.jpg)
បម្រាមថ្មីនៅអង់គ្លេស ហាមដាច់យប់ស្នាក់នៅផ្ទះរបស់គេ។ រូបថត AFP
ក្រុងឡុងដ៍៖ រដ្ឋាភិបាលចក្រភពអង់គ្លេសកាលពីថ្ងៃអង្គារបានការពារចំពោះការកែសម្រួលចំណាត់ការរឹតបន្តឹងលើបញ្ហាវីរុសកូរ៉ូណា ក្រោយពីអះអាងថា បម្រាមអត់ចេញក្រៅឆ្លងផ្ទះពេលរាត្រីនឹងដាក់ទោសឧក្រិដ្ឋលើការរួមភេទ។
គោលការណ៍ណែនាំថ្មីបានដាក់ឲ្យអនុវត្ដកាលពីថ្ងៃចន្ទ ដោយការបន្ធូរបន្ថយការរឹតបន្តឹងលើការជួបជុំសង្គមនៅទីបើកចំហ តែដាក់បម្រាមមនុស្ស ២ នាក់ មកពីផ្ទះផ្សេងៗគ្នាជួបគ្នាជាលក្ខណៈឯកជននៅទីបិទជិត។
បណ្ដាញផ្សព្វផ្សាយមួយចំនួនបានហៅវាថាជាជម្រើស «បម្រាមសិច» ដ៏មានប្រសិទ្ធភាព ហើយ #sexban ចាប់ផ្ដើមល្បីលើបណ្ដាញសង្គម Twitter នៅចក្រភពអង់គ្លេសដោយខ្លះបានគូសបញ្ជាក់ថា ការជួបជុំនៅបរិវេណខាងក្រៅទំនងជាត្រូវបានអនុញ្ញាត តែមិនអាចនៅក្នុងបន្ទប់ ឬអគារឡើយ។
យ៉ាងណាមិញ លោករដ្ឋមន្ដ្រី ស៊ីម៉ុន ក្លាក បានប្រាប់វិទ្យុ LBC ថា វាមិនមែនជាអត្ដចរិតត្រឹមត្រូវឡើយ ហើយគោលបំណងទូទៅនៃវិធានការនេះ គឺដើម្បីការពារសុខភាពសាធារណៈ និងកាត់បន្ថយអត្រាឆ្លង។
លោកបាននិយាយថា៖ «វាពិតជាសំខាន់ច្បាស់ណាស់ ដែលពលរដ្ឋត្រូវនៅផ្ទះ ហើយយើងមិនប្រឈមការឆ្លងមេរោគថែមទៀតក្នុងសង្គម។ ប្រាកដណាស់ នេះគឺជាជំហានគន្លឹះក្នុងការថែរក្សានិរន្ដរភាព»។
សួរថា ប្រសិនបើហាមមនុស្ស ២ នាក់ជួបគ្នានៅក្នុងផ្ទះ តើសិចត្រូវបានអនុញ្ញាតឲ្យប្រព្រឹត្ដនៅក្រៅផ្ទះ ដែលស្របតាមច្បាប់សីលធម៌សាធារណៈ ដែរឬទេ? លោក ក្លាក បានបដិសេធចំពោះអត្ថន័យបែបនោះ។
បម្រាមការជួបជុំគ្នានៅទីវាល ត្រូវបានបន្ធូរបន្ថយ។ រូបថត AFP
លោកបានលើកឡើងថា៖ «យើងត្រូវនិយាយថា ហានិភ័យជំងឺឆ្លងនៅបរិស្ថានខាងក្រៅមានកម្រិតទាបជាងនៅបរិវេណក្នុងអគារ។ ច្បាស់ណាស់ យើងមិនលើកទឹកចិត្ដឲ្យពលរដ្ឋយើងប្រព្រឹត្ដរឿងអ្វីផ្សេងមិនសមរម្យនៅក្រៅបន្ទប់ឡើយ»។
គោលការណ៍ណែនាំថ្មីបានអនុញ្ញាតឲ្យមនុស្សជាក្រុមរហូតដល់ ៦ នាក់ជួបជុំគ្នានៅខាងក្រៅសម្រាប់រៀបចំសកម្មភាពផ្សេងៗ ដូចជា ការហាត់ប្រាណ និងជប់លៀងជាដើម។
ប៉ុន្ដែពួកគេបានលើកឡើងថា៖ «ប្រហែលជាគ្មាននរណាម្នាក់ចូលរួមក្នុងការជួបជុំ ដែលរៀបចំឡើងនៅទីសាធារណៈ ឬកន្លែងឯកជនក្នុងអគារ ក៏ដូចជាមានមនុស្សចាប់ពី ២ នាក់ឡើយ»។
នរណាម្នាក់ដែលប្រព្រឹត្ដល្មើសនឹងប្រឈមការផាកពិន័យ ១០០ ផោន (៥០ ម៉ឺនរៀល) ទោះបីជារដ្ឋាភិបាលអះអាងថា ប៉ូលិសគ្មានអំណាចចូលផ្ទះពលរដ្ឋឡើយ លុះត្រាតែ «សកម្មភាពឧក្រិដ្ឋកម្មធ្ងន់ធ្ងរ» ត្រូវបានសង្ស័យ៕ AFP/HR
