The Phnom Penh Post Search

Search form




Logo of Phnom Penh Post newspaper Phnom Penh Post - ឡូយមែន ជួល​រថយន្ត​ចាស់ៗ​ជិះ​មើល​ប្រាសាទ​ដូច​អភិជន​ជំនាន់​មុន




ឡូយមែន ជួល​រថយន្ត​ចាស់ៗ​ជិះ​មើល​ប្រាសាទ​ដូច​អភិជន​ជំនាន់​មុន

Content image - Phnom Penh Post
ភ្ញៀវទេសចរ​អាច​ជួល​រថយន្ត​ Mercedes Benz ឆ្នាំ ១៩៦០ ពណ៌​ស ​បើក​ក្នុង​តំបន់​អង្គរ​គយគន់​ប្រាសាទ​​។ ហុង មិនា

ឡូយមែន ជួល​រថយន្ត​ចាស់ៗ​ជិះ​មើល​ប្រាសាទ​ដូច​អភិជន​ជំនាន់​មុន

ភ្នំពេញ: ចំណូលចិត្ត​ស្រឡាញ់​រថយន្ត​ចាស់ៗ និង​ចង់​ប្រើប្រាស់​វា​បម្រើ​វិស័យ​ទេសចរណ៍​នៅ​ទឹកដី​សៀមរាប​អង្គរ លោក សាន វឌ្ឍនា ម្ចាស់​សណ្ឋាគារ Hillocks បាន​ប្រមូល​ឡាន​សល់​ពី​សម័យ​សង្គម​រាស្ត្រនិយម​មក​ច្នៃ​ដឹក​ភ្ញៀវ​ដើរ​លេង​ក្នុង​តំបន់​ប្រាសាទ ដើម្បី​ធ្វើឲ្យ​បរិយាកាស​ដំណើរ​កម្សាន្ត​ប្លែក ហាក់បី​ដូចជា​បាន​វិល​ត្រឡប់​ទៅ​អតីតកាល​ដ៏​រុងរឿង។

អ្នកស្នេហា​រថយន្ត​ចំណាស់ៗ​រូបនេះ​បាន​និយាយ​ទាំង​ទឹក​មុខ​រីករាយ​ថា៖ «បាន​ជាខ្ញុំ​សម្រេចចិត្ត​ទិញ​ឡាន​ចាស់ៗ​ទាំង​នេះ​យក​មក​ប្រើប្រាស់​ឡើង​វិញ​គឺ​ចង់​រំឭក​ពី​សម័យ​សង្គម​រាស្ត្រនិយម​ដែល​ខ្មែរ​យើង​មានការ​រីកចម្រើន​ខ្លាំង​ក្នុង​ជំនាន់​សម្តេចឪ ចង់​បង្ហាញ​ឲ្យ​ភ្ញៀវទេសចរ​ជាតិ និង​អន្តរជាតិ​បាន​ស្គាល់​ពី​ឡាន​ចាស់​បុរាណ Mercedes Benz ឆ្នាំ ១៩៥៦ ដែល​នៅ​ជំនាន់​នោះ​ឡាន​នេះ​គឺ​សម្រាប់​តែ​ក្រុម​អភិជន កុងស៊ុល និង​មន្ត្រីរាជការ​ជិះ​តែប៉ុណ្ណោះ»។

ភ្ញៀវ​វ័យ​ចំណាស់ ដែល​ធ្លាប់​ស្គាល់​យាន​ជំនិះ​ជំនាន់​នោះ ពួកគាត់​មាន​អារម្មណ៍​ហាក់បី​ដូចជា​អភិជន​ពេល​បាន​ឡើង​ជិះ​រថយន្ត​ចាស់ៗ​ធ្វើ​ដំណើរ​គយគន់​ប្រាង្គ​ប្រាសាទ។

លោក​បាន​លើក​ឡើង​ថា៖ «ចាស់ៗ​ភាគ​ច្រើន​គឺ​គាត់​ស្គាល់​រថយន្ត Mercedes Benz ឆ្នាំ ១៩៥៦ នេះ ហើយ​គាត់​សប្បាយចិត្ត​ខ្លាំង​នៅ​ពេល​បាន​ឡើង​ជិះ​ឡាន​នេះ ហើយ​មិន​នឹកស្មាន​ថាវា​នៅ​មាន​មក​ដល់​សព្វថ្ងៃ​នេះ​ទេ»។

លោក សាន វឌ្ឍនា បាន​ព្យាយាម​រក​ទិញ​រថយន្ត​ចាស់ៗ​ពី​អ្នក​ធ្លាប់​ធ្វើការ​ក្នុង​វាំង ឬ​អ្នកធ្វើការ​ជាមួយ​អ្នកធំ​ជំនាន់​មុន​យក​មក​ច្នៃ​ឡើង​វិញ ដោយ​កុម្ម៉ង់​គ្រឿង​បន្លាស់​ពី​បរទេស បន្ថែម​ពូក​ថ្មី ដោយ​រក្សា​ទ្រង់ទ្រាយ​ដើម។

លោក​បញ្ជាក់​ថា៖ «ឡាន​ចាស់ៗ​ទាំង​នេះ​គឺ​យើង​ចំណាយ​ពេល​ជួលជុល​យូរ ដោយ​ឡាន​មួយ​ចំណាយ​ពេល ២ ឆ្នាំ​អី​ឡើង​ទៅ។ ចំពោះ​ឡាន Mercedes Benz ១៩៥៦ ពណ៌​ខ្មៅ​នេះ ខ្ញុំ​ទិញ​ក្នុង​តម្លៃ​ប្រមាណ​ជា ២ ម៉ឺនដុល្លារ ហើយ​ឡាន​នេះ​ប្រហែល​ជា​មាន​តែ​មួយ​ទេ​នៅ​ក្នុង​ស្រុក​ខ្មែរ»។

ភ្ញៀវ​ដែល​មក​លេង​សៀមរាប​អាច​ជាវ​ជា​កញ្ចប់​ស្នាក់​នៅ​សណ្ឋាគារ Hillocks Hotel &Spa ជាមួយ​និង​ការ​ជិះ​រថយន្ត​ចាស់ៗ​ទាំង​នេះ។ រីឯ​ភ្ញៀវ​មិនបាន​ស្នាក់​នៅ​ទីនេះ​ក៏អាច​ជួល​រថយន្ត​ទាំង ៣ នេះ​ជិះ​បាន ក្នុង​តម្លៃ​ជួល Mercedes Benz ឆ្នាំ ១៩៥៦ ពណ៌​ខ្មៅ ពេញ​មួយ​ថ្ងៃ តម្លៃ ១២០ ដុល្លារ កន្លះ​ថ្ងៃ ៦៧ ដុល្លារ។

សម្រាប់​ការជួល Mercedes Benz ១៩៦០ ពណ៌​ស ពេញ​មួយ​ថ្ងៃ​តម្លៃ ១០៥ ដុល្លារ កន្លះ​ថ្ងៃ ៦០ ដុល្លារ និង​រថយន្ត Jeep A2 ពេញ​មួយ​ថ្ងៃ ៤១ ដុល្លារ កន្លះ​ថ្ងៃ ២៦ ដុល្លារ។

រីឯ​តម្លៃ​ជួល​ថត Pre-wedding ក្នុង​មួយ​ថ្ងៃ ១២០ ដុល្លារ មាន​តៃកុង​ឡាន​បើក​ជូន​ពេញ​មួយថ្ងៃ ដោយ​ចេញ​ថ្លៃ​សាំង​ជូន និង​ការចង​កំប៉ុង​តុបតែង​រថយន្ត​ផងដែរ។ ទំនាក់​ទំនង​ទូរស័ព្ទ​លេខ ០១២ ៤០០ ៦៤១៕

Content image - Phnom Penh Post
រថយន្ត Mercedes Benz ឆ្នាំ ១៩៥៦ ពណ៌ខ្មៅ​។ សាន វឌ្ឍនា

Content image - Phnom Penh Post
លោក សាន វឌ្ឍនា និង​រថយន្ត​ Jeep A2 ឆ្នាំ ១៩៤៥​​។ ហុង មិនា

អត្ថបទគួរចាប់អារម្មណ៍