ភ្នំពេញៈ ដោយសារមានគោលដៅវែងឆ្ងាយចង់ជួយសម្របសម្រួលជាមធ្យោបាយថ្នាក់មូលដ្ឋានតាមបណ្តាខេត្តនានាក្នុងប្រទេសទៅលើវិស័យអប់រំ និងសហការជាមួយរដ្ឋាភិបាល អង្គការមូលនិធិទ្រទ្រង់កុមារកម្ពុជា (CCAFO) កំពុងតែចូលរួមយ៉ាងសកម្មជួយដល់សហគមន៍អប់រំកុមារក្រីក្រនៅក្នុងប្រទេសកម្ពុជា។
លោក ហ៊ីង ច័ន្ទណារិទ្ធ ដែលជាស្ថាបនិក និងនាយកប្រតិបត្តិនៃអង្គការ CCAFO បានឲ្យដឹងពីគោលបំណងធំរបស់អង្គការលោកថា៖ «ព្រោះតែចង់ធ្វើការងារដោយខ្លួនឯង ដើម្បីជួយសម្រួលកិច្ចការផ្នែកអប់រំ កម្រិតថ្នាក់មតេ្តយ្យសិក្សា និងបើកនូវមជ្ឈមណ្ឌលបណ្តុះបណ្តាលភាសាអង់គ្លេសនៅតាមសហគមន៍ក្រីក្រនៃតំបន់នានាក្នុងប្រទេសកម្ពុជា។ ចាប់ពីឆ្នាំ ២០០៦ ខ្ញុំក៏បានបង្កើតអង្គការនេះឡើងដែលធ្វើការងារទៅតាមគម្រោងធំ ២ នោះដោយបច្ចុប្បន្នយើងមានការងារជាគម្រោងនៅមូលដ្ឋានក្នុងខេត្តចំនួន ២ គឺខេត្តកំពត និងខេត្តកំពង់ស្ពឺដែលមានចំនួន ១៩ សាលាមត្តេយ្យសិក្សា ខណៈស្នាក់ការធំនៃអង្គការយើងនៅភ្នំពេញ»។
ខណៈខ្លួនក៏ធ្លាប់មានបទពិសោធផ្នែកសរសេរគម្រោងស្នើសុំហិរញ្ញវត្ថុពីម្ចាស់ជំនួយអន្តរជាតិនានានោះទើបនៅឆ្នាំ ២០១៤ អង្គការ CCAFO ក៏បានចុះកិច្ចព្រមព្រៀងនឹងដៃគូជាមួយបណ្តាម្ចាស់ជំនួយអន្តរជាតិនានាដោយអង្គការដើរតួជាអ្នកសម្របសម្រួលនាំយកជំនួយចែកចាយបន្តឲ្យបណ្តាអង្គការក្នុងស្រុកនានានៅក្នុងប្រទេសខ្មែររហូតមកដល់សព្វថ្ងៃផងដែរ។
លោក ហ៊ីង ច័ន្ទណារិទ្ធ បានបញ្ជាក់ថា៖ «ម្យ៉ាងទៀតដោយសារតែរូបខ្ញុំក៏ធ្លាប់មានបទពិសោធសរសរគម្រោងស្នើសុំជំនួយពីម្ចាស់ជំនួយនានាស្រាប់នោះទើបនៅឆ្នាំ ២០១៤ អង្គការយើងបានចុះកិច្ចព្រមព្រៀងចាប់ដៃគូជាមួយអង្គការ ឬស្ថាប័នជាម្ចាស់ជំនួយអន្តរជាតិក្នុងនាមជាអ្នកទទួលយកជំនួយផ្នែកហិរញ្ញវត្ថុពីម្ចាស់ជំនួយ ហើយក៏នាំយកទៅចែកចាយជួយបន្តដល់អង្គការ ឬក៏ជាមជ្ឈមណ្ឌលនៅក្នុងស្រុកនានា។ ឥឡូវនេះយើងបានជួយទៅដល់អង្គការ និងមជ្ឈមណ្ឌលចំនួន ៥ កន្លែងនៅក្នុងខេត្តចំនួន ៣ គឺខេត្តសៀមរាបមានចំនួន ៣ កន្លែង ខេត្តកំពង់ធំ មាន ១ កន្លែង និងពេលថ្មីៗឆ្នាំនេះមានមួយកន្លែងទៀតនៅខេត្តស្វាយរៀងគឺបានជួយដល់មជ្ឈមណ្ឌលភាសាបរទេសតាគិន (Takin Foreign Language Center) ជួយកញ្ចប់ថវិកា ៧០០ ដុល្លារក្នុង ១ ខែ»។
លោក ហ៊ីង ច័ន្ទណារិទ្ធ មានស្រុកកំណើតនៅខេត្តកំពង់ធំ និងបច្ចុប្បន្នរស់នៅភ្នំពេញ វ័យ ៥៧ ឆ្នាំ និងមានកូន ៣ នាក់ (ស្រី ២) បានបង្កើតអង្គការ CCAFO នៅក្នុងឆ្នាំ ២០០៦ ក្រោយពីឈប់ធ្វើការងារជានាយកនៃអង្គការ Veterans International Cambodia (VIC) ដែលធ្វើការនៅចន្លោះឆ្នាំ ១៩៩៦-២០០៥៕