.jpg)
រូបតំណាងៈអង្គការ CLA នឹងផ្តល់អាហារូបករណ៍ទស្សនៈវប្បធម៌ដល់សិល្បករមានបទពិសោធយ៉ាងតិច ៥ឆ្នាំ។ រូបថត សហការី
ភ្នំពេញ៖ ប្រសិនបើអ្នកជាពលរដ្ឋខ្មែរ ឬអ្នកកាន់ទិដ្ឋាការ K-Visa កំពុងស្នាក់នៅប្រទេស កម្ពុជា និងមានបទពិសោធការងារយ៉ាងតិច ៥ ឆ្នាំ នៅក្នុងវិស័យសិល្បៈវប្បធម៌ ហើយចង់មានពេលគ្រប់គ្រាន់ ធ្វើការឆ្លុះបញ្ចាំងពីការងារខ្លួន តាមរយៈឧទាហរណ៍ជាក់ស្ដែងអ្នកគួរតែដាក់ពាក្យកម្មវិធី «អាហារូបករណ៍ទស្សនៈវប្បធម៌ប្រចាំឆ្នាំ ២០២០» របស់អង្គការសិល្បៈខ្មែរអមតៈ (CLA)។
អាហារូបករណ៍ទស្សនៈវប្បធម៌ គឺជាកម្មវិធីមួយបង្កើតឡើងសម្រាប់អ្នកកំពុងបម្រើការងារក្នុងវិស័យសិល្បៈ និងវប្បធម៌នៅប្រទេស កម្ពុជា ដែលមានបទពិសោធច្រើនឆ្នាំក្នុងវិស័យនេះ រួមមានទាំងសិល្បករ គ្រូសិល្បៈ អ្នករៀបចំសិល្បៈ ឬអ្នកស្រាវជ្រាវសិល្បៈវប្បធម៌ និងជាអ្នកដែលមានភាពសកម្មនៅក្នុងការផ្តួចផ្តើមគំនិតថ្មី ឬដឹកនាំគម្រោងនៅតាមសហគមន៍ ឬកំពុងតែប្រតិបត្តិការនៅក្នុងស្ថាប័នអង្គការណាមួយ។
បើតាមលោក គាត សុគីម បុគ្គលិកផ្នែកទំនាក់ទំនងព័ត៌មាននៃអង្គការសិល្បៈខ្មែរអមតៈបានឲ្យដឹងថា៖ «គោលបំណង គឺបង្កលទ្ធភាព និងអភិវឌ្ឍធនធាន ដែលមានសក្តានុពលផ្សេងៗក្នុងវិស័យសិល្បៈវប្បធម៌។ កម្មវិធីនេះត្រូវបានបង្កើតឡើងដោយការផ្តល់ឱកាសទៅដល់សិក្ខាកាមក្នុងការឆ្លុះបញ្ចាំងពីការងារជាក់ស្តែងរបស់ខ្លួនតាមរយៈឧទាហរណ៍ ជាក់ស្តែង និងពាក់ព័ន្ធនឹងការអនុវត្តការងារប្រចាំថ្ងៃ ដើម្បីឈ្វេងយល់ពីការងាររបស់ពួកគេ។ កម្មវិធីនេះមិនបានប្រាប់ដោយត្រង់ៗថា សិក្ខាកាមត្រូវធ្វើអ្វីនោះទេ ផ្តល់ជាទិដ្ឋភាពការងារក្នុងជ្រុងខុសៗគ្នា និងបទពិសោធនានា ដែលសិក្ខាកាមអាចជ្រើសរើសយកគំនិត គំរូ ឧទាហរណ៍ និងវិធីសាស្រ្តការងារតម្រូវតាមបរិបទការងាររបស់ខ្លួន។
ការបើកកម្មវិធីអាហារូបករណ៍សិល្បៈអមតៈអាន ឆនផុន កន្លងមក។ រូបថត សហការី
លោកបានបន្តថា៖ «នេះជាការផ្តល់ឱកាស និងពេលវេលាគ្រប់គ្រាន់សម្រាប់សិក្ខាកាមធ្វើការឆ្លុះបញ្ចាំងបែបស៊ីជម្រៅ និងវិភាគទៅលើការងារខ្លួនក្នុងវិស័យសិល្បៈ វប្បធម៌នេះ គឺដើម្បីរក្សាគុណតម្លៃស្នាដៃសិល្បៈ តើសិល្បករគួរធ្វើយ៉ាងណា ដើម្បីរក្សានិរន្តរភាពទីផ្សារ។ ជាធម្មតាអ្នកគ្រប់គ្រង និងរៀបចំកម្មវិធី ក៏មានតួនាទីបង្កើតទីតាំងសិល្បៈ ដើម្បីទស្សនិកជនទទួលបានបទពិសោធ៍ពីកម្មវិធីសិល្បៈទាំងនោះ»។
កម្មវិធីអាហារូបករណ៍ទស្សនៈវប្បធម៌នេះ មាន ៤ ផ្នែក ខណៈផ្នែកទី ១ ជាសិក្ខាសាលាទស្សនៈវប្បធម៌មានរយៈពេល ១ ឆ្នាំ ដោយត្រូវចែកជា ៤ លើក គឺលើកទី ១ នៅសៀមរាប ថ្ងៃទី ៦-៩ ខែឧសភា ឆ្នាំ ២០២០ លើកទី ២ នៅបាត់ដំបង ថ្ងៃទី ១៦-១៩ ខែ កក្កដា ឆ្នាំ ២០២០ លើកទី ៣ នៅភ្នំពេញថ្ងៃទី ៩-១២ ខែ កញ្ញា ឆ្នាំ ២០២០ និងលើកទី ៤ នៅកំពតថ្ងៃទី ១៧-២០ ខែ ធ្នូ ឆ្នាំ ២០២០។ ផ្នែកទី ២ កម្មវិធីទស្សនកិច្ចវប្បធម៌មហាតំបន់ទន្លេមេគង្គ គឺជាដំណើរទស្សនកិច្ចទៅប្រទេស មីយ៉ាន់ម៉ា នាថ្ងៃទី ៣-១០ ខែ តុលា ឆ្នាំ ២០២០។ ផ្នែកទី ៣ គម្រោងជាក្រុម ដោយសិក្ខាកាមត្រូវដឹកនាំគម្រោងមួយរួមគ្នា ដែលធ្វើនៅចន្លោះខែមករា ដល់ខែមីនា ឆ្នាំ ២០២១។ ផ្នែកទី ៤ ការឆ្លុះបញ្ចាំង សិក្ខាកាមម្នាក់ៗ ត្រូវសរសេរ និងធ្វើបទបង្ហាញការឆ្លុះបញ្ចាំងខ្លីមួយពីប្រធានបទអ្នកជ្រើសរើសក្នុងពេលចូលរួមក្នុងកម្មវិធីធ្វើនៅខែមីនា ឆ្នាំ ២០២១។ ការឈប់ទទួលពាក្យត្រឹមថ្ងៃទី ៣ ខែ មេសា ឆ្នាំ ២០២០ ឬធ្វើការទំនាក់ទំនងតាមអ៊ីមែល info@cambodianlivingarts.org និងទូរស័ព្ទ ០៧០ ៥៩៦ ០៧៦៕
