.jpg)
អ្នកចម្រៀង និងនិពន្ធ ជីវ ឈេងហ៊ាង ដែលបានទទួលហិរញ្ញប្បទានបណ្ដុះគ្រាប់ពូជកាលពី ២០១៩។ រូបថត សហការី
ភ្នំពេញ: ក្នុងបំណងគាំទ្រសិល្បៈ និងវប្បធម៌នៅកម្ពុជា អង្គការមូនិធិកុមារកម្ពុជា ស៊ីស៊ីអេហ្វ (CCF) បានប្រកាសបើកទទួលពាក្យសុំហិរញ្ញប្បទានបណ្ដុះគ្រាប់ពូជ CATA:LIST ឆ្នាំ ២០២០ ជាលើកទីប៣ សម្រាប់គាំទ្រដល់សិល្បៈ និងអ្នកសម្ដែងខ្មែរ។
ការបើកទទួលពាក្យសុំហិរញ្ញប្បទានបណ្ដុះគ្រាប់ពូជនឹងចាប់ផ្ដើមនៅថ្ងៃទី ១ ខែ ធ្នូ ឆ្នាំ ២០២០ ដោយផ្ដល់ហិរញ្ញប្បទានរហូតដល់ ៣ ០០០ ដុល្លារ សម្រាប់ ៥ គម្រោង ក្នុងគោលដៅគាំទ្រដល់គម្រោងច្នៃប្រឌិត ដែលបង្កើតដោយកូនខ្មែរ និងជួយដល់ការអភិវឌ្ឍទេពកោសល្យរបស់សិល្បករខ្មែរ។
កម្មិវធីហិរញ្ញប្បទានបណ្ដុះគ្រាប់ពូជ ស៊ីស៊ីអេហ្វ CATA:LIST ឆ្នាំ ២០២០ អាចប្រព្រឹត្តទៅបានដោយសារមានជំនួយថវិការមកពីការរៃអង្គាសរបស់ឯកអគ្គរដ្ឋទូតសិង្ហបុរីប្រចាំនៅកម្ពុជា លោក ម៉ៃឃើល តាន់ (Michael Tan) និងលោកស្រី ស្ទែឡា ទោ (Stella Toh) ប្រធានកម្មវិធីស្ទ្រីតអាត++ ដែលជាមហោស្រពសិល្បៈរយៈពេល ២ សប្ដាហ៍ ដើម្បីប្រារព្ធខួប ៥៥ ឆ្នាំ នៃទំនាក់ទំនងការទូត កម្ពុជា និងសិង្ហបុរី។
ការផ្ដល់ហិរញ្ញប្បទានដែលដំណើរការរហូតដល់ឆ្នាំទី៣ ត្រូវបានលោក ស្កុត នីសិន ស្ថាបនិក និងនាយកប្រតិបត្តិនៃអង្គការមូលនិធិកុមាររកម្ពុជា ដែលធ្វើឲ្យមហាជនកោតសរសើរពីទឹកចិត្តសប្បុរសធម៌ បោះបង់ចោលអាជីពខ្ពង់ខ្ពង់នៅហូលីវូដ មកជួយកុមារកម្ពុជា លោក ស្កុត នីសិន បានបន្តទៀតថា៖ «ខ្ញុំសូមថ្លែងអំណរគុណដល់លោក ឯកអគ្គរដ្ឋទូតសិង្ហបុរីប្រចាំនៅកម្ពុជា លោក ម៉ៃឃើល តាន់ សម្រាប់ការគាំទ្រសិល្បៈ និងជ្រើសរើសអង្គការមូលនិធិកុមារកម្ពុជា ជាអង្គការ ដែលទទួលបានការឧបត្ថម្ភ»។
គ្រូបង្រៀនឧបករណ៍តន្ត្រី និងស្ថាបនិកសាលាតន្ត្រីមិត្តភាព គាត សុគីម (ឆ្វេង) ដែលបានទទួលហិរញ្ញប្បទានបណ្ដុះគ្រាប់ពូជកាលពី ២០១៩។ រូបថត សហការី
ដើម្បីបន្តស្មារតីនៃកិច្ចសហការនេះ កម្មវិធីហិរញ្ញប្បទានបណ្ដុះគ្រាប់ពូជ ស៊ីស៊ីអេហ្វ លើកទី៣ នេះ នឹងផ្ដល់ហិរញ្ញប្បទានទៅគម្រោងអភិវឌ្ឍសិល្បៈណា ដែលនឹងបានរួមបញ្ចូលកិច្ចសហប្រតិបត្តិការ និងភាពជាដៃគូជាមួយបុគ្គលិក សិស្ស និស្សិត ឫសហគមន៍របស់ស៊ីស៊ីអេហ្វ។
អង្គការមូលនិធិកម្ពុជា មានគោលដៅក្នុងការដើរតួនាទីជាអ្នកសម្របសម្រួលលើកទឹកចិត្តដល់គម្រោងច្នៃប្រឌិត និងធានាឲ្យបានថា សហគមន៍សិល្បៈនៅកម្ពុជា អាចទទួលបានឱកាសស្វែងរកធនធាន និងទស្សនិកជន។
លោក នីកគី វើត ប្រធានគ្រប់គ្រងហិរញ្ញប្បទាននៃអង្គការមូលនិធិកុមារកម្ពុជា បានលើកឡើងថា៖ «គោលដៅរបស់យើងជាមួយហិរញ្ញប្បទានសម្រាប់គម្រោងតូចៗទាំងនេះ គឺដើម្បីជំរុញការអនុវត្តប្រកបដោយភាពច្នៃប្រឌិតរបស់សិល្បករខ្មែរវ័យក្មេង ដែលជាធម្មតា ពួកគេមិនបានទទួលមូលនិធិ ឬអ្នកដែលរងផលប៉ះពាល់ផ្នែកសេដ្ឋកិច្ចក្នុងកំឡុងពេលមានជំងឺរាតត្បាតកូវីដ ១៩។ យើងចង់បន្ថែមពីសិល្បករទាំងនេះ ហើយសង្ឃឹមថា យើងអាចជួយពួកគេឲ្យក្លាយជាសិល្បករអាជីព»។
បេក្ខជនដែលមានសិទ្ធិទទួលបានជំនួយនឹងធ្វើការនៅក្នុងវិស័យសិល្បៈនានាដូចជា ស្ថាបត្យកម្ម គំនូរ ជីវចល សិល្បៈឌីជីថល ការរចនា និងម៉ូដ ខ្សែភាពយន្ត តន្ត្រី របាំ និងល្ខោន សេដ្ឋកិច្ចច្នៃប្រឌិត ជំនាញផ្នែកវប្បធម៌នានា អក្សរសាស្ត្រ សិល្បៈចក្ខុ និង ការរួមបញ្ចូលគ្នានៃទម្រង់សិល្បៈនានា។
ចាប់តាំងពីឆ្នាំ ២០១៨ មក កម្មវិធីហិរញ្ញប្បទានបណ្ដុះគ្រាប់ពូជ CATA:LIST បានគាំទ្រដល់សិល្បករខ្មែរវ័យក្មេងជាច្រើនរូប ដោយបានផ្ដល់ថវិការហូតដល់ជាង ៣ ម៉ឺនដុល្លារអាមេរិក នៅទូទាំងប្រទេសកម្ពុជា។
អ្នកចម្រៀង និងអ្នកនិពន្ធលោក រែន បូលី ដែលបានទទួលហិរញ្ញប្បទានឆ្នាំ ២០១៩។ រូបថត សហការី
ក្នុងឆ្នាំ ២០១៩ ហិរញ្ញប្បទានត្រូវបានប្រគល់ជូន អ្នកចម្រៀង និងនិពន្ធ រែន បូលី អ្នកចម្រៀង និងនិពន្ធ ជីវ ឈេងហ៊ាង សិល្បករគំនូរ លន ជីវ័ន្ត រហស្សនាម G1 គ្រូបង្រៀនឧបករណ៍តន្ត្រី និងស្ថាបនិកសាលាតន្ត្រីមិត្តភាព គាត សុគីម និងក្រុមតន្ត្រី Death Metal ដូចឆ្កែ។
និយាយពីការផ្លាស់ប្ដូរដែលបានមកពីហិរញ្ញប្បទានឆ្នាំ ២០១៩ របស់លោក រែន បូលី មានឲ្យដឹងថា៖ «ហិរញ្ញប្បទានបណ្ដុះគ្រាប់ពូជរបស់ស៊ីស៊ីអេហ្វ ផ្ដល់ឲ្យខ្ញុំនូវជំនួញហិរញ្ញវត្ថុដែលខ្ញុំត្រូវការ។ ហិរញ្ញប្បទាននេះ ធ្វើឲ្យខ្ញុំមានអារម្មណ៍ថា ខ្ញុំមានទំនួលខុសត្រូវធំមួយដែលខ្ញុំចាំបាច់ត្រូវធ្វើ ហើយខ្ញុំត្រូវតែព្យាយាមឲ្យអស់ពីសមត្ថភាព ពីព្រោះខ្ញុំមានអារម្មណ៍ថា មានមនុស្សម្នាក់ដែលជឿជាក់ និងទុកចិត្តលើខ្ញុំ ដោយសារហេតុផលនេះហើយ ទើបខ្ញុំមិនចង់ធ្វើឲ្យពួកគាត់ខកចិត្ត»។
បេក្ខភាពទទួលហិរញ្ញប្បទានឆ្នាំ ២០១៩ រូបនេះបានបន្តទៀតថា៖ «ខ្ញុំតែងតែមានគោដៅ ដែលខ្ញុំចង់ធ្វើ និងចែករំលែកទៅដល់មនុស្សជុំវិញពិភពលោក។ ការទទួលបានហិរញ្ញប្បទាននេះ មានតម្លៃខ្លាំងណាស់សម្រាប់ខ្ញុំ។ បើគិតអំពីអ្វីដែលខ្ញុំធ្វើបានជាមួយនឹងហិរញ្ញប្បទានដែលខ្ញុំទទួលបាននេះ គឺហួសពីការគិតរបស់ខ្ញុំ»។
ព័ត៌មានបន្ថែមពីដំណើរការដាក់ពាក្យសុំសម្រាប់ឆ្នាំ ២០២០ អាចស្វែងរកបានតាមរយៈវេបសាយ https://www.cambodianchildrensfund.org/catalist-grants
