ភ្នំពេញៈ បេក្ខជនអាទិភាពជាស្ត្រី ជនពិការ ជនជាតិភាគតិច ឬអ្នកមកពីសហគមន៍សំឡេងតិចនឹងត្រូវបានលើកទឹកចិត្តឲ្យដាក់ស្នើសុំអាហារូបករណ៍សិល្បៈអមតៈអាន ចនផន ឆ្នាំ ២០២១ ដើម្បីបន្តអាជីពការងាររបស់ខ្លួននៅក្នុងវិស័យសិល្បៈ។
កម្មវិធីអាហារូបករណ៍នេះជួយដល់សិស្សានុសិស្ស ឬនិស្សិត អភិវឌ្ឍជំនាញភាពជាអ្នកដឹកនាំ ការគ្រប់គ្រងហិរញ្ញវត្ថុ ការរៀបចំផែនការអាជីពការងារ និងផ្តល់ជូននូវកញ្ចប់ថវិកា ដើម្បីចំណាយលើថ្លៃចូលរួមវគ្គបណ្តុះបណ្តាល និងចំណាយផ្សេងៗទៀតផង ដែលមានរយៈពេលតិច ឬច្រើនឆ្នាំអាស្រ័យទៅលើការស្នើសុំលើមុខជំនាញរបស់បេក្ខជន។
បើតាមលោក គាត សុគីម បុគ្គលិកផ្នែកទំនាក់ទំនងព័ត៌មាននៃអង្គការសិល្បៈខ្មែរអមតៈបានឲ្យដឹងត្រួសៗថា៖ «អាហារូបករណ៍នេះនឹងផ្តល់ជូនសិស្សសិល្បៈ និងសិល្បករវ័យក្មេងដែលបង្ហាញពីទេពកោសល្យ និងជំរុញទឹកចិត្តដើម្បីការអភិវឌ្ឍជំនាញសិល្បៈ ដែលអាទិភាពត្រូវបានប្រគល់ជូនបេក្ខជនដែលពុំសូវទទួលបានឱកាសនេះ។ យើងបានផ្តល់អាហារូបករណ៍ដល់បេក្ខជនប្រហែល ១១០ រូបហើយចាប់តាំងពីកម្មវិធីអាហារូបករណ៍នេះ បានចាប់ផ្តើមមក។ កាលពីឆ្នាំមុនបេក្ខជន ១០ រូបបានទទួលអាហារូបករណ៍សិល្បៈអមតៈអានចន ផន ហើយពួកគេទទួលបានការគាំទ្រលើការសិក្សាទាំងក្នុង និងក្រៅជំនាញសិល្បៈ។ ឥឡូវយើងកំពុងបើកទទួលពាក្យអាហារូបករណ៍ឆ្នាំ ២០២១ ដោយការទទួលពាក្យស្នើសុំអាហារូបករណ៍ចាប់ផ្តើមពីខែមីនារហូតដល់ថ្ងៃទី ៣១ ខែឧសភា ឆ្នាំ ២០២០ ហើយយើងក៏មានចំនួន ១០ កន្លែងទៀតផងដែរ។ បន្ទាប់ពីឆ្លងកាត់ដំណាក់កាល ជ្រើសរើស សិស្សដែលទទួលបានអាហារូបករណ៍ ខណៈលទ្ធផលនឹងប្រកាសនៅពេលក្រោយទៀត»។
លោក គាត សុគីម បន្តថា៖ «កន្លងមកកម្មវិធីផ្តល់អាហារូបករណ៍នេះ យើងមាន ២ កញ្ចប់ (កញ្ចប់តូច និងកញ្ចប់ធំ) សម្រាប់ផ្តល់ការឧបត្ថម្ភថវិកាដល់សិស្ស។ តែពេលនេះយើងសម្រេចផ្តល់ជូនជាកញ្ចប់ធំតែមួយ- (តម្លៃ ១២០០ ដុល្លារ) សម្រាប់សិស្សជាប់អាហារូបករណ៍សិល្បៈអតមៈ អាន ចនផន នៅឆ្នាំ ២០២១ នេះ។ ចំពោះការផ្តល់ជូនវិញអាចមានតិចឆ្នាំ ឬច្រើនឆ្នាំអាស្រ័យការស្នើសុំរបស់បេក្ខជនគឺអាចមានរយៈពេល ១ ឆ្នាំ ឬ ២ ឆ្នាំ ឬអាចសម្រាប់ការសិក្សាជាកម្រិតបរិញ្ញបត្រ (៤ ឆ្នាំ) ក៏មាន។ ចំណែកឯបេក្ខជនដាក់ពាក្យរួចនោះខាងអង្គការសិល្បៈខ្មែរអមតៈនឹងមានក្រុមគណៈកម្មការវាយតម្លៃ ដើម្បីធ្វើការជម្រុះ និងចម្រាញ់យកសិស្សអាហារូបករណ៍មាន ៣ ដំណាក់កាលផងដែរ ទើបឈានដល់ការសម្រេចចុងក្រោយចំនួន ១០ នាក់»។
ការទទួលពាក្យស្នើសុំអាហារូបករណ៍សិល្បៈអមតៈ អាន ចនផន ឆ្នាំ ២០២១ ចាប់ទទួលពាក្យហើយសម្រាប់សិល្បករ សិស្ស ឬនិស្សិតសិល្បៈ និងអ្នកបម្រើការក្នុងវិស័យសិល្បៈ។ សូមកុំខកខានឱកាសទទួលបានអាហារូបករណ៍នេះ ដើម្បីពង្រឹងសមត្ថភាពរបស់ខ្លួនទាំងក្នុង និងក្រៅជំនាញសិល្បៈ។ សូមទាក់ទងមកកាន់ក្រុមការងាររបស់អង្គការសិល្បៈខ្មែរអមតៈតាមរយៈលេខទូរស័ព្ទ 010 941 224 ពីថ្ងៃចន្ទ-សុក្រ (៨ ព្រឹក ៥.៣០ ល្ងាច) ខណៈសម្រាប់ព័ត៌មាន និងពាក្យស្នើសុំដែលបានបំពេញរួចរាល់នោះសូមផ្ញើទៅកាន់ sormanak@cambodianlivingarts.org៕