សៀមរាប៖ អ្នកខ្លះប្រហែលជាមានអារម្មណ៍ធុញថប់ ស្ដ្រេស ឯកា ឬថែមទាំងក្រេវក្រោធ ពេលពួកគេត្រូវបានបង្គាប់ឲ្យស្នាក់នៅតែក្នុងផ្ទះ។ ប៉ុន្ដែចូរស្រមៃថា ពេលក្រោកពីដំណេកមកមិនដឹងថា ថ្ងៃនេះខ្លួនមិនមានអ្វីហូបនោះ។ នេះគឺជារឿងពិតសម្រាប់មនុស្សជាច្រើននៅជុំវិញពិភពលោក ជាពិសេសអ្នកមានពិការភាពដែលត្រូវផ្គត់ផ្គង់គ្រួសារ។
អ្នកមានពិការភាពដែលរស់នៅក្នុងខេត្ដសៀមរាបមួយចំនួនបានប្រកបរបរផលិតនូវផលិតផលសិប្បកម្ម ដើម្បីចិញ្ចឹមជីវិតដោយការលក់ផលិតផលទាំងនោះនៅហាងលក់រាយមួយនៅសៀមរាប។
ដោយសារតែវិស័យទេសចរណ៍ និងវាយនភណ្ឌ ដែលជាឧស្សាហកម្មធំបំផុតនៅកម្ពុជាបានទទួលរងនូវវិបត្ដិធ្ងន់ធ្ងរពីការរាតត្បាតនៃជំងឺកូវីដ ១៩ មិនខុសពីជំនួញទេសចរណ៍ដទៃក្នុងលោក ហាងលក់ផលិតផលជនពិការនៅសៀមរាបនេះក៏ត្រូវបិទទ្វារ ដែលបន្សល់ទុកឲ្យពួកគេគ្មានចំណូលអ្វីសោះ។
ហាងលក់រាយដំណើរការដោយសហគ្រាសតូចមួយ របស់អង្គការសប្បុរសធម៌ក្នុងខេត្ដសៀមរាប Genevieve''s Fair Trade Village (GFTV) កំពុងតែខិតខំប្រឹងយ៉ាងត្រដាបត្រដួស ក្នុងការជួយអ្នកមានពិការភាព និងក្រុមគ្រួសាររបស់ពួកគេដើរឆ្លងកាត់ពេលវេលាដ៏លំបាកនេះ។
ប៉ុន្មានសប្ដាហ៍មុន GFTV ចាប់ផ្ដើមដំណើរការកម្មវិធី Foodbank និងបង្កើតយុទ្ធនាការប្រមូលមូលនិធិ «ចាំតិច! អ្នកមិនឯកាទេ» ដើម្បីទ្រទ្រង់អ្នកមានពិការភាពនៅសៀមរាប។
អ្នកស្រី ជេននី ផាកឃ័រ ជាអ្នកសម្របសម្រួលផ្នែកទីផ្សារស្ម័គ្រចិត្ដរបស់ GFTV បាននិយាយថា៖ «គោលដៅរបស់ពួកគេ គឺជួយទ្រទ្រង់ក្រុមគ្រួសារអ្នកមានពិការភាពរហូតដល់ពួកគេអាចវិលទៅប្រកបរបរដូចមុនវិញ និងបន្ដប្រតិបត្ដិការជាសហគ្រាសសង្គម។ ដូច្នេះ ក្រុមគ្រួសារទាំងនោះមានដើមទុនខ្លះៗពេលអ្វីៗបានប្រសើរឡើងវិញ»។
ធនាគារស្បៀង ឬ Foodbank បង្កើតឡើងដោយអ្នកស្រី ឆូយ ណារ៉េត ជានាយិកា GFTV និងដឹកនាំដោយស្ដ្រីម្នាក់ទៀតឈ្មោះ ផល្លា យ៉ៃ ជាមួយអ្នកស្ម័គ្រចិត្ដជនជាតិបរទេស ៤ នាក់ទៀត។ វាជាកម្មវិធីបង្កើតឡើងដំបូងសម្រាប់ផ្ដល់ស្បៀងឲ្យសិប្បករ និងក្រុមគ្រួសារពួកគេអំឡុងពេលគ្មានប្រាក់ចំណូលពីការបិទទ្វារហាងនេះ។
អ្នកស្រី ជេននី ផាកឃ័រ បានប្រាប់ភ្នំពេញប៉ុស្ដិ៍ថា៖ «ថ្មីៗនេះ ក្រុមការងារធនាគារស្បៀងបានចុះចែកកញ្ចប់ស្បៀងដល់ ២៨ គ្រួសារ ដែលជាអ្នកមានពិការភាពរស់នៅជុំវិញខេត្ដសៀមរាប ហើយពួកគេក៏បានចែកស៊ុត ១ ៤០០ គ្រាប់ ដល់អង្គការ ABCs and Rice ដល់ ៧០ គ្រួសារផងដែរ»។
កញ្ចប់ក្រុមគ្រួសាររបស់ GFTV បានផ្ដល់ស្បៀងអាហារមូលដ្ឋានដល់គ្រួសារដែលមានសមាជិកពិការភាពយ៉ាងតិចម្នាក់ក្នុង ១ ខែ។
គ្រួសារដែលទទួលកញ្ចប់ស្បៀង ត្រូវមានសមាជិកពិការភាពយ៉ាងតិចម្នាក់ ហើយពួកគេជាសិប្បករពិការភាព ដែលលក់ផលិតផលរបស់ខ្លួននៅហាង GFTV ក្រុមគ្រួសារដែលរស់នៅកសិដ្ឋាន Full Belly Farm នៅជាយក្រុង និងក្រុមអ្នកបើករ៉ឺម៉កចំនួន ១០ នាក់។
អ្នកស្រី ជេននី បានឲ្យដឹងថា៖ «ហាងរបស់យើងក៏ជួយ ៦ គ្រួសារ ក្រោមគម្រោង Full Belly Farm ដែលពួកគេធ្លាប់ជាគ្រួសារគ្មានជម្រក ហើយយ៉ាងតិចមានសមាជិកម្នាក់ជាជនពិការ»។
ផលិតផលជាច្រើនចាប់ពីស្នាដៃសិល្បៈ គ្រឿងតុបតែងកាយ កាបូប និងកន្ដ្រក ខ្សែដៃ ចម្លាក់ សម្លៀកបំពាក់ ទុយោបឺត អាហារ គ្រឿងអលង្ការ សម្ភារពីក្រដាស និងតម្បាញ ត្រូវបានដាក់លក់នៅហាង GFTV។
ភ្ញៀវក៏អាចចូលរួមសិក្ខាសាលាដែលរៀនពីសិប្បករក្នុងស្រុកចំពោះការច្នៃផលិតសម្ភារក្រដាស សៀវភៅសរសេរ ឬគ្រឿងអលង្ការនានា។
អ្នកស្រី ជេននី បានបន្ដថា៖ «នៅ GFTV យើងបានដឹងច្បាស់អំពីផលប៉ះពាល់ដែលយើងជាមនុស្សធ្វើលើបរិស្ថាន ហើយសម្ភារជាច្រើនដែលផលិតឡើងដោយសិប្បករយើង គឺបានមកពីការប្រើប្រាស់ឡើងវិញ»។
អ្នកស្រីលើកឡើងថា៖ «បច្ចុប្បន្ននេះ យើងមិនទាន់ដំណើរការហាងអនឡាញដែលសម្រាប់ដាក់លក់ផលិតផលសិប្បកម្មរបស់អ្នកមានពិការភាពឡើយ»។
ពេលនេះ GFTV កំពុងដំណើរការរៀបចំ និងបង្កើតផ្សារអនឡាញ ដើម្បីស្វែងរកចំណូលខ្លះៗ។ ប៉ុន្ដែវាត្រូវការថវិកា ក៏ដូចជាពេលវេលា និងការខិតខំ ស្របពេលអង្គការជនពិការមួយនេះត្រូវការជំនួយជាចាំបាច់។
អ្នកសម្របសម្រួលផ្នែកទីផ្សារស្ម័គ្រចិត្ដរូបនេះ បាននិយាយថា៖ «ពួកគេត្រូវការមូលនិធិដើម្បីជួយទ្រទ្រង់ក្រុមគ្រួសារប្រយុទ្ធប្រឆាំងនឹងវីរុសកូរ៉ូណា។ រួមគ្នាក្នុងនាមជាសហគមន៍សកលលោក យើងអាចជួយពួកគេរង់ចាំ និងប្រាប់ពួកគេថា ពួកគេមិនឯកោឡើយ»។
អ្នកស្រី ជេននី បានឲ្យដឹងថា ការបរិច្ចាគតាមរយៈយុទ្ធនាការ GoFundMe និងការរៃអង្គាសប្រាក់អនឡាញផ្សេងៗទៀតក្នុងរយៈពេលខ្លីនឹងផ្ដោតលើវិស័យចំនួន ៣។
អ្នកស្រីអះអាងថា៖ «អាទិភាពដំបូង គឺទ្រទ្រង់អ្នកមានពិការភាពដែលត្រូវការជំនួយចាំបាច់។ មួយវិញទៀត ពួកគេជួយដល់ភាពរស់រាននៃអង្គការ GFTV ជាសហគ្រាសសង្គម។ ចុងក្រោយ ពួកគេជួយរ៉ាប់រងក្នុងការបង្កើតហាងតាមអនឡាញ។ ដូច្នេះ សិប្បករអាចបន្ដលក់ផលិតផលរបស់ខ្លួននូវរយៈពេលប៉ុន្មានខែខាងមុខទៀត»។
អ្នកស្រីនិយាយថា អង្គការសុខភាពពិភពលោកបានរាយការណ៍ថា ផលប៉ះពាល់កូវីដ-១៩ កាន់តែជះឥទ្ធិពលខ្លាំងលើអ្នកមានពិការភាព ការរស់រានរបស់ជនមានពិការភាពពិតជាសំខាន់។
អ្នកស្រីបញ្ជាក់ថា៖ «ដើម្បីធានាថា GFTV នៅមានថវិកាសម្រាប់ទិញស្បៀងអាហារ និងសម្ភារប្រើប្រាស់ចាំបាច់ផ្សេងៗទៀតតាមរយៈទឹកប្រាក់មូលនិធិ ដែលនឹងត្រូវវេរទៅកាន់គណនេយ្យ GFTV»។
អ្នកស្រីបន្ថែមថា៖ «មិនថា ជាការរួមចំណែកតិចក្ដី ឬច្រើនក្ដី ការបរិច្ចាគរបស់អស់លោកអ្នកនឹងជួយឲ្យប្រសើរឡើង។ សម្រាប់ព័ត៌មានលម្អិតចំពោះការបរិច្ចាគ សូមចូលទៅកាន់វេបសាយ www.gftv-sr.org/covid-19»។
អង្គការស្ថិតនៅផ្លូវសែនសុខ Genevieve''s Fair Trade Village (GFTV) ក្រុងសៀមរាប ពេលនេះបិទទ្វារដោយសារការរាតត្បាតនៃវីរុស។ សម្រាប់ព័ត៌មានបន្ថែម សុំចូលទៅកាន់ហ្វេសប៊ុក ឬទាក់ទង ០៧០ ៤៩៩ ៧០៩៕