ក្រុងសៀមរាបៈ ឆ្លងកាត់បទពិសោធនៃសកម្មភាពជួយសង់ផ្ទះឈើដំបូលប្រក់ស័ង្កសី ជញ្ជាំងក្តារ ទំហំ ៤ ម៉ែត្រគុណ ៥ ម៉ែត្រ កម្ពស់ ២ ម៉ែត្រ ជិត ៥ ឆ្នាំដែលបានចំនួន ២៥៥ គ្រួសារហើយ បើគិតមកដល់ត្រឹមថ្ងៃទី ២០ ខែ មីនា ឆ្នាំ ២០១៩ ម្សិលមិញនេះ ហើយអង្គការស្ម័គ្រចិត្តកសាងកម្ពុជាក៏មានគម្រោងបណ្តុះបណ្តាលជំនាញជាងគ្រឿងសង្ហារិមទៅដល់ពលរដ្ឋក្រីក្រផងដែរ សម្រាប់ឆ្នាំ ២០២០ ខាងមុខ។
នេះបើយោងតាមលោក ម៉ាង ស៊ិន ជាស្ថាបនិក និងនាយកអង្គការស្ម័គ្រចិត្តកសាងកម្ពុជាមានវ័យ ៤៣ ឆ្នាំធ្លាប់មានបទពិសោធជាជាងធ្វើផ្ទះជាង ២០ ឆ្នាំនៅជំនាន់បានប្រាក់កម្រៃតម្លៃពលកម្មត្រឹមតែ ៥ ០០០ រៀលក្នុង ១ ថ្ងៃមានស្រុកកំណើតនៅស្រុកកោះធំ ខេត្តកណ្តាល និងបច្ចុប្បន្នកំពុងរស់នៅក្នុងស្រុកប្រាសាទបាគង ខេត្តសៀមរាបពេលអង្គការលោកកំពុងតែសង់ផ្ទះថ្មីទី ២៥៥ កាលថ្ងៃទី ២០ ខែ មីនា ឆ្នាំ ២០១៩ ដែលមានចម្ងាយ ៤៥ គីឡូម៉ែត្រពីក្រុងសៀមរាប។
អង្គការស្ម័គ្រចិត្តកសាងកម្ពុជា (VBC) ដែលមានទីតាំងស្ថិតនៅភូមិក្រពើ ឃុំបល្ល័ង្ក ស្រុកប្រាសាទបាគង ខេត្តសៀមរាបបានបង្កើតឡើងតាំងពីថ្ងៃទី ១៧ ខែ មីនា ឆ្នាំ ២០១៤ មកដោយបានចុះបញ្ចីពីក្រសួងមហាផ្ទៃដែលមានគោលដៅធំគឺជួយកសាងផ្ទះឈើដំបូលប្រក់ស័ង្កសី ជញ្ជាំងក្តារទំហំ ៤ ម៉ែត្រគុណ ៥ ម៉ែត្រ កម្ពស់ ២ ម៉ែត្រសង់បន្ទប់ទឹកអនាម័យ អណ្តូងទឹកស្អាត និងជួយជួសជុលផ្ទះពលរដ្ឋក្រីក្រដែលមានភាពទ្រុឌទ្រោមខ្លាំងទៀតផង។
លោក ម៉ាង ស៊ិន បង្ហើបឲ្យដឹងថា៖ «គិតត្រឹមសប្តាហ៍នេះ [ថ្ងៃទី ២០ ខែមីនា ឆ្នាំ ២០១៩] យើងបានសង់ផ្ទះពលរដ្ឋបានចំនួន ២៥៥ ខ្នង (ឬ ២៥៥ គ្រួសារ) ដែលផ្ទះ ១ ខ្នងមានទំហំ ៤ ម៉ែត្រ គុណ ៥ ម៉ែត្រ កម្ពស់ ២ ម៉ែត្រ ប្រក់ស័ង្កសី ជញ្ជាំងក្តារ ក្រាលថ្មស៊ីម៉ងត៍ និងសង់បន្ទប់ទឹកបាន ២០៣ ជីកអណ្តូងបាន ១២០ និងជួយជួសជុលបានជាង ១០០ ខ្នងផងដែរ។
ផ្ទះ ១ ខ្នងយើងសង់ត្រឹមពេល ១ ព្រឹកប៉ុណ្ណោះ ដោយសារមនុស្សជាច្រើនចូលរួមជួយក្រោយពីមានការរៀបចំវត្ថុធាតុដើមរួចរាល់អស់មក។ ផ្ទះ ១ ខ្នងតម្លៃ ៣ ០០០ ដុល្លារ ខណៈប្រាក់ទាំងនេះគឺបានមកពីភ្ញៀវបរទេសដែលបានមកទស្សនាតំបន់ប្រាសាទអង្គរគឺពួកគាត់សហការគ្នាជាក្រុមមកជួយសង់ផ្ទះពេលព្រឹកជាមួយអង្គការយើង លុះដល់ពេលរសៀលទើបពួកគេទៅដើរកម្សាន្តតាមគោលដៅរៀងៗខ្លួន ឬជាប្រាក់បានពីស្ថាប័នសាលារៀនណាមួយផ្តល់»។
ក្រៅពីខេត្តសៀមរាបអង្គការស្ម័គ្រចិត្តកសាងកម្ពុជា (VBC) ក៏បានទៅជួយសង់ផ្ទះនៅខេត្តផ្សេងៗដែរដូចជាកាលពីឆ្នាំ ២០១៦ ជួយកសាងផ្ទះនៅខេត្តកំពង់ធំ ២ ខ្នង និងបាត់ដំបង ២ ខ្នង ខណៈការជួយក៏មានលក្ខខណ្ឌគោរពទៅតាមគោលការណ៍របស់អង្គការបានកំណត់ដែរ។
ស្ថាបនិក និងនាយកអង្គការរូបនេះបញ្ជាក់ថា៖ «លក្ខខណ្ឌជួយគឺពួកគាត់ត្រូវតែជាពលរដ្ឋក្រីក្រពិតប្រាកដដែលខិតខំប្រកបរបរចិញ្ចឹមជីវិតអស់លទ្ធភាពតែនៅមិនធូរធារ ហើយក៏មិនមែនពលរដ្ឋក្រីក្រព្រោះតែខ្ជិលច្រអូស ឬមិនខំប្រឹងរកស៊ីបែរជាលេងល្បែងស៊ីសង ឬសេពគ្រឿងញៀនជាដើម។ យើងក៏ចុះទៅស៊ើបឲ្យដឹងមុនជាមួយនឹងមេភូមិ មេឃុំ តាមតំបន់មូលដ្ឋានជាក់ស្តែងសិនទើបសម្រេចជ្រើសរើសគ្រួសារជាអាទិភាព។ ក្រោយពីជួយសង់ផ្ទះនោះហើយប្រមាណ ៦ ខែក្រោយក៏ត្រូវចុះទៅតាមដានពីសកម្មភាពរស់នៅរបស់ពួកគាត់ផងដែរ ដើម្បីបានដឹង និងទទួលបានព័ត៌មានច្បាស់ស្តីអំពីបច្ចុប្បន្នភាពនៃក្រុមគ្រួសារពួកគាត់បន្តដែរ»។
ក្រៅពីជួយសង់ផ្ទះ បន្ទប់ទឹក អណ្តូងទឹកស្អាតដល់ពលរដ្ឋក្រីក្រនោះ អង្គការស្ម័គ្រចិត្តកសាងកម្ពុជាក៏មានបើកមជ្ឈមណ្ឌលភាសាអង្គការស្ម័គ្រចិត្តកសាងកម្ពុជា បង្រៀនភាសាអង់គ្លេសច្រើនកម្រិត និងផ្នែកកុំព្យូទ័រ និងមានផែនការថ្មីសម្រាប់ឆ្នាំ ២០២០ ទៀតផង។
លោក ម៉ាង ស៊ិន បន្ថែមថា៖ «កាលពីឆ្នាំ ២០១៨ កន្លងមកយើងបានបើកមជ្ឈមណ្ឌលភាសាអង្គការស្ម័គ្រចិត្តកសាងកម្ពុជាជួយបង្រៀនភាសាអង់គ្លេស និងមូលដ្ឋានកុំព្យូទ័រដល់សិស្សានុសិស្សជាកូនចៅពលរដ្ឋ ក្រីក្រក្នុងសហគមន៍ឥតគិតថ្លៃផងដែរ។ ឆ្នាំ ២០២០ អង្គការក៏ចង់មានដៃគូសហការផ្តល់មូលនិធិដូរទម្រង់នៃការសង់ផ្ទះឲ្យខុសពីមុន និងគ្រោងបន្ថែមជំនាញជាងធ្វើគ្រឿងសង្ហារិមតុ និងទូ កាត់ដេរ និងជំនាញ Soft Skill ដែរ។ យល់ថាជំនាញទាំងនេះអាចជួយឲ្យពលរដ្ឋរៀនចេះ ហើយយកទៅប្រកបរបរចិញ្ចឹមជីវិតបាន និងមានទីផ្សារការងារល្អប្រសើរ»៕