ភ្នំពេញៈ នេះគឺជាការបើកទូលាយសាធារណៈជាលើកដំបូងដែលអង្គការសិល្បៈខ្មែរអមតៈ ប្រកាសផ្តល់មូលនិធិឧបត្ថម្ភទៅដល់សិល្បករជាលក្ខណៈទោល និងជាក្រុម ដើម្បីជួយសម្រួលក្នុងការបង្កើតស្នាដៃសិល្បៈថ្មី ឬត្រៀមបង្កើតស្នាដៃថ្មីមានកញ្ចប់ចំនួនចាប់ពី ១ ០០០ ដុល្លារ រហូតដល់ ៣ ០០០ ដុល្លារ។
សម្រាប់មូលនិធិឧបត្ថម្ភដល់សិល្បករនេះជាស្នាដៃបង្កើតថ្មីទម្រង់សិល្បៈទស្សនីយភាព (របាំ ល្ខោន និងតន្ត្រីដើម) កំពុងតែអភិវឌ្ឍ ហើយត្រូវការបញ្ចប់ ឬជាស្នាដៃត្រៀមបង្កើតថ្មី ខណៈបេក្ខជនត្រូវមានអាយុយ៉ាងច្រើន ៣៥ ឆ្នាំ ស្នាដៃមានខ្លឹមសារត្រូវទៅនឹងគោលគំនិតនៃកម្មវិធីរដូវវប្បធម៌ ហើយមានរយៈពេលសម្តែងពី ៤០ នាទី ទៅ ១ ម៉ោង។
បើតាមកញ្ញា យ៉ុង សុខខន ជាប្រធានកម្មវិធីអភិវឌ្ឍសិល្បៈនៃអង្គការសិល្បៈខ្មែរអមតៈបានឲ្យដឹងថា៖ «ចំពោះស្នាដៃបង្កើត ឬការត្រៀមបង្កើតស្នាដៃរបស់សិល្បករនោះគឺត្រូវតែមានទម្រង់សិល្បៈបែបទស្សនីយភាព និងបង្កើតហើយមានគុណតម្លៃដល់វប្បធម៌ សង្គមជាតិខ្មែរយើង។ យើងមានការផ្តល់ជាកញ្ចប់មូលនិធិឧបត្ថម្ភទៅដល់សិល្បករជាលក្ខណៈទោល ឬក្រុមមានសមាជិកយ៉ាងច្រើនត្រឹមចំនួន ៨ នាក់ ហើយការផ្តល់ជូននេះ យើងមានតែ ២ កន្លែងតែប៉ុណ្ណោះសម្រាប់បេក្ខជន ការឈប់ទទួលពាក្យពីបេក្ខជនជាសិល្បករមានស្នាដៃបង្កើតថ្មីនឹងចប់ត្រឹមថ្ងៃទី ៣១ ខែមីនា ឆ្នាំ ២០២០ នេះ។ ម្យ៉ាងវិញទៀតក្រុមសិល្បករជយលាភីនោះក៏ត្រូវមានពេលវេលាចូលរួមកម្មវិធីរដូវវប្បធម៌លើកទី ២ ដែលមានរយៈពេល ៣ ខែនឹងចាប់ផ្តើមធ្វើនៅខែមិថុនាដល់ខែសីហា ឆ្នាំ ២០២០ ខាងមុខហើយ»។
កញ្ញា យ៉ុង សុខខន ក៏បានបញ្ជាក់ពីការកំណត់ចំនួនសមាជិកក្រុម និងកន្លែងផ្តល់ជូននេះដែរថា៖ «សម្រាប់ការកំណត់ចំនួនសមាជិកក្រុមរបស់សិល្បករ មិនឲ្យមានសមាជិកច្រើនលើសពី ៨ រូបក៏ព្រោះតែយើងមានការកំណត់នៃកញ្ចប់ថវិកានេះ ហើយក៏មានក្តីបារម្ភដែរ សម្រាប់ក្រុមដែលមានគ្នាច្រើនលើសពីចំនួនកំណត់នេះអាចប៉ះពាល់ដល់គុណភាពនៃការបង្កើតស្នាដៃថ្មីរបស់ពួកគាត់ទៀតផង»។
សម្រាប់ព័ត៌មានបន្ថែមបញ្ជាក់ជូននៅក្នុងខិត្តប័ណ្ណ និងតំណភ្ជាប់នៃការដាក់ពាក្យរបស់បេក្ខជនដែលចង់ដាក់ពាក្យទទួលមូលនិធិឧបត្ថម្ភពីអង្គការសិល្បៈខ្មែរអមតៈអាចទំនាក់ទំនងបានតាមទូរស័ព្ទ ០១៧ ៥៥៧ ២៨៥ ឬអាចតាមរយៈសារអេឡិចត្រូនិក sokhorn@cambodinalivingarts.org ៕