.jpg)
ទិដ្ឋភាពស្ថានីយវិទ្យុសំឡេងព្រះធម៌ក្រុងបាត់ដំបងដែលដំណើរការដោយអង្គការ ព.អ.ក ។ ហុង មិនា
ក្រុងបាត់ដំបង: អង្គុយលើកម្រាលឥដ្ឋនៃថ្នាក់រៀនដែលក្ដារខៀនស្ថិតនៅក្បែរព្រះពុទ្ធបដិមា ១ អង្គ យុវសិស្ស ប៉ែន សិលា បានផ្ដើមសូត្រធម៌នាំមុខ រួចបន្ទរដោយសំឡេងមិត្ដរួមថ្នាក់ មុនពេលចាប់ផ្ដើមមេរៀន។ ការសូត្រធម៌នេះមានរយៈពេលប្រមាណ ១០ នាទីរៀងរាល់ពេលចូល និងចេញពីរៀន។
ប៉ែន សិលា សិក្សាភាសាអង់គ្លេស និងចិននៅអង្គការពុទ្ធសាសនាដើម្បីការអប់រំនៃកម្ពុជា (ព.អ.ក) ជិត ១ ឆ្នាំ និងសាលារៀនរដ្ឋថ្នាក់ទី ៨ អាយុ ១៨ ឆ្នាំបាននិយាយថា៖ «ខ្ញុំមិនធុញទ្រាន់ក្នុងការសិក្សាព្រះធម៌ឡើយ ។ ការសូត្រព្រះធម៌មានសូរសៀងពីរោះ និងជ្រះថ្លាចិត្ដ ។ ខ្ញុំចេះសូត្រកិរិយា និងធម៌សារ៉ាផាញ់»។
មជ្ឈមណ្ឌលដែល សិលា និងមិត្ដរួមថ្នាក់ប្រមាណ ១០០ នាក់ទៀតមករៀនរៀងរាល់ថ្ងៃគឺជាអង្គការមួយដែលបើកដំណើរការដោយព្រះសង្ឃ បំណងដើម្បីលើកកម្ពស់សីលធម៌សង្គម និងសុខុមាលភាពសង្គមលើយុវជនអ្នកទោស ជនចាស់ជរា និងក្មេងកំព្រា។
យុវសិស្សនៅ ព.អ.ក កត់ត្រាមេរៀនព្រះធម៌នៅលើក្ដារខៀន ។ ហុង មិនា
ព្រះភិក្ខុ ធម្មសេនា ហាក់ សៀងហៃ ហៅ រាហុល គឺជាស្ថាបនិកអង្គការ ព.អ.ក ដែលបង្កើតឡើងកាលពីខែកក្កដា ឆ្នាំ ២០១២ មានសង្ឃដីកាថា៖ «យើងផ្ដោតលើគោលបំណងសំខាន់ចំនួន ២ គឺលើកកម្ពស់សីលធម៌សង្គមដែលជាការអប់រំទាំងផ្នែកពុទ្ធចក្រ និងអាណាចក្រ និងលើកស្ទួយសុខុមាលភាពសង្គម តាមរយៈសកម្មភាពមនុស្សធម៌» ។
ព្រះអង្គចាប់ផ្ដើមសាងផ្នួសតាំងពីអាយុ ១១ ឆ្នាំនៅស្រុកកំណើតនៃខេត្ដកំពង់ធំក្នុងឆ្នាំ ១៩៩៦ ហើយក្នុងឆ្នាំ ១៩៩៩ ព្រះអង្គបាននិមន្ដមកកាន់ខេត្ដបាត់ដំបង បំណងសិក្សានៅសាលាពុទ្ធិករហូតដល់ចប់មធ្យមសិក្សា។ ព្រះអង្គជាប់អាហារូបករណ៍ទៅសិក្សាថ្នាក់បរិញ្ញាបត្រនៅប្រទេសមីយ៉ាន់ម៉ា ៣ ឆ្នាំក្នុងឆ្នាំ ២០០៦ និងថ្នាក់បរិញ្ញាបត្រជាន់ខ្ពស់នៅស្រីលង្ការក្នុងឆ្នាំ ២០១០។ ឆ្នាំ ២០១២ ព្រះភិក្ខុអង្គនេះបានផ្ដួចផ្ដើមបង្កើតអង្គការដោយផ្ដោតលើកម្មវិធីអប់រំចំនួន ៥។
ព្រះអង្គមានសង្ឃដីកាថា៖ «យើងមានគម្រោងច្រើនទាំងរយៈពេលខ្លី និងរយៈពេលវែង។ តែគម្រោងនិរន្ដរភាពដែលយើងបាននិងកំពុងធ្វើរាល់ថ្ងៃនេះមានចំនួន ៥ គឺគម្រោងកម្មវិធីអប់រំយុវជន គម្រោងអប់រំទណ្ឌិត គម្រោងផ្សព្វផ្សាយព្រះធម៌ គម្រោងជួយជនចាស់ជរា និងជនក្រីក្រ និងគម្រោងជួយកុមារកំព្រា»។
អង្គការបានសហការជាមួយសាលារដ្ឋចំនួន ២ ដូចជាសាលាបឋមសិក្សាវត្ដកំផែង និងអនុវិទ្យាល័យវត្ដគរ។ ក្រុមព្រះសង្ឃស្ម័គ្រចិត្ដបង្រៀនផ្នែកសីលធម៌ សុជីវធម៌ គុណធម៌ ប្រពៃណី និងទំនៀមទម្លាប់។
ការប្រណិប័តន៍ព្រះធម៌របស់ពុទ្ធបរិស័ទនៅសួនច្បារអគារ ព.អ.ក។ហុង មិនា
ព្រះតេជព្រះគុណ សៀងហៃ ព្រះជន្ម ៣៤ វស្សាបានប្រាប់ភ្នំពេញប៉ុស្ដិ៍ថា៖ «យើងក៏មានកម្មវិធីចុះអប់រំយុវជនតាមសាលារៀននានា។ ប៉ុន្ដែវាជាលក្ខណៈមិនទៀងទាត់ទៅតាមកម្មវិធីរយៈពេលខ្លី និងម្ដងកាល។ យើងចុះអប់រំតាមលក្ខណៈជាសិក្ខាសាលាបែបនេះស្ទើរតែទូទាំងព្រះរាជាណាចក្រកម្ពុជាទាំងថ្នាក់ឧត្ដម និងថ្នាក់មធ្យម។ យើងពន្យល់ពីការដឹងគុណឪពុក ម្ដាយ និងណែនាំកែប្រែអត្ដចរិត» ។
អ្នកទទួលបានការអប់រំតាមរយៈគម្រោងនេះមានចំនួនរាប់ម៉ឺននាក់។ ជាក់ស្ដែងមានការបោះពុម្ពសៀវភៅសរសេរ ២ ម៉ឺនក្បាល ហើយអង្គការយកវាមកប្រើក្នុងសិក្ខាសាលា។ អ៊ីចឹង ១ ឆ្នាំធ្វើយ៉ាងម៉េចចែកឲ្យអស់សៀវភៅ ២ ម៉ឺនក្បាល ជាពិសេសសិស្សនៅតាមបណ្ដាសាលាក្រីក្រ។ អង្គការ ព.អ.ក មិនត្រឹមតែផ្ដល់ការអប់រំផ្នែកស្មារតីផង និងសម្ភារសិក្សាផងដែរទេ។
កិច្ចការជោគជ័យដ៏គួរឲ្យកត់សម្គាល់របស់អង្គការ ព.អ.ក ចំណោមកម្មវិធីទាំង ៥ គឺការអប់រំទណ្ឌិតនៅក្នុងពន្ធនាគារខេត្ដបាត់ដំបងដែលការបង្រៀនត្រូវបានពង្រីកពីការបង្រៀនត្រឹមតែទណ្ឌិតប្រុសដល់ទណ្ឌិតស្រី និងបន្ថែមម៉ោងទៀត។
ព្រះភិក្ខុ បានបន្ដថា៖ «រយៈពេលប៉ុន្មានឆ្នាំមកនេះការអប់រំផ្លូវចិត្ដដល់ទណ្ឌិតបានបង្ហាញពីលទ្ធផលល្អដោយពួកគេមានការកែប្រែតាមរយៈការធ្វើសមាធិ ចេះសូត្រធម៌ សង្រួមចិត្ដឲ្យយល់ដឹងពីការរស់នៅក្នុងសង្គម និងមេរៀនអំពីមង្គល ៣៨ ប្រការគឺការមិនសេពគប់បុគ្គលពាល និងសេពគប់បណ្ឌិតអ៊ីចឹង។ ការអប់រំក៏ផ្ដោតលើមាគ៌ាជីវិត។ ពេលពួកគាត់ចេញមកវិញ ពួកគាត់រស់នៅក្នុងសង្គមដោយមិនប្រព្រឹត្ដឆ្គាំឆ្គងអ្វីតទៅទៀត។
សកម្មភាពសិក្សាភាសាបរទេស និងព្រះធម៌របស់យុវសិស្ស។ហុង មិនា
ព្រះតេជព្រះគុណដែលបើកទូលាយដល់ពុទ្ធបរិស័ទ និងមហាជនមកសិក្សាស្វែងយល់ពីព្រះធម៌នៅអង្គការផ្ទាល់បានបន្ថែមថា៖ «អាត្មាវាយតម្លៃទូទៅថា ពួកគាត់មានការផ្លាស់ប្ដូរច្រើនណាស់។ អ្នកទោសទាំងអស់ហ្នឹង ពួកគាត់បានកែប្រែពីចំណុចអវិជ្ជមានមកវិជ្ជមានច្រើន។ ជាក់ស្ដែងអ្នកគ្រប់គ្រងនៅពន្ធនាគារមើលឃើញពីការផ្លាស់ប្ដូរឥរិយាបថរបស់អ្នកទោស។ អ៊ីចឹងពីមុនគេឲ្យបង្រៀនតែអ្នកទោសប្រុសៗទេ តែឥឡូវគេឲ្យបង្រៀនអ្នកទោសស្រីៗ និងបន្ថែមម៉ោងបង្រៀនទៀត។ ពេលពួកគាត់ចេញពីពន្ធនាគារពួកគាត់តែងតែមកជួបក្រុមការងារអាត្មាដោយការថ្វាយបង្គំ និងថ្លែងអំណរគុណចំពោះការបង្ហាត់បង្រៀនសីលធម៌សង្គម»។
ក្រៅពីកិច្ចការអប់រំយុវជននូវចំណេះដឹងភាសាបរទេស និងទណ្ឌិតនូវសីលធម៌ គុណធម៌សង្គម អង្គការ ព.អ.ក ក៏បានជួយដល់ជនចាស់ជរាគ្មានទីពឹងនូវការសាងសង់ផ្ទះសម្បែង សម្ភារប្រើប្រាស់ និងប្រាក់ឧបត្ថម្ភប្រចាំខែព្រមទាំងការផ្សព្វផ្សាយព្រះធម៌របស់ព្រះសម្មាសម្ពុទ្ធតាមរយៈប៉ុស្ដិ៍វិទ្យុ និងទូរទស្សន៍ផងដែរ។
ទោះជាយ៉ាងណាព្រះតេជព្រះគុណគង់នៅវត្ដកំផែងអង្គនេះក៏បានជួបនូវការលំបាកពេលដំណើរការផ្សព្វផ្សាយ និងបង្រៀនតាមសាលារៀនដោយសារអាជ្ញាធរដែលផ្ដល់ការអនុញ្ញាតបារម្ភថា ព្រះអង្គប្រើវេទិកានោះជាការឃោសនាគោលនយោបាយគណបក្សណាមួយ ។
ព្រះអង្គមានសង្ឃដីកាថា៖ «ឥឡូវនេះក្រោយពីការបរិយាយ និងការអប់រំរបស់ព្រះសង្ឃកន្លងមកសិស្សានុសិស្សចេះយល់ពីគុណតម្លៃនៃការអប់រំ យល់ដឹងពីគុណគ្រូ គុណឪពុកម្ដាយ។ ពួកគេមើលឃើញពីអត្ដចរិតរបស់សិស្សមានការផ្លាស់ប្ដូរ អ៊ីចឹងពួកគេតែងតែនិមន្ដព្រះសង្ឃផ្ដល់ការអប់រំបន្ថែមទៀត»។
ព្រះសង្ឃ សៀង ហៃ បានឲ្យដឹងថាអង្គការ ព.អ.ក ទទួលមូលនិធិភាគច្រើនលើសលប់ពីប្រជាជនកម្ពុជា ជាពិសេសពុទ្ធបរិស័ទទាំងក្នុង និងក្រៅស្រុក។
អង្គការពុទ្ធសាសនាដើម្បីការអប់រំនៃកម្ពុជាមានទីតាំងនៅភូមិកំពង់សីមា សង្កាត់វត្ដគរ ខេត្តបាត់ដំបងចម្ងាយប្រមាណ ៣ គីឡូម៉ែត្រលើផ្លូវទៅកាន់ប្រាសាទបាណន់។
សម្រាប់ព័ត៌មានលម្អិតសុំចូលទៅកាន់ហ្វេសប៊ុក @bec.organization ឬ ទាក់ទងតាមរយៈលេខទូរស័ព្ទ ០១៧ ៤៤ ៦២ ៦៣៕
វីដេអូ៖
