងជួយសហគមន៍របស់អង្គការក្រៅរដ្ឋាភិបាលមកជាក្រុមហ៊ុន អេធិចឡជីវឧស្ម័ន ដែលនាំយកបច្ចេកទេសបង្កើតឡជីវឧស្ម័ន សម្រាប់ជួយសម្រួលពលរដ្ឋខ្មែរ ដែលជាប្រជាកសិករពិបាកក្នុងការរកថាមពលចម្អិនម្ហូបអាហារ ជាពិសេសជួយកិច្ចការចង្ក្រានដល់ស្ត្រីមេផ្ទះ។
ក្រុមហ៊ុនអេធិចឡជីវឧស្ម័នបានបង្កើតឡើងជាផ្លូវការនៅចុងឆ្នាំ ២០១៦ ខណៈដើមឡើយក្រុមហ៊ុនដើរតួនាទីជាអ្នកបង្កើតគម្រោងជួយសហគមន៍របស់អង្គការក្រៅរដ្ឋាភិបាលតាំងពីឆ្នាំ ២០០៩ មក។
លោក យ៉ង់ យឿង ជាប្រធានគ្រប់គ្រងទំនាក់ទំនងព័ត៌មានផ្នែកទីផ្សារ និងបណ្តុះបណ្តាលតំបន់នៃក្រុមហ៊ុន (អេធិចឡជីវឧស្ម័ន-ATEC Biodigesters) បានរៀបរាប់ពីអត្ថប្រយោជន៍នៃការបង្កើតឡជីវឧស្ម័ននេះថា៖ «ជាមួយនឹងការបង្កើតឡជីវឧស្ម័ននេះ បងប្អូនគ្រាន់តែចំណាយប្រាក់ប្រមាណ ៧០០ ដុល្លារតែម្តងប៉ុណ្ណោះនឹងអាចមានថាមពលប្រើរហូត ២៥ ឆ្នាំ។ ទឹកប្រាក់ដែលបងប្អូនចំណាយធ្វើឡនេះនឹងទទួលបានឡ ១ ចង្ក្រានហ្គាសភ្លោះ ១ ឆ្នាំងដាំបាយ ១ ទុយោភ្ជាប់បណ្តាញឡជីវឧស្ម័ន ១ កំប្លេ ឧបករណ៍ផ្ទុកហ្គាស ១ បណ្ណធានានៃសេវាកម្មដំឡើង និងថែទាំរបស់ក្រុមហ៊ុនរយៈពេល ២ ឆ្នាំ។ ពិតជាពិសេសសម្រាប់ជួយសម្រួលផ្នែកថាមពល ចម្អិនម្ហូបអាហាររបស់បងប្អូនលក្ខណៈគ្រួសារតែម្តង ប្រសិនបើមានឡនេះ ១»។
នេះជាបច្ចេកទេសបង្កើតឡជីវឧស្ម័នដែលបាននាំចូលមកពីប្រទេសអូស្ត្រាលី។ ឡនេះមានតែមួយខ្នាតប៉ុណ្ណោះដែលអាចមានសុពលភាពសម្រាប់ការប្រើប្រាស់រហូតដល់ ២៥ ឆ្នាំ និងអាចមានលទ្ធភាពបង្កើតនូវជីសរីរាង្គចំនួន ២០ តោនក្នុងមួយឆ្នាំដែលប្រជាកសិករអាចយកទៅប្រើនៅស្រែចម្ការបានទៀតផង។
ក្នុងមួយថ្ងៃ វាត្រូវការចាក់លាមកសត្វ ២០ គីឡូក្រាមលាយជាមួយទឹក ១ ធុង ២០ លីត្រ។ រូបថត សហការី
លោក យ៉ង់ យឿង បន្តឲ្យដឹងពីខ្នាតឡជីវឧស្ម័នដែរថា៖ «យើងមានតែមួយទំហំ ឬមួយខ្នាតទេសម្រាប់ឡជីវឧស្ម័ន។ ចំពោះសណ្ឋាននៃឡនោះគឺមានកម្ពស់ ២,១ ម៉ែត្រ និងមុខកាត់ឡប្រវែង ១,៥ ម៉ែត្រ។ ប្រភពដែលអាចយកមកផ្គត់ផ្គង់ឡជីវឧស្ម័ន នោះមានលាមកសត្វពាហនៈដូចជាសត្វគោ ក្របី សេះ ពពែ ជ្រូក សូម្បីតែលាមកមនុស្ស ក៏គេអាចបង្ហូរចេញពីបង្គន់ចូលក្នុងឡជីវឧស្ម័ន»។
លោកបញ្ជាក់ដែរថា៖ «ចំពោះថាមពលដែលទាញបានពីឡជីវឧស្ម័ននេះគឺប្រើប្រាស់ជាលក្ខណៈគ្រួសារអាចទាញយកថាមពលប្រើបានប្រមាណ ៣ ម៉ោងក្នុងមួយថ្ងៃ។ នាពេលបង្កើតឡជីវឧស្ម័នដំបូងត្រូវមានបរិមាណលាមកសត្វចំនួន ៦០ ធុងប៉េត្រូ (១ ធុងទម្ងន់ ២០ គីឡូក្រាម) បូកនឹងទឹកចំណុះ ៦០ ធុងប៉េត្រូ»។
ចំពោះការទទួលបាននូវថាមពលឧស្ម័នហ្គាស ដើម្បីយកមកប្រើប្រាស់ប្រចាំថ្ងៃ ក្រោយពីបានបង្កើតឡជីវឧស្ម័នដែលអាចទាញយកថាមពលមកប្រើប្រាស់នោះគឺមានភាពខុសគ្នាទៅតាមគុណភាពនៃលាមកសត្វផងដែរគឺមានរយៈពេលចន្លោះពី ៥ ថ្ងៃទៅដល់ ១ ខែ។
លោក ចេង សុជាតិ ប្រធានគ្រប់គ្រងទូទៅប្រចាំកម្ពុជានៃក្រុមហ៊ុនអេធិចឡជីវឧស្ម័ន-ATEC Biodigesters បានឲ្យដឹងផងដែរថា៖ «ជាទូទៅការបង្កើតឡជីវឧស្ម័ននេះ គឺវាអាស្រ័យទៅតាមប្រភេទនៃការប្រើធនធានលាមកសត្វ ដែលត្រូវយកទៅដាក់ក្នុងឡឧស្ម័នផងដែរ។ មានឡខ្លះគឺអាចនឹងទទួលបានថាមពលឧស្ម័នហ្គាសប្រើបាន ក្រោយពីបង្កើតបានចំនួន ៥ ថ្ងៃ ឬ មួយអាទិត្យ សម្រាប់ឡ ប្រើលាមកសត្វមានគុណភាពល្អគឺលាមកសត្វដែលសត្វនោះស៊ីអាហារដោយធម្មជាតិ។ តែមានឡខ្លះត្រូវចំណាយពេលរហូតដល់ ៣-៤ សប្តាហ៍ឯណោះ ទើបអាចទាញយកថាមពលហ្គាសមកប្រើបាន ដោយសារប្រើលាមកសត្វដែលចិញ្ចឹមដោយចំណី»។
ឡជីវឧស្ម័នបានផលិតជីធម្មជាតិសម្រាប់ស្រោចស្រពដំណាំ។ រូបថត សហការី
ដោយឡែកក្រោយពីបានដំណើរប្រើប្រាស់ឡជីវឧស្ម័ននេះហើយ ម្ចាស់ឡនីមួយៗក៏ទាមទារឲ្យមានការចាក់បំពេញបន្ថែមលាមកសត្វ និងទឹកជាប្រចាំថ្ងៃផងដែរ ដើម្បីបន្តនូវចរន្តថាមពលក្នុងឡឧស្ម័នគឺមួយថ្ងៃត្រូវចាក់ថែមលាមកសត្វ ២០ គីឡូក្រាម និងទឹកចំណុះ ២០ លីត្រ។
លោកបញ្ជាក់ថា៖ «យើងទាមទារឲ្យបងប្អូនជាម្ចាស់ឡ ធ្វើការចាក់បន្ថែមលាមកសត្វ ២០ គីឡូ និងទឹក ២០ លីត្រជារៀងរាល់ថ្ងៃទើបអាចរក្សានូវសក្តានុពលនៃការផលិតថាមពលហ្គាសបានយូរ ឬគ្រប់គ្រាន់តាមតម្រូវការប្រើប្រាស់ប្រចាំថ្ងៃ។ ការតម្រូវបែបនេះប្រៀបដូចជាសកម្មភាពដែលយើងជិះឡាន ឬម៉ូតូត្រូវចាក់សាំងពេលអស់សាំងអ៊ីចឹងដែរ»។
ចាប់តាំងពីកកើតមកនោះ ក្រុមហ៊ុនបានដំឡើងឡឲ្យអ្នកប្រើប្រាស់បានចំនួន ១ ៣០០ ឡ ហើយនៅទូទាំងប្រទេសគឺនៅសល់តែខេត្តចំនួន ៣ គឺមណ្ឌលគិរី រតនគិរី និងកោះកុងប៉ុណ្ណោះដែលក្រុមហ៊ុនពុំទាន់បានចែកចាយទៅដល់។
ក្រោយពីបង្កើតឡប្រើហើយនោះគ្រួសារដែលប្រើអាចទទួលបានអត្ថប្រយោជន៍ពីឡនេះដែរដូចជាកាត់បន្ថយការចំណាយទៅការប្រើប្រាស់ចរន្តអគ្គិសនី ឬតម្លៃហ្គាស។
សម្រាប់សេវាកម្មដំឡើងនៅតំបន់ក្រុងរាជធានីភ្នំពេញ ខាងក្រុមហ៊ុនមិនគិតតម្លៃសេវាដឹកជញ្ជូនគ្រឿងសម្ភារដំឡើងឡជីវឧស្ម័ននេះឡើយ តែសម្រាប់ខេត្តដែលនៅចម្ងាយក្រោម ៤០០ គីឡូម៉ែត្រក្រុមហ៊ុនគិតបន្ថែមតម្លៃដឹកជញ្ជូន ៥០ ដុល្លារពីលើតម្លៃគ្រឿងដំឡើងឡ ៧០០ ដុល្លារ ហើយប្រសិនបើនៅខេត្តលើស ៤០០ គីឡូម៉ែត្រនឹងត្រូវបូកបន្ថែមតម្លៃដឹកជញ្ជូន ៨០ ដុល្លារ៕
