.jpg)
វិចិត្រករស្រី សៅ ស្រីម៉ៅ ដែលធ្លាប់ទទួលបានមូលនិធិគម្រោងពីអង្គការសិល្បៈខ្មែរអមតៈក្នុងការបង្កើតស្នាដៃពិព័រណ៍ខ្លួនកាលពីឆ្នាំ ២០១៨ កន្លងមក។ រូបថត អង្គការសិល្បៈខ្មែរអមតៈ
ភ្នំពេញៈ នេះជាឱកាសល្អសម្រាប់ក្រុមសិល្បករ-ការិនី ទាំងចាស់ទាំងក្មេងគ្រប់ទម្រង់ដែលត្រូវការមធ្យោបាយជំនួយផ្នែកហិរញ្ញវត្ថុ ដែលជួយផ្តល់ទៅលើគម្រោង បង្កើតស្នាដៃសិល្បៈថ្មីៗ គម្រោងសហគមន៍ និងការងារស្រាវជ្រាវក្នុងវិស័យសិល្បៈ និងវប្បធម៌ខណៈអង្គការសិល្បៈខ្មែរអមតៈ ចាប់ផ្តើមប្រកាសទទួលពាក្យស្នើសុំមូលនិធិខ្នាតតូច «ដាំដុះ» លើកទី ៣ ឆ្នាំនេះហើយ។
លោក ឥន្ទ សម៉ាណាក់ ជាអ្នកសម្របសម្រួលកម្មវិធីអភិវឌ្ឍន៍សិល្បៈនៃអង្គការសិល្បៈខ្មែរអមតៈបង្ហើបឲ្យដឹងពីដំណើរការនៃគម្រោងស្នើសុំមូលនិធិខ្នាតតូច «ដាំដុះ» លើកទី ៣ ឆ្នាំ ២០១៩ នេះថា៖ «ចាប់ពីពាក់កណ្តាលខែសីហានេះទៅ យើងនឹងបើកទទួលពាក្យស្នើសុំមូលនិធិខ្នាតតូច «ដាំដុះ» សម្រាប់គម្រោងរបស់សិល្បករ-ការិនី។ មូលនិធិនេះចាប់ទទួលពាក្យស្នើសុំគឺចាប់ពីថ្ងៃទី ១៥ ខែសីហាដល់ ថ្ងៃទី ៣០ ខែតុលា ហើយបេក្ខជនជយលាភីនៃសំណើនីមួយៗនឹងប្រកាសនៅដើមខែធ្នូខាងមុខនេះ»។
ការបង្កើតស្នាដៃពិព័រណ៍កាលពីឆ្នាំ ២០១៨ កន្លងមក។ រូបថត អង្គការសិល្បៈខ្មែរអមតៈ
លោក ឥន្ទ សម៉ាណាក់ ក៏បញ្ជាក់ឲ្យដឹងពីការបែងចែកមូលនិធិខ្នាតតូច «ដាំដុះ» ជា ២ ផ្សេងគ្នាផងដែរថា៖ «មូលនិធិនេះចែកជា ២ ប្រភេទគឺមូលនិធិសម្រាប់គម្រោង និងមូលនិធិចល័ត។ ចំពោះមូលនិធិសម្រាប់គម្រោងគឺសម្រាប់កិច្ចការសិល្បៈច្នៃប្រឌិតនានា គម្រោងសិល្បៈសហគមន៍គម្រោងស្រាវជ្រាវអំពីសិល្បៈ និងវប្បធម៌នៅកម្ពុជាដែលបងប្អូនសិល្បករ-ការិនី។ ចំពោះការស្នើសុំប្រាក់ឧបត្ថម្ភពីអង្គការយើង គឺចន្លោះពីខែសីហា នេះទៅដល់ខែតុលា។
ឯមូលនិធិចល័តប្រើសម្រាប់ការចូលរួមកម្មវិធីទាក់ទងនឹងសិល្បៈ និងវប្បធម៌ ដូចជាសិក្ខាសាលា សន្និសីទ ការធ្វើនិវាសនដ្ឋាន វគ្គបណ្តុះបណ្តាល និងជាបេសកកម្មស្រាវជ្រាវទាំងនៅក្នុងប្រទេសកម្ពុជា និងក្រៅប្រទេសដែលស្ថិតនៅក្នុងតំបន់អាស៊ី»។
អ្នករបាំ ពេជ្រ សុភាវី ក៏ធ្លាប់ទទួលមូលនិធិចល័តដាំដុះ។ អង្គការ CLA
នាពេលកន្លងមកនេះជាអាទិ៍ឃើញមានសិល្បករ-ការិនីជាច្រើនរូប ដែលធ្លាប់ទទួលបាននូវមូលនិធិខ្នាតតូច «ដាំដុះ» ពីអង្គការសិល្បៈខ្មែរអតមៈ ដោយក្នុងនោះមានអ្នកគ្រូរបាំឈ្មោះ ពេជ្រ សុភាវី ដែលបានទទួលមូលនិធិចល័តដាំដុះក្នុងឆ្នាំ ២០១៩ ដើម្បីទៅចូលរួមកម្មវិធី SEA Choreolab 2019 ជាផ្នែកគម្រោងនិវេសនដ្ឋានរបស់ Rimbun Dhan កាលពីថ្ងៃទី ៥ ដល់ទី ១៤ ខែកក្កដា ឆ្នាំ ២០១៩ ដែលបានធ្វើនៅប្រទេសម៉ាឡេស៊ី និងវិចិត្រករស្រីកញ្ញា សៅ ស្រីម៉ៅ ដែលបានទទួលមូលនិធិគម្រោងកាលពីឆ្នាំ ២០១៨ កន្លងមក។
សម្រាប់ព័ត៌មានលម្អិតពីមូលនិធិដាំដុះនេះគឺអាចទាក់ទងតាមអ៊ីមែល: grants@cambodianlivingarts.org ឬតាមទូរស័ព្ទ ០១០ ៩៤១ ២២៤៕
