.jpg)
អ្នកនាង សូរ្យ អេនណា និងស្វាមីជាតិហូឡង់ ជាមួយកូនស្រីទី១ វ័យ ១១ ខែ។ រូបថត ហ្វេសប៊ុក, អតីតកញ្ញាឯក Miss Global Cambodia ប្រចាំឆ្នាំ ២០១៦ អ្នកនាង សូរ្យ អេនណា។ រូបថត ភ្នំពេញប៉ុស្តិ៍
ភ្នំពេញ៖ បន្ទាប់ពីរៀបការតាមប្រពៃណីខ្មែរ ជាមួយស្វាមីជាតិហូឡង់ និងតាមស្វាមីទៅរស់នៅទីក្រុងហុងកុង បានប្រមាណ ២ ឆ្នាំ ហើយមានបុត្រទី១ កាលពីឆ្នាំ ២០២០ សោះ ស្រាប់តែលេចដំណឹងថា តារាម៉ូដែល និងអតីត Miss Global Cambodia ឆ្នាំ ២០១៦ អ្នកនាង សូរ្យ អេនណា ត្រៀមសម្រាលបុត្រទី២ សល់ពេល ២ ខែទៀតប៉ុណ្ណោះ នៅឆ្នាំ ២០២១ នេះ។
សម្ព័ន្ធស្នេហ៍ប្តីប្រពន្ធរបស់ សូរ្យ អេនណា និងស្វាមីជាតិហូឡង់ ឈ្មោះ Maurice Boumen វ័យ ៣៥ ឆ្នាំ ដែលមានតួនាទីជាអ្នកគ្រប់គ្រងសណ្ឋាគារលំដាប់ផ្កាយ ៥ នៅទីក្រុងហុងកុង កាលពីថ្ងៃ ៦ ខែមេសា ឆ្នាំ ២០១៩ ហើយទទួលបានបុត្រីដំបូង បច្ចុប្បន្នមានវ័យ ១១ ខែឈ្មោះ Estelle Catharina Dane Boumen ឈ្មោះខ្មែរហៅថា «កតិកា» កើតកាលពីឆ្នាំ ២០២០។
ខណៈពេលនេះ សូរ្យ អេនណា កំពុងតែរស់នៅយ៉ាងមានសេចក្តីសុខជាមួយស្វាមី និងកូនស្រីទី១ ដ៏គួរឱ្យស្រឡាញ់មានវ័យជាង ១១ ខែ នៅទីក្រុងហុងកុងនោះ អ្នកនាងក៏បង្ហើបឱ្យអ្នកស្និទ្ធស្នាល ដែលជាអតីតមត្តិរួមអាជីពដឹងថា ខ្លួនកំពុងតែពពោះកូនទី២ ចំនួន ៧ ខែហើយ ដោយត្រៀមនឹងសម្រាល នៅសល់ពេលប្រមាណ ២ ខែ ទៀតតែប៉ុណ្ណោះ។
ប្រភពមិត្តរួមអាជីពនឹងអ្នកនាង សូរ្យ អេនណា បង្ហើបថា ក្រៅពីបំពេញការងារជាស្ត្រីមេផ្ទះ សព្វថ្ងៃ សូរ្យ អេនណា កំពុងពពោះកូនទី២ ប្រមាណជាជិត ៧ ខែហើយ តែនាងមិនបានប្រាប់ថា ជាកូនស្រី ឬប្រុសនោះឡើយ ហើយពួកគេក៏បានលាន់មាត់លើកឡើងបែបចំអន់លេងដែរថា៖ «អីយ៉ា! ស្រូតតែម្តងហើយ សូរ្យ អេនណា! តែឮពេលកន្លងមកនាងក៏ធ្លាប់ប្រាប់ថា នឹងឆាប់យកកូនឱ្យហើយទៅទាន់ខ្លួននៅក្មេង»។
ដោយធ្លាប់ជាតារាម៉ូដែលមានរូបឆោមស្រស់រាងតូចស្ល៊ីម តែអតីតជាប្រធានក្រុមតារាម៉ូដែល «តារារះថ្មីកម្ពុជា» មានរូបសម្បុរស្រអែម អ្នកនាង សូរ្យ អេនណា ក្រោយពីបានរៀបការ ជាមួយសា្វមីជាតិហូឡង់ មកអ្នកនាងបានឡើងទម្ងន់ដល់ ៦៧ គីឡូឯណោះ តែទោះជាយ៉ាងណា អ្នកនាងក៏មិនមានការព្រួយបារម្ភខ្លាចថា ខូចរាងនោះឡើយ។
ដោយសារស្វាមីជាអ្នកមានទ្រព្យធូរធារ និងមានកូនតូចជាប់ដៃជាបន្តបន្ទាប់នោះ គេមិនទាន់ដឹងថា តើតារាម៉ូដែលសម្បុរស្រអែមស្រស់រូបនេះ មានបំណងចង់វិលចូលប្រឡូកនៅក្នុងវិស័យបង្ហាញម៉ូដដូចជាកាលមុន ឬបែបណាឡើយ។
គួរបញ្ជាក់ថា តារាម៉ូដែល Miss Global Cambodia ឆ្នាំ ២០១៦ សូរ្យ អេនណា បានរៀបការទៅតាមប្រពៃណីខ្មែរ ជាមួយបុរសជនជាតិហូឡង់វ័យ ៣៥ ឆ្នាំ មានឈ្មោះ Maurice Boumen ដែលមានតួនាទីជាអ្នកគ្រប់គ្រងសណ្ឋាគារលំដាប់ផ្កាយ ៥ នៅឯទីក្រុងហុងកុង កាលពីថ្ងៃ ៦ ខែ មេសា ឆ្នាំ ២០១៩ រៀបចំនៅឯកោះពេជ្រ ទទួលភ្ញៀវចំនួន ៦០ តុ៕
