.jpg)
កីឡាករត្រូវការពេលវេលាដើម្បីស្វែងយល់ និងសម្របខ្លួនទៅនឹងការលេងបាល់ទាត់រក្សាគម្លាតសុវត្ថិភាព។ រូបថត សហការី
ភ្នំពេញ៖ ខុសពីកីឡាទូទៅ ដែលមើលឃើញកីឡាករ-កីឡាការិនីនៅលើទីលានអាចប្រដេញដណ្ដើមបាល់គ្នា រួមទាំងការទាញ ឱប និងឈូសជើង កីឡាបាល់ទាត់ច្នៃប្រឌិតថ្មីនេះ តម្រូវឲ្យអ្នកនៅលើទីលានពាក់ម៉ាស់ រក្សាគម្លាតយ៉ាងតិច ២ ម៉ែត្រពីគ្នា ទោះក្នុងកាលៈទេសៈណាក៏ដោយ និងមិនអាចគ្រប់គ្រងបាល់ម្ដងលើសពី ៥ វិនាទីជាដើម។
ក្រុមគ្រូបង្វឹកបាល់ទាត់របស់អង្គការផ្កាយសមុទ្រ Indochina Starfish Foundation (ISF) ជាអង្គការសប្បុរសកម្ពុជាដែលប្រើប្រាស់ការអប់រំ និងកីឡាជាយានផ្លាស់ប្ដូរជីវិតកុមារ បានបង្កើតលក្ខខណ្ឌល្បែងថ្មី ជាវិធីបង្ហាញពួកគេនូវរបៀបលេងបាល់បែបថ្មីប្រកបដោយសុវត្ថិភាព ក៏ដូចជាក្រើនរំឭកពលរដ្ឋខ្មែរពីគោលការណ៍រក្សាគម្លាតសុវត្ថិភាពបុគ្គល និងសង្គមផងដែរ។
យោងតាមការផ្សព្វផ្សាយវីដេអូរបស់អង្គការ ISF បានឲ្យដឹងថា៖ «យើងចង់ឲ្យកីឡានេះមានសុវត្ថិភាពសម្រាប់ក្មេងៗនៅតាមដងផ្លូវ។ ដូច្នេះ យើងត្រូវមានវិន័យថ្មី ដូចជា ការវាស់កម្ដៅ លាងដៃមុន និងក្រោយពេលលេង ពាក់ម៉ាស់ ដែលអាចសម្រាកដកដង្ហើមទៅតាមការស្នើសុំរបស់កីឡាករ គម្លាតពីគ្នា ២ ម៉ែត្រ ជាមួយការបែងចែកតំបន់របស់កីឡាករនីមួយៗ និងរត់ពីចំហៀង (ស្រដៀងនឹងការលេងបាល់ទាត់មនុស្សឈើ) គ្មានការដណ្ដើមបាល់គ្នា គ្មានការអបអរជាក្រុមនៅពេលស៊ុតចូល អ្នកធ្វើខុសវិន័យ ត្រូវឲ្យនៅតំបន់ដាច់ដោយឡែក»។
ដោយសារសាលារៀនត្រូវបិទទ្វារ កុមារ និងមនុស្សធំខ្លះដែលមានពេលទំនេរច្រើន នាំគ្នាលេងបាល់ទាត់នៅតាមដងផ្លូវ ក៏ដូចជាសួនច្បារនានា ដោយមិនប្រកាន់ខ្ជាប់នូវវិធានការការពារខ្លួនឡើយ។
កញ្ញា ជួប វិច្ឆិកា ជានាយកប្រចាំប្រទេសរបស់អង្គការផ្កាយសមុទ្រ បាននិយាយថា៖ «កុមារកម្ពុជាកំពុងស្ថិតក្នុងគ្រាលំបាក។ សាលារៀនទាំងអស់ត្រូវបានបិទដើម្បីរក្សាសុវត្ថិភាពសិស្ស តែដោយសារឪពុកម្ដាយភាគច្រើនត្រូវទៅបំពេញការងារ ដែលកុមារត្រូវចេះមើលថែខ្លួនឯង ឬចេញទៅលេងបាល់ទាត់តាមផ្លូវ»។
កីឡាករត្រូវបានវាស់កម្ដៅ លាងដៃ និងពាក់ម៉ាស់មុនពេលចូលលេង។ រូបថត សហការី
ដើម្បីសុវត្ថិភាព ប្រធានគ្រប់គ្រងកម្មវិធីបាល់ទាត់ លោក យិន សាមឌី បានបំផុសគំនិតស្នូលឡើង រួចអភិវឌ្ឍបទបញ្ជាផ្ទៃក្នុងជាមួយគ្រូបង្វឹកតាមសហគមន៍របស់អង្គការ។ គោលការណ៍រក្សាគម្លាតសុវត្ថិភាពដែលទទួលស្គាល់ដោយអន្ដរជាតិ ត្រូវបានយកមកប្រើក្នុងបទបញ្ជាផ្ទៃក្នុងបាល់ទាត់ថ្មីនេះ រួមទាំងការពាក់ម៉ាស់ និងបម្រាមចូលកៀកគ្នាក្រោម ២ ម៉ែត្រ។
វាជាបទបញ្ជាផ្ទៃក្នុងថ្មីសន្លាង ដែលកីឡាករនីមួយៗត្រូវបានគូសបរិវេណកំណត់ ជាបែបផែនលេងពីម្ខាងទៅម្ខាង ជាជាងការរត់ប្រដេញទៅចុះឡើង។ អ្នកល្មើសវិន័យនឹងត្រូវដាក់ឲ្យនៅដាច់ដោយឡែក ១ នាទី។
នៅខែឧសភា ក្រុមគ្រូបង្វឹកនៃអង្គការបានប្រមូលផ្ដុំគ្នា និងសម្រេចចិត្ដសាកល្បងបទបញ្ជាផ្ទៃក្នុងល្បែងថ្មី។ អង្គការបានស្នើឲ្យសិស្សដែលស្រឡាញ់បាល់ទាត់ដាក់សាកល្បងលេងបាល់ទាត់រក្សាគម្លាតសុវត្ថិភាពថ្មី។ ក្រោយពីសម្របខ្លួនមួយរយៈ កុមារចាប់ផ្ដើមចូលចិត្ដល្បែងថ្មីនេះ។
កុមារា វឌ្ឍនៈ អាយុ ១៣ ឆ្នាំ បាននិយាយថា៖ «ខ្ញុំចូលចិត្ដបាល់ទាត់ណាស់ ហើយខ្ញុំក៏ពេញចិត្ដល្បែងកីឡាប្រភេទនេះណាស់ដែរ ពីព្រោះវាបានបង្រៀនខ្ញុំពីការធ្វើការជាក្រុម។ ខ្ញុំរីករាយណាស់ដែលខ្ញុំអាចលេងបាល់ទាត់ដោយមានសុវត្ថិភាពជាងមុន»។
កញ្ញា ជួប វិច្ឆិកា បន្ដថា៖ «ខណៈនេះ កម្ពុជាមិនមានករណីឆ្លងជំងឺកូវីដ ១៩ ច្រើននោះទេ តែរាជរដ្ឋាភិបាលបានប្រកាសថា ពលរដ្ឋត្រូវចេះការពារខ្លួនចំពោះរលកទី២។ យើងរំពឹងថា កុមារបានមើលឃើញវីដេអូនេះ និងបានសម្រេចចិត្ដប្រកាន់យកនូវវិធានការសុវត្ថិភាព។ យើងកំពុងតែរៀបចំដាក់ឲ្យដំណើរការជាមួយដៃគូរបស់យើង»។
វីដេអូផ្សព្វផ្សាយ ដែលបង្ហោះកាលពីខែឧសភា និងរំលេចនូវល្បែងបាល់ទាត់រក្សាគម្លាតសុវត្ថិភាពដំបូងបំផុត ទទួលបានប្រជាប្រិយភាពយ៉ាងឆាប់រហ័ស ដោយមានចំនួនអ្នកទស្សនាជាង ១៦ ម៉ឺនដងនៅកម្ពុជា។
យោងតាមរបាយការណ៍របស់អង្គការ ISF បានឲ្យដឹងថា វីដេអូនេះត្រូវបានចែករំលែកនៅទូទាំងពិភពលោក ពីសហរដ្ឋអាមេរិក ទៅដល់ប្រទេសលិចតិនស្ដាញ ព្រមទាំងទទួលបានការកោតសរសើរពីសហព័ន្ធកីឡាបាល់ទាត់អាស៊ីថាជាគម្រោងមួយប្រកបដោយ «ភាពច្នៃប្រឌិត»។
នៅលើទីលានបាល់ទាត់ គ្រប់គ្នាតម្រូវឲ្យរក្សាគម្លាតពីគ្នា ២ ម៉ែត្រ។ រូបថត សហការី
លោក Christopher Lantigua ជាគ្រូបង្វឹកបាល់ទាត់ម្នាក់នៅក្រុងញូវយ៉ក ដែលបានឃើញវីដេអូផ្សព្វផ្សាយនេះ បានសរសេរថា៖ «នេះជាថាមពលនៃភាពច្នៃប្រឌិត ការតាំងចិត្ដ និងចេញពីសេចក្ដីស្រឡាញ់សុទ្ធសាធ ដោយសារភាពចលាចល និងអស់សង្ឃឹមបានបង្កើតជាភាពស្រស់បំព្រងដែលចាំបាច់សម្រាប់សុវត្ថិភាពសហគមន៍»។
អង្គការក្នុងស្រុកមួយនេះទទួលបានការចាប់អារម្មណ៍យ៉ាងខ្លាំងពីបណ្ដាប្រទេសនៅ អាមេរិក និងអឺរ៉ុប ហើយអង្គការក៏បានធ្វើការជាមួយអង្គការនៅឥណ្ឌាអំពីការកែសម្រួលល្បែងនេះឲ្យត្រូវនឹងបរិបទក្នុងប្រទេសឥណ្ឌា។
យោងតាមរបាយការណ៍របស់អង្គការ ISF បានបង្ហាញថា៖ «យ៉ាងណាមិញ អង្គការផ្ដោតសំខាន់លើការដាក់ឲ្យដំណើរការកម្មវិធីជាមួយអង្គការក្នុងស្រុកនានា ដោយចាប់ផ្ដើមពីដៃគូផ្ទាល់ក្នុងគម្រោងកម្មវិធីបាល់ទាត់ Football Programme របស់ខ្លួនដែលទទួលបានពានរង្វាន់»។
អង្គការនឹងបើកវគ្គបណ្ដុះបណ្ដាលពីចម្ងាយដល់អង្គការក្រៅរដ្ឋាភិបាលនានា ដែលមានបំណងចង់កែសម្រួលល្បែងកីឡានេះ និងអាចជួបពិភាក្សាតទល់សម្រាប់អង្គការនៅភ្នំពេញ។
វីដេអូផ្សព្វផ្សាយអំពីបាល់ទាត់រក្សាគម្លាតសុវត្ថិភាពមាននៅទំព័រហ្វេសប៊ុក @isf.cambodia។ ព័ត៌មាបន្ថែមមាននៅវេបសាយរបស់អង្គការ https://isfcambodia.org/៕
