ភ្នំពេញ៖ ខ្សែភាពយន្តអប់រំខ្នាតខ្លីបែបបុរាណ មានប្រភពដកស្រង់ចេញពីព្រះត្រៃបិដកនៃព្រះពុទ្ធសាសនា ដែលឆ្លុះបញ្ចាំងអំពីតថភាពសង្គម អាចជាជំនួយស្មារតីប្រកបដោយភាពវិជ្ជមានដល់មនុស្សជាតិសម័យទំនើប មានចំណងជើងថា «ព្រះភិក្ខុពនេចរ» នឹងចាប់ផ្តើមផលិតដោយផលិតករជាស្ថាបនិកអង្គការសកម្មភាពសិល្បៈខ្មែរ (KAA) ក្រោយពីបានពន្យារពេល ២-៣ ឆ្នាំ ខកខានក្នុងការថតមកនោះ។
សម្រាប់គម្រោងថតកុនភាគអប់រំខ្នាតខ្លី អប់រំផ្លូវចិត្ត ដែលមានប្រភពដកស្រង់ចេញព្រះត្រៃបិដកនៃព្រះពុទ្ធសាសនារឿង «ព្រះភិក្ខុពនេចរ» មានអត្ថន័យខ្លឹមសារល្អ ឆ្លុះបញ្ចាំងតថភាពសង្គម ស្ទើរគ្រប់រសជាតិនៃឆាកជីវិតទាំងមនុស្ស និងសត្វ ត្រូវបានលោក សួង សុភ័ក្រ ជាស្ថាបនិកអង្គការសកម្មភាពសិល្បៈខ្មែរ (KAA) និងផលិតករកុនឯករាជ្យឱ្យដឹងថា៖ «កាលពីមុនបានធ្លាប់ជួបពិភាក្សាជាមួយព្រះតេជគុណ គូ សុភាព កាលពីប្រមាណ ២-៣ ឆ្នាំ មុន ចង់ថតកុនអប់រំភាគខ្លី ដែលមានប្រភពដកស្រង់ចេញពីព្រះត្រៃបិដកនៃព្រះពុទ្ធសាសនាដើមពីប្រទេសឥណ្ឌា ដោយយើងបកប្រែជាភាសាខ្មែរ និងយកមកចងក្រងផលិតជាកុនមានប្រមាណ ២០ ភាគ (២០ cases)។ នាពេលបច្ចុប្បន្ន អង្គការសកម្មភាពសិល្បៈខ្មែរ កំពុងតែរើសតួសម្តែងប្រុសស្រីជាច្រើនរូប ដើម្បីសម្តែងដោយមានសហការផលិតពីផលិតកម្មរាម និងមូលនិធិធម្មឱសថ និងឧបត្ថម្ភដោយក្រុមហ៊ុនសម្រស់ធម្មជាតិ»។
លោក សួង សុភ័ក្រ ផលិតករវ័យ ៤០ ឆ្នាំប្លាយបានបន្តថា៖ «ឥឡូវនេះ យើងចាប់ផ្តើមរៀបចំតារាងពេលវេលា និងផ្តើមថតជាបណ្តើរៗហើយ។ ការថតនឹងចាប់ផ្តើមថ្ងៃទី ២៥ ខែ មករា ឆ្នាំ ២០២១ ខណៈពេលទាំងថត និងការងារផលិតរហូតដល់ចប់ចេញជាសាច់រឿងសម្រេចផូស្តតាមគេហទំព័របាននោះ អាចនឹងត្រូវចំណាយពេលប្រមាណជិត ៣ ខែ។ ចំពោះទីកន្លែងថតកុនភាគខ្លីៗបែបអប់រំផ្លូវចិត្តប្រកបដោយភាពវិជ្ជមាន ឬជាកុនជំនួយស្មារតីនេះ នឹងត្រូវថតតាមទីកន្លែងនានានៃប្រទេសកម្ពុជា ដូចជានៅឯពុទ្ធមណ្ឌល ខេត្តសៀមរាប តំបន់ប្រាសាទនានា ខេត្តមណ្ឌលគិរី និងបណ្តាខេត្តផ្សេងៗទៀត»។
លោក Preeka ជាជំនួយការផលិតករឱ្យដឹងពីការរើសតួសម្តែងរឿង «ព្រះភិក្ខុពនេចរ» នេះថា៖ «យើងជ្រើសបានតួសម្តែងសំខាន់ និងតួបន្ទាប់បន្សំតាមភាគនីមួយៗចំនួន ៣៨ នាក់។ ខណៈឯតួអង្គសំខាន់ដែលសម្តែងជា ព្រះភិក្ខុពនេចរនោះ គឺលោក សន ពិសិដ្ឋ។ ចំណែកឯតួផ្សេងៗទៀតនឹងបន្តជ្រើសរើស។ តួអង្គភាគច្រើន យើងជ្រើសពីក្រុមលោកគ្រូ អ្នកគ្រូ ដែលមានអាជីពជាគ្រូនៅសាលាសិល្បៈ»៕